កីឡា

អេលីត ពិសិដ្ឋ ក្លឹបថ្មីវិន័យប៉ុណ្ណឹងមិនពិបាកសម្រាប់ខ្លួនទេ ខណៈការស្នាក់នៅហ្វឹកហាត់គឺអំណោយផលល្អ

បានផុស

២ ខែ មុន

នៅ

ថ្ងៃចន្ទ ៤ ឧសភា ២០២៦

ដោយ

កីឡាករ អេលីត ពិសិដ្ឋ ថាការមករស់នៅក្លឹបថ្មីស្របស្រឿយគុនខ្មែរជាមួយលោក ស៊ន អេលីត នេះគឺមិនមានចោទជាការលំបាកអ្វីនោះទេសម្រាប់រូបគេទាំងវិន័យក្នុងក្លឹប និងការស្នាក់នៅហូបចុក ឬការហ្វឹកហាត់ផ្សេងៗនោះអំណោយផលល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ អេលីត ពិសិដ្ឋ

អ្នកប្រដាល់ដើមកំណើតពីខេត្តស្វាយរៀង អេលីត ពិសិដ្ឋ បានឲ្យដឹងថា មកដល់ពេលនេះរូបគេបានរួមរស់ជាមួយក្លឹបថ្មីបានជាច្រើនខែមកនេះគឺសុាំទៅហើយ និងមិនមានការលំបាកអ្វីនោះទេ។ ចំពោះវិន័យក្នុងក្លឹបគឺមិនមានជាការលំបាកអ្វីសម្រាប់ខ្លួននោះទេ ពោលពេលប្រកួតចប់អាចសុំច្បាប់សម្រាក ១-២ថ្ងៃបានជាធម្មតា។ ការដើរលេងផ្ដេសផ្ដាសគឺមិនអនុញ្ញាតនោះឡើយ។

កីឡាករវ័យ ២៦ឆ្នាំរូបនេះបន្ថែមទៀតថា បរិយាកាសហ្វឹកហាត់គឺអំណោយផលល្អ ដូចជាមានគ្រូៗច្រើនចាំជួយបង្ហាត់បង្ហាញ និងមានកីឡាករតូច-ធំច្រើនក្នុងក្លឹបដែលងាយស្រួលនៅពេលត្រូវឡាំងគ្នាជាដើម។ លើសពីនេះមានបរទេសក៏ច្រើនទៀតដែលវាធ្វើឲ្យកីឡាករម្នាក់ៗបានដកស្រង់បទពិសោធពីគ្នាទៅវិញទៅមក។

កីឡាករ អេលីត ពិសិដ្ឋ

អេលីត ពិសិដ្ឋ លើកឡើងទៀតថា ត្រឹមរយៈពេល ១-២សប្ដាហ៍ដំបូងប៉ុណ្ណោះគឺរូបគេអាចសម្របខ្លួន ឬសុាំជាមួយការហ្វឹកហាត់នៅទីនោះទៅហើយ ព្រោះរូបគេជាអ្នកស្រឡាញ់ការហ្វឹកហាត់ដែរ។ ចំពោះច្បាប់ទម្លាប់ផ្សេងៗនោះមិនមានជាការលំបាកឡើយប៉ុណ្ណឹងនោះ។ ធម្មតាការច្បាប់របស់គ្រូដាក់មកគឺចង់ឲ្យសិស្សល្អ និងដើរផ្លូវត្រឹមត្រូវឆ្ពោះទៅរកភាពជោគជ័យតែប៉ុណ្ណោះ។ ក្នុងនាមជាកីឡាករមួយរូបត្រូវតែខំប្រឹងហ្វឹកហាត់ និងមិនត្រូវដើរលេងផ្ដេសផ្ដាសច្រើននោះឡើយ ព្រោះវាប៉ះពាល់ដល់សមត្ថភាពផងដែរ។ ដូច្នេះហើយស្របទៅនិងខ្លួនឯងជាអ្នកខំប្រឹងផង និងមិនសូវចូលចិត្តដើរច្រើនផងទើបមិនមានជាការលំបាកអ្វីឡើយចំពោះវិន័យក្លឹបទាំងនេះ។

រូបភាពលើផេក Srab Sroeuy Kun khmer

បញ្ជាក់ដែរថា អេលីត ពិសិដ្ឋ ជាកីឡាករក្នុងក្លឹបប្រដាល់ស្របស្រឿយគុនខ្មែររបស់លោក ស៊ន អេលីត។ រូបគេទើបតែមករួមរស់ជាមួយក្លឹបថ្មីនេះបានប្រហែលមួយឆ្នាំប៉ុណ្ណោះ។ ការចូលក្នុងកាន់ក្លឹបថ្មីនេះគេសង្កេតឃើញថា អេលីត ពិសិដ្ឋ មានឱកាសបានឡើងប្រកួតច្រើនជាងមុន និងមានសមត្ថភាពរីកចម្រើនប្លែកពីមួយប្រកួតទៅមួយប្រកួតផងដែរ៕