ឆ្មក់បង្ក្រាបល្បែងស៊ីសងខុសច្បាប់ សមត្ថកិច្ចឃាត់ខ្លួនមនុស្ស៨នាក់

កម្លាំងគណៈបញ្ជាការឯកភាពខណ្ឌកំបូល ឆ្មក់ចុះបង្ក្រាបទីតាំងល្បែងស៉ីសងខុសច្បាប់មួយកន្លែងឃាត់ខ្លួនមនុស្សប្រុសស្រីចំនួន៨នាក់ និងដកហូតសម្ភារមួយចំនួន។

ប្រតិបត្តិការខាងលេីនេះបានធ្វេីឡេីងកាលពីវេលាម៉ោង១និង៤០នាទីរសៀល ថ្ងៃទី២៥ ខែមីនា ឆ្នាំ២០២៤ នៅចំណុចផ្ទះយីយោ ផារ៉ាម៉ោន ស្ថិតនៅក្នុងភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ។

តាមប្រភពព័ត៌មានបានឱ្យដឹងថា ដោយបានទទួលព័ត៌មានសម្ងាត់ថា ទីតាំងខាងលេី បានបង្កប់ល្បែងស៉ីសងដោយម្ចាស់ជាជនជាតិចិនទេីបកម្លាំងគណៈបញ្ជាការឯកភាពចុះបង្ក្រាបជាក់ស្តែងឃាត់ខ្លួនមនុស្សប្រុសស្រីចំនួន៨នាក់ ក្នុងនោះមានបុរសម្នាក់ជាសន្តិសុខ និងដកហូតទូបៀរការ៉ាត់ចំនួន៧ទូ ទូហ្គេមបាញ់ត្រីចំនួន៨ទូ។

ក្រោយឃាត់ខ្លួនមនុស្សស្រីទាំង៨នាក់ត្រូវបានបញ្ជូនទៅអធិការដ្ឋាននគរបាលខណ្ឌកំបូលដេីម្បីសាកសួរ និងចាត់ការតាមនីតិវិធី ចំណែកសម្ភារត្រូវបានដឹកយកទៅរក្សាទុកបណ្តោះអាសន្ន ដោយឡែកទីតាំងខាងលេីត្រូវបានបិទជាបណ្តោះអាសន្ន៕

អត្ថបទ៖ សុខា