អាជ្ញាធរស្រុកម៉ាឡៃ ឆ្មក់បង្ក្រាបការលួច​នាំបារីឆ្លងដែនខុសច្បាប់ចូលដីថៃ ដកហូតបារីរាប់ពាន់កញ្ចប់ និងម៉ូតូ៦គ្រឿង

រដ្ឋបាលស្រុកម៉ាឡៃ ដឹកនាំកម្លាំងសមត្ថកិច្ចចម្រុះឆ្មក់បង្ក្រាបករណីលួចដឹកជញ្ជូនបារីបម្រុងឆ្លងដែនខុសច្បាប់ទៅកាន់ប្រទេសថៃ ដោយបានដកហូតបារីជាច្រើនប៊ិច និងម៉ូតូចំនួន៦គ្រឿង ខណៈក្រុមអ្នកដឹកជញ្ជូនបានរត់គេចខ្លួនចូលព្រៃបាត់អស់កាលពីវេលាម៉ោង១៩និង៥១នាទីយប់ ថ្ងៃទី២៧ ខែឧសភា ឆ្នាំ២០២៦ នៅចំណុចចម្ការត្រង៉ែនមួយកន្លែង ស្ថិតក្នុងភូមិល្វា ឃុំបឹងបេង ស្រុកម៉ាឡៃ ខេត្តបន្ទាយមានជ័យ។

លោក ស្វាយ ជា អភិបាលស្រុកម៉ាឡៃ បានអោយដឹងថា ដោយមានការស្រាវជ្រាវយ៉ាងយកចិត្តទុកដាក់លើការ​បង្រ្កាប​បទល្មើសតាមព្រំដែន និងដោយមានការសហការពីកម្លាំងនគរបាលការពារព្រំដែនគោកលេខ ៨១៥ កងពលតូចលេខ ៥១ និងកងពលតូចលេខ ៥៣ឈានដល់ការបង្រ្កាបបាននៅបារីខាងលើ។ ក្នុងពេលចុះបង្ក្រាប ក្រុមអ្នកដឹកជញ្ជូនបានភ័យស្លន់ស្លោរត់គេចខ្លួនចូលព្រៃ ដោយបន្សល់ទុកវត្ថុតាងនៅកន្លែងកើតហេតុ រួមមាន ម៉ូតូចំនួន៦គ្រឿង និងបារីឆ្លងដែនខុសច្បាប់ចំនួន ២៦ប៊ិច និង ៣២ការ៉ុង។

ក្រោយការបង្រ្កាបសមត្ថកិច្ចយកទៅរក្សាទុកនៅទីបញ្ជាការវរសេនាតូចការពារព្រំដែនគោកលេខ ៨១៥ និងបន្តបញ្ជូនទៅអធិការស្រុកដើម្បីកសាងសំណុំរឿង និងចាត់ការតាមនីតិវិធីច្បាប់។

តាមសមត្ថកិច្ចបានបង្ហើបអោយដឹងថា តាមការស្រាវជ្រាវឈ្មួញជួញដូរបារីនេះមានទីតាំងនៅស្រុកសំពៅលូនបានដឹកជញ្ជូនបារីពីស្រុកសំពៅលូនបម្រុងចេញទៅថៃតាមស្រុកម៉ាឡៃ។ ជុំវិញករណីនេះ ប្រជាពលរដ្ឋបានសម្ដែងការគាំទ្រចំពោះវិធានការរបស់សមត្ថកិច្ច និងស្នើឲ្យអាជ្ញាធរពាក់ព័ន្ធបន្តស៊ើបអង្កេតស្វែងរកអ្នកនៅពីក្រោយសកម្មភាពរត់ពន្ធបារីខុសច្បាប់នេះ ដើម្បីយកមកផ្តន្ទាទោសតាមច្បាប់៕

អត្ថបទ៖ អពៅ