ករណីឆបោកអនឡាញ និងនាំទំនិញគេចពន្ធនៅស្ទឹងត្រែង ជនសង្ស័យ ៤នាក់ត្រូវឃុំខ្លួន ខណៈអ្នក​ពាក់ព័ន្ធសមត្ថកិច្ច​កំពុង​ស្រាវជ្រាវ

សាលាដំបូងខេត្តស្ទឹងត្រែង បានចេញសេចក្តីប្រកាសព័ត៌មាន ស្តីពីការចាត់ការលើសំណុំរឿងពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យា (Online Scams) សមគំនិតក្នុងអំពើឆបោក និងការលួចនាំចេញ-ចូលទំនិញគេចពន្ធ។

តាមសេចក្តីប្រកាស បានឲ្យដឹងថា កាលពីថ្ងៃទី១២ ខែឧសភា ឆ្នាំ២០២៦ សាលាដំបូងខេត្តស្ទឹងត្រែង បានទទួលសំណុំរឿងព្រហ្មទណ្ឌលេខ ២០០ ចុះថ្ងៃទី១១ ខែឧសភា ឆ្នាំ២០២៦ ពាក់ព័ន្ធនឹងបទល្មើសខាងលើ ដែលបានប្រព្រឹត្តនៅ​កម្ពុជា ចាប់ពីឆ្នាំ២០១៧ រហូតដល់ថ្ងៃទី៩ ខែឧសភា ឆ្នាំ២០២៦។

ក្នុងសំណុំរឿងនេះ មានជនសង្ស័យជាច្រើននាក់ រួមមានជនជាតិចិនម្នាក់ និងបក្ខពួកជនជាតិខ្មែរ ដែលខ្លះត្រូវបានឃាត់ខ្លួន ខ្លះកំពុងគេចខ្លួន។ បទល្មើសពាក់ព័ន្ធនឹងការឆបោកតាមអនឡាញ សមគំនិតក្នុងអំពើឆបោក និងការលួចនាំចេញ-ចូលទំនិញគេចពន្ធ តាមបទប្បញ្ញត្តិនៃក្រមព្រហ្មទណ្ឌ និងច្បាប់ពាក់ព័ន្ធ។

ប្រតិបត្តិការបង្ក្រាបត្រូវបានអនុវត្តកាលពីថ្ងៃទី៩ ខែឧសភា ឆ្នាំ២០២៦ ដោយកម្លាំងសមត្ថកិច្ចរួមមាន មន្ត្រីគយ និងរដ្ឋាករ កងរាជអាវុធហត្ថ និងនគរបាលខេត្តស្ទឹងត្រែង ក្រោមការសម្របសម្រួលពីតំណាងអយ្យការ បានចុះបង្ក្រាបទីតាំងក្រុមហ៊ុនមួយនៅក្រុងស្ទឹងត្រែង។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាងជាច្រើន រួមមាន បារី និងស្រាចម្រុះម៉ាក ឧបករណ៍អេឡិចត្រូនិកជាច្រើនប្រភេទ ដូចជា កុំព្យូទ័រ ទូរស័ព្ទដៃ អាយផេដ និងឧបករណ៍បណ្ដាញអ៊ីនធឺណិតជាដើម ព្រមទាំងបានឃាត់ខ្លួនជនសង្ស័យជនជាតិខ្មែរចំនួន ៤ នាក់។

តាម​ប្រភពព័ត៌មាន​ដែ​លទទួលបាន ​​គ្រប់មុខទំនិញ​ខុសច្បាប់ដូចរាយនាម​​ខាងលើ​​​បាន​ដឹ​កជញ្ជូ​ន​មកពីភ្នំពេញ ចុះ​ហេតុ​អ្វី​សមត្ថកិច្ចចម្រុះ​តាម​គោល​ដៅ​ក្នុងខេត្តនីមួយ​ៗ ​មិនមាន​ចំណាត់​ការ​បង្រ្កាប​លើ​មុខ​ទំនិញ​​ទាំង​​នេះ ​​ឬមួយ​មាន​អាថ៌កំបាំង​អ្វីម្យ៉ាង?​​

បន្ទាប់ពីសួរចម្លើយ និងពិនិត្យភស្តុតាង ចៅក្រមស៊ើបសួរ បានសម្រេចឃុំខ្លួនជាបណ្តោះអាសន្នលើជនសង្ស័យ ៤ នាក់ ដើម្បីបន្តនីតិវិធីស៊ើបអង្កេត ខណៈបក្ខពួក និង​អ្នកពាក់ព័ទ្ធផ្សេងទៀត នឹងត្រូវ​វែកមុខ​ចាត់ការបន្តតាមច្បាប់ឱ្យ​ខានតែ​បាន​​ក្នុងពេល​ឆាប់ៗ​នេះ៕