បង្ក្រាបទីតាំងទិញលក់ម៉ូតូខុសច្បាប់ រកឃើញម៉ូតូជាង៣០គ្រឿងពាក់ព័ន្ធបទល្មើសចោរកម្ម

កម្លាំងនគរបាលនៃអធិការដ្ឋាននគរបាលខណ្ឌទួលគោក សហការជាមួយកម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានចុះបង្ក្រាបទីតាំងទិញលក់ម៉ូតូមួយកន្លែងដែលពាក់ព័ន្ធបទល្មើសទទួលផលចោរកម្ម ដកហូតជាង៣០គ្រឿង និងសម្ភារមួយចំនួន។

ប្រតិបត្តិការនេះបានធ្វើឡើងកាលពីថ្ងៃទី២០ ខែកុម្ភៈ ឆ្នាំ២០២៤ នៅចំណុចផ្ទះលេខ៤៩E ផ្លូវ១៩២ សង្កាត់ទឹកល្អក់៣ ខណ្ឌគោក រាជធានីភ្នំពេញ ខណៈម្ចាស់ទីតាំងគេចខ្លួន។

យោងតាមរបាយការណ៍របស់ស្នងការដ្ឋាននគរបាលរាជធានីភ្នំពេញ បានឲ្យដឹងថា ក្នុងប្រតិបត្តិការចុះបង្ក្រាបទីទីតាំង ទិញលក់ម៉ូតូខុសច្បាប់នេះ កម្លាំងបានដកហូតម៉ូតូចំនួន៣១គ្រឿង ផ្លាកលេខម៉ូតូ ១១២សន្លឹក កាតគ្រីម៉ូតូ៧២សន្លឹក អត្តសញ្ញាណប័ណ្ណ១១ច្បាប់ សំបុត្រកំណើត០៣ច្បាប់ ធុងខ្យល់សម្រាប់កឹបស្លាកលេខ០១ និងកូនសោមួយចំនួន។

របាយការណ៍បញ្ជាក់ថា ក្រោយពីដកហូតសម្ភារ ទីតាំងខាងលើត្រូវបានបិទជាបណ្ណោះអាសន្ន ចំណែកសម្ភារដកហូត គឺយកទៅរក្សាទុកនៅនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ ក្រសួងមហាផ្ទៃ ដើម្បីចាត់ការបន្តនីតិវិធី៕

អត្ថបទ៖​ សុខុម