Barcelona ចុចឈ្មោះខ្សែប្រយុទ្ធម្នាក់ជាគោលដៅធំ ក្រោយ Lewandowski សម្រេចចិត្តចាកចេញ

ក្លិបអ្នកមានបុណ្យ FC Barcelona បានត្រៀមផែនការនាំយកខ្សែប្រយុទ្ធ Julian Alvarez របស់ Atletico Madrid ដើម្បីមកជំនួស Robert Lewandowski ក្រោយខ្សែប្រយុទ្ធសញ្ជាតិ ប៉ូឡូញ វ័យ ៣៧ ឆ្នាំរូបនេះ សម្រេចចិត្តចាកចេញពីទឹកដី Camp Nou នៅចុងបញ្ចប់រដូវកាល ២០២៥-២០២៦ ។

Lewandowski បានលេងនៅ Barcelona ៤ រដូវកាលហើយ ពោលតាំងពីរដូវកាល ២០២២-២០២៣ មក បន្ទាប់ពីចាកចេញពី Bayern Munich។ កីឡាករនឹងអស់សុពលភាពកិច្ចសន្យាជាមួយក្រុមអ្នកមានបុណ្យនៅខែ មិថុនា ឆ្នាំ ២០២៦ ប៉ុន្តែយោងតាមសារព័ត៌មាន BBC Sport បានឱ្យដឹង ថា អតីតខ្សែប្រយុទ្ធ Bayern Munich នឹងមិនបន្តកិច្ចសន្យាថ្មីឡើយ ដោយសម្រេចចិត្តចាកចេញនៅចុងបញ្ចប់រដូវកាលនេះ។

បច្ចុប្បន្ន Lewandowski កំពុងត្រូវបានគេចាត់ទុក ជាវីបុរសមួយរូបរបស់ក្លិប ដោយសាររូបគេជាកីឡាករមានឆន្ទៈខ្ពស់មួយរូប ដែលបានមកជួយ Barcelona អំឡុងពេលស្ថិតក្នុងគ្រាដ៏លំបាក។ ក្នុងការលេងនៅ Barcelona ៤ ឆ្នាំមកនេះ ខ្សែប្រយុទ្ធសញ្ជាតិ ប៉ូឡូញ រកបាន ១១៨ គ្រាប់ ពីការលេង ១៨៨ ប្រកួត។ ជាមួយគ្នានេះ កីឡាករបានឈ្នះពាន La Liga ២ លើក, Copa del Rey ១ លើក និង Spanish Super Cup ៣ លើក។

ក្រោយមានព័ត៌មានច្បាស់ការ អំពីការចាកចេញរបស់ Lewandowski ក្លិប Barcelona ក៏បានត្រៀមផែនការរួចរាល់ផងដែរ ដោយបានកំណត់មុខសញ្ញាលើខ្សែប្រយុទ្ធក្រុម Atletico Madrid កីឡាករ Julian Alvarez ជាគោលដៅផ្ទេរធំបំផុតរបស់ពួកគេ។​ ទោះបីជាយ៉ាងណា នៅក្នុងខណៈពេលនេះ Barcelona កំពុងជួបបញ្ហាធំមួយ គឺរឿងតម្លៃ ដោយសារ At Madrid ដាក់តម្លៃខ្ពស់ខ្លាំង រហូតដល់ទៅ ១៤០.៩១ លានដុល្លារអាមេរិកឯណោះ៕

ប្រែសម្រួល៖ សេម កុសល
ប្រភព៖ GOAL