ស្នងការរាជធានីឆ្មក់បង្ក្រាបទីតាំងក្លិបមួយកន្លែងក្នុងខណ្ឌចំការមន ឃាត់ខ្លួនមនុស្សជាង១០០នាក់

ឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញបានដឹកនាំកម្លាំងនគបាលជំនាញចុះឆ្មក់បង្ក្រាបទីតាំងក្លិបកម្សាន្ដមួយកន្លែងឃាត់ខ្លួនមនុស្សជាង ១០០នាក់ នាំយកទៅស្នងការដ្ឋាននគរបាលរាជធានីភ្នំពេញ។

ប្រតិបត្តិការនេះបានធ្វើឡើងនៅវេលាម៉ោង១រំលងអធាត្រឈានចូលថ្ងៃទី១០ ខែសីហា ឆ្នាំ២០២៤ ដឹកនាំផ្ទាល់ដោយលោកឧត្តមសេនីយ៍ឯក ជួន ណារិន អគ្គស្នងការរង និងជាស្នងការនគរបាលរាជធានីភ្នំពេញ ឆ្មក់បង្ក្រាប់ទីតាំងក្លិបមួយកន្លែងដែលមានយីហោ GT ដែលស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ឃាត់ខ្លួនមនុស្សជាង១០០នាក់ ពាក់ព័ន្ធករណីចែកចាយ និងប្រើប្រាស់គ្រឿងញៀន។

ក្រោយប្រតិបត្តិការកម្លាំងនគរបាលជំនាញបានឃាត់ខ្លួនមនុស្សជាង១០០នាក់ រួមមានជនបរទេសជាច្រើននាក់ និងវត្ថុតាងមួយចំនួននាំយកទៅស្នងការដ្ឋាននគរបាលរាជធានីភ្នំពេញដើម្បីចាត់ការតាមនីតិវិធី។

គួរបញ្ជាក់ផងដែរ កាលពីពេលកន្លងទៅថ្មីៗ លោក ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានបញ្ជាឲ្យស្នងការរាជធានី ខេត្ត បន្តយកចិត្តទុកដាក់បោសសំអាតពីបញ្ហាគ្រឿងញៀន ជួញដូរមនុស្ស នៅតាមបណ្ដាទីតាំងក្លិប ខារ៉ាអូខេ ជាដើម ដោយទុករយៈពេលមួយសប្ដាហ៍ ដើម្បីចាត់ការរឿងទាំងនេះ៕

អត្ថបទ៖ សុភា