អាវុធហត្ថស្រុកអូរគ្រៀងសែនជ័យ បង្ក្រាបរថយន្តដឹកឈើមួយគ្រឿងក្រោយរត់គេចចូលផ្ទះពលរដ្ឋ

កម្លាំងកងរាជអាវុធហត្ថស្នាក់ការ ៧០៨ សហការជាមួយមន្ត្រីបរិស្ថាន បានបង្ក្រាបរថយន្តដឹកឈើមួយគ្រឿង ម៉ាក់ហ្វត ពាក់ស្លាកលេខ ត្បូងឃ្មុំ 2C-7792 នៅត្រង់ចំណុច ភូមិស្រែស្បូវ ឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ។

ប្រតិបត្តិការនេះបានធ្វើឡើងនាថ្ងៃទី១១ ខែកញ្ញា ឆ្នាំ២០២៤។ ប្រភពពីកន្លែងកើតហេតុបានឲ្យដឹងថា រថយន្តខាងលើ បានដឹកឈើចេញពីខេត្តស្ទឹងត្រែង រួចឆ្លងចូលក្នុងទឹកដីខេត្តក្រចេះ ដោយមានការសង្ស័យកម្លាំងសមត្ថកិច្ចបានដេញតាមឃាត់ ប៉ុន្តែភ្លាមៗនោះរថយន្តនោះក៏បានបើករត់គេច លុះមកដល់ចំណុចបង្ក្រាបខាងលើ សមត្ថកិច្ចក៏ប្រទះឃើញរថយន្តដែលសង្ស័យ បានបើកគេចចូលក្នុងផ្ទះប្រជាពលរដ្ឋអស់រយៈពេលជាច្រើនម៉ោង ទើបសមត្ថកិច្ចទទួលបានបទបញ្ជាពីព្រះរាជអាជ្ញា ដើម្បីចូលបង្ក្រាបឃាត់បានរថយន្តនៅក្នុងផ្ទះប្រជាពលរដ្ឋយកមកបាន។

យ៉ាងណាមិញ រថយន្តខាងលើនេះតែងតែធ្វើសកម្មភាពដឹកជញ្ជូនឈើចេញពីខេត្តស្ទឹងត្រែងស្ទើរជារៀងរាល់ថ្ងៃ រហូតដល់ពេលនេះបានជាប់អន្ទាក់របស់សមត្ថកិច្ច។

គួរបញ្ជាក់ផងដែរថា ករណីខាងលើនេះសមត្ថកិច្ចបានរឹបអូសឈើ និងវត្ថុតាងមួយចំនួនដែលបច្ចុប្បន្នវត្ថុតាងប្រគល់ជូនជំនាញសង្តាត់រដ្ឋបាលព្រៃឈើអូរគ្រៀងរក្សាទុក៕

អត្ថបទ៖ ប្រុញ វិធិន