សមត្ថកិច្ច​​ខេត្តក្រចេះបិ​ទ​រូបថត​​​ជន​សង្ស័យ​​​ ក្រើន​​រំលឹក​អាជីវករលក់មាស ដូរលុយ ​បង្កើន​ការ​​ប្រុងប្រយ័ត្ន​

កម្លាំងសមត្ថកិច្ចនៃស្នងការដ្ឋាននគរបាលខេត្តក្រចេះ ចុះផ្សព្វផ្សាយណែនាំដល់ពលរដ្ឋ ជាអាជីវករ លក់មាស ដូរលុយ និងវេរលុយគ្រប់ប្រភេទ ឲ្យមានការប្រុងប្រយ័ត្នពីការលួចបន្លំគ្រប់រូបភាពពីជនខិលខូច និងផ្តល់លេខទូរសព្ទសម្រាប់ទំនាក់ទំនងបន្ទាន់មកនគរបាល។

ការចុះផ្សព្វផ្សាយណែនាំនេះ ធ្វើឡើងក្រោមបទបញ្ជារបស់លោកឧត្តមសេនីយ៍ទោ អ៊ូ សុបុណ្ណា ស្នងការនគរបាលខេត្ត នាថ្ងៃទី៦ ខែឧសភា ឆ្នាំ២០២៥ បានបញ្ជាណែនាំ​ឲ្យ​គ្រប់បណ្តាអធិការដ្ឋាននគរបាលក្រុង-ស្រុកទាំង៧ យកចិត្តទុកដាក់ចំពោះករណីនេះ។

លោកវរសេនីយ៍ឯក ប៊ុត នឿន អធិការនគរបាលស្រុកចិត្របុរីបានឲ្យដឹងថា កម្លាំងនៃអធិការដ្ឋានស្រុកបានចុះផ្សព្វផ្សាយណែនាំដល់ពលរដ្ឋ ជាអាជីវករ លក់មាស ដូរលុយ និងវេរលុយ ឲ្យមានការប្រុងប្រយត្ន័ចំពោះមុខសញ្ញាជនសង្ស័យ និងរាយការណ៍មកសមត្ថកិច្ចភ្លាមពេលប្រទះជួប តាមរយៈប៉ុស្ដិ៍នគរបាលរដ្ឋបាលឃុំ នគរបាលសហគមន៍ អធិការរដ្ឋាននគរបាលស្រុក ក៏ដូចជា ស្នងការដ្ឋាននគរបាលខេត្ត ជាដើម។

នៅក្នុងការចុះផ្សព្វផ្សាយនេះ សមត្ថកិច្ចបានយករូបភាពរបស់ជនសង្ស័យបង្ហាញដល់អាជីវករទាំងអស់ និងបានបិទរូបភាព​នៅទីតាំង ដើម្បីឲ្យពួកគាត់បានយល់ងាយចំណាំ និងបញ្ជៀសកុំឲ្យកើតមានករណីដាក់ថ្នាំសណ្តំយកលុយ ឬទ្រព្យសម្បត្តិ​កើតឡើងនៅក្នុងភូមិសាស្ត្រស្រុកចិត្របុរី ក៏ដូចជានៅទូទាំងខេត្តក្រចេះ។

ជាក់ស្ដែង ករណីនេះ បានកើតឡើងនៅស្រុកឆ្លូង កាលពីពេលកន្លងទៅថ្មីៗនេះ ដោយជនសង្ស័យពាក់មួកសុវត្ថិភាព ស្ពាយកាបូប និងជិៈម៉ូតូ ធ្វើសកម្មភាព បានសម្រេច៕

អត្ថបទ៖ ប្រុញ វិធិន