ព័ត៌មានលំអិត ពាក់ព័ន្ធករណីអគ្គិភ័យនៅខណ្ឌទួលគោក

ករណីអគ្គិភ័យឆេះនៅក្នុងមូលដ្ឋានខណ្ឌទួលគោកកាលពីវេលាម៉ោង១១និង៥០នាទីព្រឹក ថ្ងៃទី២៥ ខែមិថុនានេះ គឺផ្ដើមឡើងដោយសារ​ជាងផ្សារដែកធ្លាក់កំទិចធូបផ្សារបង្កជាអគ្គិភ័យតែម្តង។

តាមរបាយការណ៍របស់សមត្ថកិច្ច ទីតាំងដែលឆេះគឺជាភោជនីយដ្ឋានឈ្មោះ ប្រេន ឌី ស្ថិតនៅផ្លូវលេខ២៦៥ កែងផ្លូវ១៩២ ក្រុម២៥ ភូមិ៩ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ​ ម្ចាស់ទីតាំងឈ្មោះ​ ប្រាក់ វណ្ណឌី ភេទ​ប្រុស អាយុ៤០​ឆ្នាំ ជនជាតិខ្មែរ មុខរបរ​ម្ចាស់ហាង។

របាយការបញ្ជាក់ថា ទីតាំងខាងលើធ្វើឡើងអំពីដែកប្រក់ស័ង្កសី ទំហំ ១៤ម៉ែត្រ គុណ ២៥ម៉ែត្រ និងសម្ភារៈក្នុងហាងត្រូវបានអគ្គិភ័យឆេះអស់ទាំងស្រុង និងបណ្តាលឲ្យឆេះរាលដាលដល់ភោជនីយដ្ឋាន យីហោ បង ចំនួន១​ទៀត ខូចខាតអស់ ៤០% ផ្ទះថ្មជាន់ទី១ ចំនួន ០២​ ល្វែង ។

ក្នុងប្រតិបត្តិការ កម្លាំង​នគរបាល​បង្ការ​ពន្លត់​អគ្គិភ័យ​ និង​សង្គ្រោះ​ របស់​ការិយាល័យ​អគ្គិភ័យ​ស្នងការដ្ឋាន​នគរបាល​រាជធានី​ភ្នំពេញ​ បាន​ប្រើប្រាស់​រថយន្តអគ្គិភ័យអស់ចំនួន១៩​គ្រឿង ប្រើប្រាស់ទឹកអស់ចំនួន ៣៨​ រថយន្ត​ ស្មើនឹង១៥២ម៉ែត្រគូប៕

អត្ថបទ៖ សុខា