At Madrid ដាក់តម្លៃលក់ Alvarez ទៅ Barcelona ក្នុងតម្លៃថ្លៃបំផុតទី ២ បន្ទាប់ពី Neymar

ក្លិបអ្នកមានបុណ្យ FC Barcelona បានជ្រើសរើសខ្សែប្រយុទ្ធ Julian Alvarez ជាគោលដៅអាទិភាពចម្បង ដើម្បីជំនួសខ្សែប្រយុទ្ធចាស់វស្សា Robert Lewandowski ប៉ុន្តែបច្ចុប្បន្នកំពុងជាប់គាំង បន្ទាប់ពីលេចឮក្លិប Atletico Madrid បានកំណត់តម្លៃលក់កីឡាកររូបនេះរហូតដល់ទៅ ២៣៦ លានដុល្លារអាមេរិក។

យោងតាមសារព័ត៌មាន GOAL បានឱ្យដឹង ថា ភាគី Barcelona បានស៊ើបសួរព័ត៌មានមួយចំនួនអំពី Alvarez នៅ At Madrid ប៉ុន្តែអ្វី ដែលទទួលបានមកវិញ គឺ At Madrid បានកំណត់តម្លៃដាក់លក់ខ្សែប្រយុទ្ធសញ្ជាតិ អាហ្សង់ទីន រូបនេះក្នុងតម្លៃ ២៣៦ លានដុល្លារអាមេរិក។ ចំនួននេះ ត្រូវបានគេដឹង ថា មានតម្លៃថ្លៃបំផុតទី ២ បន្ទាប់ពី Neymar ដែលការផ្ទេរពី Barcelona ទៅ PSG ក្នុងឆ្នាំ ២០១៧ មានតម្លៃ ២៦២ លានដុល្លារអាមេរិក។

Barcelona បានមើលឃើញ Alvarez ជាផែនការរយៈពេលវែងរបស់ក្លិប ដោយសារតែសមត្ថភាពពូកែបត់បែនរបស់គេ ស្របតាមការចង់បានរបស់នាយកផ្នែកកីឡាលក់ Deco។ ទោះបីជាយ៉ាងណា បញ្ហាហិរញ្ញវត្ថុរបស់ក្លិប នៅតែជារបាំងធំលើការផ្ទេរនេះ ហើយជាមួយគ្នានេះ La Liga ក៏កំពុងរឹតដ្បិតលើការចាយវាយរបស់ក្លិបនៅតំបន់ កាតាឡាន់ មួយនេះផងដែរ។

គួរឱ្យដឹងផងដែរ ថា បច្ចុប្បន្នមានក្លិបនៅ Premier League មួយចំនួន កំពុងតែតាមដានស្ថានភាពរបស់ Alvarez ដូច Barcelona ដែរ។ ទោះបីជាយ៉ាងណាក៏ដោយ កីឡាករ អាហ្សង់ទីន វ័យ ២៦ ឆ្នាំរូបនេះ ត្រូវបានគេរាយការណ៍ថារូបគេ ចង់នៅលេងនៅប្រទេសអេស្ប៉ាញ បន្តទៀត។ ករណីប្រសិនបើកីឡាករចាកចេញពិតមែន គឺគេចង់ចូលរួមជាមួយ Barcelona តែ ១ គត់៕

ប្រែសម្រួល៖ សេម កុសល
ប្រភព៖ GOAL