កីឡា

ក្រុមណាឡើងវគ្គផ្តាច់ព្រ័ត្រ វិសាខា ប៉ះ ស្នងការភ្នំពេញ ខណៈ អង្គរក្ស ប៉ះ ស្នងការស្វាយរៀង រសៀលនេះ?

បានផុស

១ minute មុន

នៅ

ថ្ងៃពុធ ១ កក្កដា ២០២៦

ដោយ

ការប្រកួតកីឡាបាល់ទះតេជោលីគ រដូវកាលទី៣ ឈានដល់វគ្គពាក់កណ្តាលផ្តាច់ព្រ័ត្រ នារសៀល ថ្ងៃពុធ ទី១ ខែកក្កដា នេះហើយ ដែលជាការប្រកួតរវាង វិសាខា ជាមួយ ស្នងការរាជធានីភ្នំពេញ វេលាម៉ោង ៣ រសៀល និង ក្រុមបញ្ជាការដ្ឋានអង្គរក្ស ជាមួយ ស្នងការខេត្តស្វាយរៀង វេលាម៉ោង ៥ ល្ងាច នៅសាលពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនឈានដល់វគ្គពាក់កណ្តាលផ្តាច់ព្រ័ត្រ វិសាខា ធ្វើបានល្អនៅជុំទី២ បន្ទាប់ពីរៀបចំខ្លួនគួរឲ្យចាប់អារម្មណ៍។ កាលពីជុំទី១ វិសាខា ស្ថិតនៅលេខ ២ ពីការប្រកួតឈ្នះ ៥ និងចាញ់ ២។ ចំណែក ស្នងការរាជធានីភ្នំពេញ កាលពីជុំទី១ ឈ្នះ ៤ និងចាញ់ ៣ ស្ថិតនៅលេខ ៤ ។

ឈានចូលជុំទី២ វិសាខា ឈ្នះទាំង ៥ ប្រកួត ឈរលើកំពូលតារាង ខណៈ ស្នងការរាជធានីភ្នំពេញ បានឈ្នះ ២ និងចាញ់ ៣ ស្ថិតនៅលេខ ៤ ដើម្បីឡើងវគ្គពាក់កណ្តាលផ្តាច់ព្រ័ត្រ។

ប្រវត្តិជួបគ្នា ២ លើក ក្នុងរដូវកាលនេះ វិសាខា បានឈ្នះ ស្នងការរាជធានីភ្នំពេញ ទាំង ២ លើកគឺ ឈ្នះ ៣-០ នៅជុំទី១ និងឈ្នះ ៣-១ នៅជុំទី២។

វិសាខា ផ្លាស់ប្តូរកីឡាករបរទេសស្ទើរទាំងអស់ក្រោយចប់ជុំទី១ ដោយរក្សាទុកដៃប៉ះសេសញ្ជាតិហ្វីលីពីន Retamar និងនាំចូលដៃប៉ះសេបារាំង Simon Gill, ស្មាត់បារាំង Gempin ស្មាត់អាមរិក Kobrine និង អ្នកការពារកណ្តាលប្រេស៊ីល Renan ព្រមទាំងស្មាត់កម្ពុជា វឿន វាសនា ដែលធ្វើឲ្យពួកគេខ្លាំង។ ចំណែក ស្នងការរាជធានីភ្នំពេញ ប្រើប្រាស់កីឡាករខ្មែរសុទ្ធ។

កីឡាករបរទេសទាំង ៣ នាក់របស់ ស្នងការខេត្តស្វាយរៀង

នៅវេលាម៉ោង ៥ ល្ងាចនេះគឺជាការប្រកួតគួរឲ្យចាប់អារម្មណ៍បំផុតរវាងក្រុមលេខ ២ បញ្ជាការដ្ឋានអង្គរក្ស និងក្រុមលេខ ៣ ស្នងការខេត្តស្វាយរៀង។ វាជាជំនួបសងសឹកសម្រាប់ ក្រុមស្នងការខេត្តស្វាយរៀង ដោយសារជួបគ្នា ២ ក្នុងរដូវកាលនេះគឺចាញ់ ៣-១ នៅជុំទី១ និងចាញ់ ៣-០ នៅជុំទី២។

កាលពីជុំទី១ បញ្ជាការដ្ឋានអង្គរក្ស ធ្វើបានយ៉ាងល្អដោយឈ្នះទាំង ៧ ប្រកួត ស្ថិតនៅកំពូលតារាង ប៉ុន្តែឈានចូលជុំទី២ ពួកគេបានឈ្នះ ៤ និងចាញ់ ១ ស្ថិតនៅលេខ២។ ចំណែកស្នងការខេត្តស្វាយរៀង វិញ កាលពីជុំទី១ ឈ្នះ ៤ និងចាញ់ ៣ ស្ថិតនៅលេខ ៥ ប៉ុន្តែចូលជុំទី ២ ធ្វើបានល្អដោយឈ្នះ ៣ និងចាញ់ ២ ស្ថិតនៅលេខ ៣។

ក្រោយចប់ជុំទី១ បញ្ជាការដ្ឋានអង្គរក្ស បានបន្ថែមដៃប៉ះសេសញ្ជាតិឥណ្ឌូណេស៊ី Nizar Julfikar និងស្មាត់ស្តាំ Dimas Saputra បន្ថែមលើកីឡាករឥណ្ឌូណេស៊ីដែលមាន ៣ នាក់ស្រាប់។ ចំណែក ស្នងការខេត្តស្វាយរៀង បាននាំចូលកីឡាករបរទេសម្នាក់ប៉ុណ្ណោះគឺកីឡាករទុយនីស៊ី Marouan Belhaj Salah បន្ថែមលើកីឡាករអាមេរិក Jalen Penrose និងស្មាត់ឥណ្ឌា Praful។