ឃុំខ្លួនបុរសម្នាក់ ពីបទលួចឆក់ត្រីនៅតំបន់រ៉ាមសារ

ជនសង្ស័យសកម្មក្នុងការលួចឆក់ត្រីពេលថ្ងៃ ពេលនេះត្រូវបានក្រុមអភិរក្សត្រីមេពូជនាំគ្នាប្រដេញស្ទាក់ឃាត់ខ្លួនបាននៅក្នុងតំបន់រ៉ាមសារ ស្ថិតនៅចំណុចបន្ទាយកោះកាង ភូមិសាស្ត្រភូមិថ្មី សង្កាត់សាមគ្គី ក្រុង ខេត្តស្ទឹងត្រែងត្រូវបានតុលាការសម្រេច​ឃុំខ្លួនហើយនៅព្រឹកថ្ងៃទី ៣០ ខែធ្នូ ឆ្នាំ ២០២៣នេះ។

មន្ត្រីអភិរក្សបានឲ្យដឹងថា ក្នុងសកម្មភាពល្បាតអភិរក្សត្រីមេពូជកម្លាំងប្រចាំការតំបន់រ៉ាមសារសហការជាមួយប្រជា​សហគមន៍នេសាទភូមិថ្មី នៅវេលាម៉ោង២ រសៀល បានចុះល្បាតត្រួតពិនិត្យតាមដាន បទល្មើសឆក់ត្រីក្នុងតំបន់រ៉ាមសារ និងប្រដេញតាមឃាត់ខ្លួនជនសង្ស័យបានម្នាក់កាលពីថ្ងៃទី ២៩ ខែធ្នូ ដែលសកម្មក្នុងការលបលួចឆក់ត្រីខុសច្បាប់ក្នុងតំបន់រ៉ាមសារ និងបានដកហូតវត្ថុតាង រួមមានឧបករណ៍ឆក់ព៌ណក្រហមខ្នាតធំ មួយគ្រឿង អាគុយ២ ទូកនិងម៉ាស៊ីនមួយសម្រាប់។ 

លោក ចាន់ ធឿង មន្ត្រីអភិរក្សត្រីមេពូជប្រចាំតំបន់រាមសារបានបញ្ជាក់បន្ថែមថា៖ ជនសង្ស័យ ឈ្មោះ អាន ផន អាយុ​៣៥ឆ្នាំ មានទីលំនៅភូមិវាលខ្សាច់ ឃុំថាឡា ស្រុកថាឡាបរិវ៉ាត់ ខេត្តស្ទឹងត្រែង ជាជនសកម្មខាងឆក់ត្រី មិនថាពេលថ្ងៃឬពេលយប់នោះទេ ហើយក៏មិនដែលខ្លាចសមត្ថកិច្ចណាដែរ។

លោក និន ពិសី ប្រធានក្រុមផ្នែកបរិស្ថាន ប្រចាំតំបន់រ៉ាមសារ បានបញ្ជាក់ដែរថា៖ ករណីនេះក្នុងនាមមន្ត្រីយុត្តិធ៌ម   បានបញ្ចូនសំណុំរឿង និងជនសង្ស័យនេះទៅតុលាការនៅថ្ងៃទី ២៩ ខែធ្នូ ហើយចៅក្រមកំពុងសាកសួរបន្ថែម ដើម្បីអនុវត្តច្បាប់ឱ្យសមតាមបទល្មើស។

ក្រោយសាកសួរឯកាអមសាលាដំបូងខេត្តស្ទឹងត្រែងបានសម្រេចឃុំខ្លួនជាបណ្ដោះអាសន្នរង់ចាំធ្វើស៊ើបអង្កេតបន្ត។

សូមបញ្ចាក់ថា៖ ករណីបង្រ្កាបជនសង្ស័យខាងលើនេះប្រជាសហគមន៍នេសាទ និងកម្លាំងល្បាតស្នើសុំទៅមន្ត្រីជំនាញនិងស្ថាប័នតុលាការអនុវត្តច្បាប់ឱ្យបានម៉ឺងម៉ាត់បំផុត ដើម្បីការការពារអភិរក្សត្រីមេពូជ ឱ្យកាន់តែមានប្រសិទ្ធភាពប្រសើរឡើង៕

អត្ថបទ៖ ងិនលីម