មន្រ្តីបសុពេទ្យខេត្តបន្ទាយមានជ័យ បង្ក្រាបករណីលួចនាំសត្វគោឆ្លងដែនពីប្រទេស​ថៃ​ខុសច្បាប់៤៥ក្បាល

ទោះជាព្រំដែនកម្ពុជា ថៃ តានតឹង និងបានបិទទាំងស្រុងយ៉ាងណាក៏ដោយ ក៏ឈ្មូញកម្ពុជា ថៃ មួយចំនួននៅតែអាចលួចលាក់នាំសត្វគោពីប្រទេសថៃឆ្លងដែនចូលកម្ពុជាបានក្នុងភូមិសាស្រ្កខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងកាលពីព្រឹកថ្ងៃទី២៦ ខែកុម្ភៈ ឆ្នាំ២០២៦ ក្រុមអន្តរាគមន៍ការិយាល័យ បសុពេទ្យខេត្តបន្ទាយមានជ័យដឹកនាំដោយលោក ហ៊ុយ ទូច ប្រធានការិយាល័យបសុពេទ្យ សហការជាមួយនគរបាលស្រុកស្វាយចេក ក្រោមកិច្ចសម្របសម្រួលនីតិវិធីពីលោក ស វុទ្ធី ព្រះរាជអាជ្ញារង អយ្យការអមសាលាដំបូងខេត្តបន្ទាយមានជ័យ បានចុះធ្វើអធិការកិច្ចនៅដីឡូត៍មួយកន្លែង ផ្ទុកសត្វគោសរុប ៥៩ក្បាល (គោថៃ ៤៥ក្បាល និងគោខ្មែរ ១៤ក្បាល) ដែលមានម្ចាស់ទីតាំងឈ្មោះ យួង សុខ ស្ថិតក្នុងភូមិថ្មគោល ឃុំផ្គាំ ស្រុកស្វាយចេក ខេត្តបន្ទាយមានជ័យ។

បើតាមការបញ្ជាក់ពីឈ្មោះ យួង សុខ គឺគាត់បានប្រមូលទិញនៅក្នុងស្រុក ១៤ក្បាល និងនាំចូលពីប្រទេសថៃ តាមច្រករបៀងនានានៅក្នុងមូលដ្ឋានឃុំគោករមៀត និងឃុំបន្ទាយឆ្មា ដឹកតាមគោយន្តកន្រ្ទៃម្តងពីរទៅបីក្បាល ហើយលក់បន្តអោយឈ្មួញមកប្រមូលយកទៅខេត្តកំពង់ចាម តាមរថយន្ត ១គ្រឿងម៉ាក V1 ដែលត្រៀមដឹកគោនៅនឹងផ្ទះគាត់ស្រាប់។

លោក ហ៊ុយ ទូច ប្រធានការិយាល័យបសុពេទ្យបានអោយដឹងថា សមត្ថកិច្ចចម្រុះ ក្រោមការបញ្ជាផ្ទាល់ពីលោកព្រះរាជអាជ្ញារង គឺត្រូវនាំយកវត្ថុតាងសត្វគោចំនួន ៤៥ក្បាល (ជាគោថៃ) ទៅរក្សាទុកនៅការិយាល័យផលិតកម្ម និងបសុព្យាបាល ដើម្បីចាត់ការតាមនីតិវិធីច្បាប់ជាបន្តទៀត ដោយឡែក គោខ្មែរ ១៤ក្បាលទៀត សមត្ថកិច្ចប្រគល់ជូនម្ចាស់គាត់ដើម្បីរក្សាទុក៕

អត្ថបទ៖ អពៅ