អាជ្ញាធរខណ្ឌច្បារអំពៅ ដាក់កម្លាំងរៀបចំសណ្តាប់​ធ្នាប់ក្រោមស្ពានព្រះមុនីវង្សចាស់

បន្ទាប់ពីសារព័ត៌មានកម្ពុជាថ្មី បានផ្សព្វផ្សាយពីការដាក់តាំងរបស់របរលក់ដូរបែបអនាធិបតេយ្យនៅគល់ស្ពានព្រះមុនីវង្សចាស់រួចមក នៅថ្ងៃទី១ ខែឧសភា ឆ្នាំ២០២៥នេះ អាជ្ញាធរសង្កាត់ច្បារអំពៅទី២ បានដាក់កម្លាំងចុះរៀបចំសណ្ដាប់ធ្លាប់រួចហើយ ដើម្បីសោភ័ណភាព។ តែទោះយ៉ាងណា អ្នកធ្វើដំណើរឆ្លងកាត់បានសំណូមពរឲ្យអាជ្ញាធរចុះរៀបចំឲ្យជាប់ជាប្រចាំ។

លោក យុិន វុធ ចៅសង្កាត់ច្បារអំពៅទី២ បានប្រាប់ កម្ពុជាថ្មីថា ថ្មីៗនេះលោក ហ៊ត គឹមនី អភិបាលរងខណ្ឌច្បារអំពៅបានដាក់បទបញ្ជាឲ្យអាជ្ញាធរសង្កាត់ច្បារអំពៅទី២ ឲ្យចុះរៀបចំសណ្តាប់ធ្នាប់ក្រោមស្ពានព្រះមុនីវង្សចាស់ ស្ថិតក្នុងភូមិសាស្ត្រសង្កាត់ច្បារអំពៅទី២ ខណ្ឌច្បារអំពៅ ទៅលើអ្នកលក់ដូរក្រោមស្ពាន និងខាងជើងស្ពានដោយពុំអនុញ្ញាតឲ្យប្រកតង់ដាក់អីវ៉ាន់លក់ដូរបែបអាណាធិបតេយ្យជាបន្តទៀតឡើយ។

លោកចៅសង្កាត់បានបន្តថា ចំពោះបញ្ហារៀបចំសណ្តាប់ធ្នាប់ទៅលើអ្នកលក់ដូរ គឺអាជ្ញាធរបានធ្វើឡើងជារៀងរាល់ថ្ងៃប៉ុន្តែបងប្អូនអាជីវករលោកពុំសូវស្តាប់ឡើយមិនខុសពីវែកចកកណ្តាលបឹងឡើយ។ ប៉ុន្តែទោះបីពួកគាត់មិនស្តាប់ក៏អាជ្ញាធរនៅបន្តធ្វើរៀបចំសណ្តាប់ធ្នាប់ដោយពុំដកដៃ ហើយបើមិនស្តាប់ គឺមានតែរឹបអូសអីវ៉ាន់យកទៅរក្សាទុកនៅសាលាខណ្ឌច្បារអំពៅជាការព្រមាន។

ចំពោះអ្នកធ្វើដំណើបានសំដែងការអរគុណដល់អាជ្ញាធរលោកខិតខំរៀបចំសណ្តាប់ធ្នាប់ក្រោមស្ពានព្រះមុនីវង្សបានល្អស្អាតដូចថ្ងៃទី១ ខែឧសភានេះខ្លាំងណាស់៕

អត្ថបទ៖ នរា