ឃាត់ខ្លួនជនសង្ស័យ១២នាក់ ពាក់ព័ន្ធករណី​ជួញ​ដូរគ្រឿងញៀននិងកាន់កាប់អាវុធខុសច្បាប់

ជនសង្ស័យប្រុសស្រីចំនួន១២នាក់ត្រូវបានកម្លាំងនគរបាលនៃអធិការខណ្ឌព្រែកព្នៅធ្វេីការឃាត់ខ្លួនយកទៅសួរនាំ និងចាត់ការតាមច្បាប់ពាក់ព័ន្ធករណីប្រេីប្រាស់គ្រឿងញៀន និងកាន់កាប់អាវុធកែឆ្នៃខុសច្បាប់។

សមត្ថកិច្ចបានប្រាប់ឲ្យដឹងនៅព្រឹកថ្ងៃទី០៩ ខែមករា ឆ្នាំ២០២៣នេះថា កាលពីថ្ងៃទី០៨ ខែមករា ឆ្នាំ២០២៣ វេលាម៉ោង ១៣និង៣០នាទី ដោយមានការដឹកនាំបញ្ជាផ្ទាល់ពីលោក សុខ ហេង អធិការនគរបាលខណ្ឌព្រែកព្នៅ ព្រមទាំងមានការសម្របសម្រួលពីលោក សឿ ឡងឌី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បញ្ជាឲ្យអោយលោកវរសេនីយ៍ទោ ទឹម សៅសុភ័ក្រ្ត អធិការរងផ្នែកប្រឆាំងគ្រឿងញៀន សហការណ៍ជាមួយកម្លាំងប៉ុស្តិ៍នគរបាលរដ្ឋបាលធ្វើការស្រាវជ្រាវបង្ក្រាបករណីជួញដូរ និងប្រើប្រាស់ដោយខុសច្បាប់នូវសារធាតុញៀន ព្រមទាំងកាន់កាប់អាវុធដោយគ្មានការអនុញ្ញាត ចំនួន០២គោលដៅ។

សមត្ថកិច្ចបានបន្តឲ្យដឹងទៀតថា ករណីទី១ នៅចំណុចលើខ្នងទំនប់ ផ្លូវលំ ភូមិធំជើង សង្កាត់ពញាពន់។ ទី២នៅចំណុចផ្ទះខ្ទមគ្មានលេខ ផ្លូវលំ ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ ក្នុងនោះធ្វើការឃាត់ខ្លួនជនសង្ស័យបានចំនួន ១២នាក់ ស្រី ០២នាក់ និងវត្ថុតាងចាប់យកមាន ៖
១.ក្រាមសថ្លាសង្ស័យជាគ្រឿងញៀនចំនួន០២កញ្ចប់ថង់ធំល្មម និង០១កញ្ចប់ថង់តូច ។
២.ទូរសព្ទ ចំនួន១៦គ្រឿង។
៣.ម៉ូតូ ចំនួន០៣គ្រឿង ។
៤.កាំភ្លើងស្នប់កែច្នៃ ចំនួន០៧ដើម ។
៥.ដាវដែកកែច្នៃ ចំនួន០៥ដើម ។

បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌព្រែកព្នៅ ដេីម្បីធ្វើការសាកសួរ និងចាត់ការបន្តតាមនីតិវិធីច្បាប់៕

អត្ថបទ៖ សុខា