កម្លាំងនគរបាលនៃអធិការដ្ឋាននគរបាលស្រុកទ្រាំង សហការជាមួយកម្លាំងនគរបាល នៃអធិការដ្ឋាននគរបាលស្រុកគិរីវង់ ខេត្តតាកែវ បានធ្វើការស្រាវជ្រាវឃាត់ខ្លួនក្រុមសិស្សសាលាមួយក្រុមចំនួន៤នាក់ ពាក់ព័ន្ធករណីកាប់សម្លាប់យុវជនម្នាក់ស្លាប់ភ្លាមៗ កាលពីថ្ងៃទី៣ ខែកុម្ភៈ កន្លងទៅ។

បើតាមសមត្ថកិច្ចជនសង្ស័យមានឈ្មោះ ១ ឈ្មោះ សន វណ្ណរ៉ា ភេទប្រុស អាយុ១៧ឆ្នាំ រស់នៅភូមិកំពង់ ឃុំព្រះបាទជាន់ជុំ ស្រុកគិរីវង់ មុខរបបរសិស្ស ជាជនដៃដល់កាប់ជនរងគ្រោះ (ម្ចាស់ដាវ និងកាំបិត)។ ២ ឈ្មោះ ស៊ឹម ចន្នី ភេទប្រុស អាយុ១៧ឆ្នាំ រស់នៅភូមិអណ្តូងកៀន ឃុំភ្នំដិន ស្រុកគិរីវង់ មុខរបបរសិស្ស (ម្ចាស់ម៉ូតូដឹកជនដៃដល់កាប់ជនរងគ្រោះ)។ ៣ ឈ្មោះ សុខ សេមសេរីវឌ្ឍនៈ ភេទប្រុស អាយុ១៦ឆ្នាំ រស់នៅភូមិពោធិ៍ខ្វិត ឃុំព្រះបាទជាន់ជុំ ស្រុកគិរីវង់ ខេត្តតាកែវ មុខរបរសិស្ស (ម្ចាស់កាំបិតក្រង៉ុក និងម៉ូតូខ្ចីគេជិះធ្វើសកម្មភាព)។ ទី៤ ឈ្មោះ ផែន រ៉ាឌី ភេទប្រុស អាយុ១៦ឆ្នាំ មុខរបបសិល្ប រស់នៅភូមិត្រពាំងឈូក ឃុំត្រឡាច ស្រុកទ្រាំង ខេត្តតាកែវ។

តាមចម្លើយសារភាពរបស់ក្រុមជនសង្ស័យបានសារភាពថា ក្រុមខ្លួនមិនមានគំនុំអ្វីជាមួយជនរងគ្រោះនោះទេ ប៉ុន្តែដោយ​សារក្រុមខ្លួនមានរឿងមកពីកន្លែងផ្សេង រួចក៏ជិះម៉ូតូដល់កន្លែងកើតហេតុឃើញជនរងគ្រោះជិះម៉ូតូម្នាក់ឯង ក៏បានកាប់សំដៅលើជនរងគ្រោះបណ្តាលឱ្យស្លាប់ភ្លាមៗតែម្ដង។

សូមបញ្ជាក់ថា កាលពីថ្ងៃទី០៣ ខែកុម្ភៈ ឆ្នាំ២០២៣ នៅលើបណ្តោយផ្លូវជាតិលេខ២ ស្ថិតនៅឃុំប្រាំបីមុំ ស្រុកទ្រាំង ខេត្តតាកែវ មានករណីក្រុមក្មេងស្ទាវមួយក្រុមបានជិះម៉ូតូដេញកាប់យុវជនម្នាក់បណ្ដាលឲ្យស្លាប់ភ្លាមៗ រួចនាំគ្នាជិះគេចខ្លួនបាត់អស់ រហូតដល់ថ្ងៃទី៦ ខែកុម្ភៈ ឆ្នាំ២០២៣នេះ ទើបកម្លាំងជំនាញស្រាវជ្រាវឃាត់ខ្លួនបាន។

ជនសង្ស័យទាំង០៤នាក់ ត្រូវបានកម្លាំងជំនាញកំពុងកសាងសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់៕

អត្ថបទ៖ សុខុម