​បច្ចេកទេសស្រាវជ្រាវខ្ពស់របស់នគរបាល​ ចាប់ទណ្ឌិតគ្រឿងញៀនដែលត្រូវរំដោះទាន់ពេលវេលា

លោកនាយឧត្ដមសេនីយ៍ ម៉ក់ ជីតូ អគ្គស្នងការរងនគរបាលជាតិមានប្រសាសន៍នៅថ្ងៃទី ​២៣ ខែសីហា ឆ្នាំ ២០២៣នេះថា បច្ចុប្បន្នសមត្ថកិច្ចមានបច្ចេកទេសខ្ពស់ក្នុងការតាមដានបទល្មើសនានា ដែលមានបច្ចេកទេសវិទ្យាសាស្ត្រជំនាញ សម្ភារបច្ចេកទេស និងមានជំនួយពីបណ្ដាប្រទេស​ជាមិត្តដូច្នេះសមត្ថកិច្ចឆាប់រកឃើញទាន់ពេលវេលា។

​ករណីទណ្ឌិតមេក្លោងគ្រឿងញៀន ដែលត្រូវបានក្រុមជនសង្ស័យរំដោះខ្លួននៅខេត្តសៀមរាប ត្រូវ​បានសមត្ថកិច្ចចាប់ខ្លួនមកវិញ បន្ទាប់ពីរត់លាក់ខ្លួនជិត ១ សប្ដាហ៍។

​លោកនាយឧត្ដមសេនីយ៍ ម៉ក់ ជីតូ បានឱ្យដឹងថា «នគរបាលទាំងអស់នាំគ្នាធ្វើរឿងនេះ ​ការចូលរួម​ពីសាក្សីបំភ្លឺ ​ហើយនគរបាលឥឡូវមិនដូចពីមុនទេ យើងឥឡូវនេះ យើងមានបច្ចេកទេស​វិទ្យាសាស្ត្រ មានជំនាញ មានសម្ភារបច្ចេកទេស និងជំនួយបណ្ដាប្រទេសជាមិត្តដែលបានដកពិសោធន៍​ជាមួយ​យើង ហើយយើងរកឆាប់ឃើញ ទាន់ពេលវេលា»។

​ឧក្រិដ្ឋជនគ្រឿងញៀន ដែលត្រូវរំដោះនៅខេត្តសៀមរាប ​បានសម្ងំលាក់ខ្លួនច្រើនកន្លែង​ ហើយ​សមត្ថកិច្ច​បានកាត់ផ្ដាច់ខ្សែបណ្ដាញ ជននេះមិនដឹងទៅណា ទើបមកលាក់ខ្លួននៅភ្នំពេញ។

នៅព្រឹកថ្ងៃទី ២២ ខែសីហា ឆ្នាំ ២០២៣ កម្លាំងសមត្ថកិច្ច នៃមន្ទីរប្រឆាំងបទល្មើសគ្រឿងញៀនបាន​តាមប្រមាញ់ និងឃាត់ខ្លួនមេក្លោងគ្រឿងញៀន ដែលត្រូវជាប់ទោស ៥២ឆ្នាំ ពីបទជួញដូគ្រឿង​ញៀនចំនួន ២លើកនោះ បានមកវិញមត្ថនៅសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។

ឧក្រិដ្ឋជនរូបនេះ ត្រូវបានក្រុមជនសង្ស័យបិទមុខ ៦នាក់ ជួយរំដោះឲ្យគេចខ្លួន នៅមន្ទីពេទ្យធ្មេញមួយកន្លែង ក្នុងខេត្តសៀមរាប កាលពីថ្ងៃទី ១៧ ខែសីហា ឆ្នាំ ២០២៣កន្លងទៅនេះ។

មកដល់ថ្ងៃទី ២២ ខែសីហា ឆ្នាំ ២០២៣ សមត្ថកិច្ចបានចាប់ខ្លួនឧក្រិដ្ឋជនពាក់ព័ន្ធចំនួន ១១នាក់៕

អត្ថបទ៖ ឡេង ដេត