ពលរដ្ឋគាំទ្រការបង្ក្រាបទំនិញគេចពន្ធពីប្រទេស ថៃ និងស្នើឲ្យរឹតបន្តឹងខ្ពស់លើការនាំចូល

ប្រជាពលរដ្ឋបានសម្តែងការគាំទ្របំផុតចំពោះការបង្ក្រាបទំនិញគេចពន្ធមកពីប្រទេសថៃ និងបានស្នើរឲ្យសមត្ថកិច្ច និងអាជ្ញាធរពាក់ព័ន្ធ មេត្តាជួយរឹតបន្តឹងខ្ពស់លើការនាំចូលទំនិញដោយខុសច្បាប់ពីប្រទេសជិតខាងផងដែរ។

លោក ព្រុំ ស៉ីថា ជាប្រជាពលរដ្ឋលើកឡើងថា ការបង្ក្រាបទំនិញគេចពន្ធ ឬទំនិញខូចគុណភាពវាជាផ្នែកសំខាន់ និងជាលទ្ធផលវិជ្ជមានសម្រាប់ប្រជាជន និងសង្គមជាតិ ប៉ុន្តែកត្តាកាន់តែសំខាន់ជាងនោះ គឺការទប់ស្កាត់ឲ្យបាននូវការនាំចូល ទើបជារឿងដែលកាន់តែប្រសើរបំផុត ពិសេសទំនិញដែលនាំចូលមកពីប្រទេសថៃ ខណៈដែលកម្ពុជា និងថៃ កំពុងនៅមានបញ្ហាតានតឹងនៅឡើយលើជម្លោះព្រំដែន ហើយច្រកទ្វារអន្តរជាតិ នៃប្រទេសទាំង០២ ក៏ត្រូវបានបិទទាំងអស់ហើយដែរ។

គួររំលឹកថា ក្នុងរយៈពេល០២ថ្ងៃមកនេះ កម្លាំងអាជ្ញាធរចម្រុះមានកម្លាំងសមត្ថកិច្ចគយ សហការជាមួយកម្លាំងកងរាជអាវុធហត្ថ និងកម្លាំងនគរបាលប្រឆាំងបទល្មើសសេដ្ឋកិច្ច រួមទាំងមន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ ( ក.ប.ប ) បានចុះធ្វើការត្រួតពិនិត្យឃ្លាំងស្តុកទំនិញធំៗចំនួន០៣ទីតាំង ស្ថិតក្នុងភូមិសាស្ត្រខណ្ឌចំនួន០៣ មានខណ្ឌឬស្សីកែវ ,ខណ្ឌព្រែកព្នៅ និងខណ្ឌមានជ័យ ដើម្បីធ្វើការពិនិត្យទំនិញដែល​លួចនាំចូលមកពីប្រទេសថៃ។

ក្នុងរង្វង់ប្រតិបត្តិការនៃការចុះពិនិត្យទីតាំងទាំង០៣ខាងលើ កម្លាំងចម្រុះ រកឃើញថាមានទំនិញរាប់សិបតោន ភាគច្រើនជាសាច់បង្កកក្លាសេ និងប្រហិត ដែលលួចលាក់នាំចូលពីប្រទេសថៃ ដោយទំនិញខ្លះបានបង់ពន្ធ តែទំនិញខ្លះមិនមានការបង់ពន្ធចូលរដ្ឋនោះឡើយ។ ហើយចំពោះគុណភាពទំនិញ ក្រុមមន្ត្រីជំនាញ ក.ប.ប បានយកសំណាកទៅពិនិត្យនៅមន្ទីរពិសោធន៍ ដើម្បីកំណត់ឲ្យច្បាស់ថា ទំនិញទាំងអស់មានសារធាតុគីមី ប៉ះពាល់ដល់សុខភាពពលរដ្ឋអ្នកប្រើប្រាស់ ឬយ៉ាងណានោះ ត្រូវរង់ចាំលទ្ធផលជាមុនសិន មុនឈានដល់ការមានវិធានការបន្តបន្ទាប់៕

អត្ថបទ៖ សុភា