មន្ត្រីអត្តសញ្ញាណកម្មខេត្តក្រចេះ ពន្លឿន​ប្រសិទ្ធភាព​ការងារ​​ផ្តល់​សេវាដល់ពលរដ្ឋ

មន្ត្រីជំនាញអត្តសញ្ញាណកម្មនៃស្នងការដ្ឋាននគរបាលខេត្តក្រចេះ បាននិងកំពុងបន្តសកម្មភាពពន្លឿនប្រសិទ្ធភាពការងារ​ក្នុងការបម្រើសេវាសាធារណៈជូនពលរដ្ឋ។

យោងតាមការឱ្យដឹងរបស់ស្នងការរដ្ឋាននគរបាលខេត្តក្រចេះ នាថ្ងៃទី១៩ ខែមិថុនា ឆ្នាំ២០២៥ នេះ បានឱ្យដឹងថា សកម្មភាពការងាររបស់នគរបាលការងារជំនាញអត្តសញ្ញាណកម្មនៃស្នងការដ្ឋាន និងនៅតាមបណ្ដាអធិការដ្ឋាននគរបាលក្រុង-ស្រុក ទូទាំងខេត្តក្រចេះ បាននិងកំពុងបន្តសកម្មភាព ពន្លឿនប្រសិទ្ធភាពការងារក្នុងការបម្រើសេវាសាធារណៈជូនប្រជាពលរដ្ឋក្នុងមូលដ្ឋាន ដូចជា ការចុះថត និងនាំយកអត្តសញ្ញាណប័ណ្ណសញ្ជាតិខ្មែរ ក៏ដូចជា សៀវភៅគ្រួសារ និងសៀវភៅស្នាក់នៅ ដែលបានធ្វើរួចតាមរយៈប៉ុស្តិ៍នគរបាលរដ្ឋបាល នាំយកជូនពលរដ្ឋដល់តាមខ្នងផ្ទះ។

ទន្ទឹមនឹងនោះ ប៉ុស្ដិ៍នគរបាលរដ្ឋបាលដារ ក៏បានជូនដំណឹងដល់បងប្អូនប្រជាពលរដ្ឋ ដែលមានអាយុចាប់ពី ១៥​ ឆ្នាំឡើងទៅ មិនទាន់មានអត្តសញ្ញាណប័ណ្ណសញ្ជាតិខ្មែរគំរូថ្មីប្រើប្រាស់ ឬអត្តសញ្ញាណប័ណ្ណដែលផុតសុពលភាព មកធ្វើអត្តសញ្ញាណប័ណ្ណ នៅប៉ុស្តិ៍នគរបាលរដ្ឋបាលដារ ដែលមានរយៈពេល ចំនួន ០២ថ្ងៃ ចាប់ពីថ្ងៃទី ០៣ ដល់ ០៤ ខែកក្កដា ឆ្នាំ២០២៥ រៀងរាល់ម៉ោងធ្វើការ។ ដោយភ្ជាប់មកជាមួយនូវឯកសារសេចក្ដីចម្លងសំបុត្រកំណើត​ ឬ​ សេចក្ដីចម្លងសំបុត្របញ្ជាក់កំណេីត, សៀវភៅស្នាក់នៅ ឬ សៀវភៅគ្រួសារ, អត្តសញ្ញាណប័ណ្ណហួសសុពលភាព។

ប៉ុស្ដិ៍នគរបាលរដ្ឋបាលដារ បានបញ្ជាក់ថា ការធ្វើអត្តសញ្ញាណប័ណ្ណ មិនមានការបង់ប្រាក់ទេ៕

អត្ថបទ៖ ប្រុញ វិធិន