កីឡា

ម្ចាស់ផ្ទះធ្លាក់អស់ ២ ខណៈក្រុមមកពីអឺរ៉ុប បង្ហាញភាពខ្លាំងឡើងវគ្គ ៨ ក្រុមនៅ World Cup 2026

បានផុស

១ ម៉ោង មុន

នៅ

ថ្ងៃចន្ទ ៦ កក្កដា ២០២៦

ដោយ

ត្រឹមព្រឹកថ្ងៃទី៦ ខែកក្កដា ឆ្នាំ ២០២៦ ព្រឹត្តិការណ៍បាល់ទាត់ពិភពលោក World Cup 2026 រកឃើញ ៤ ក្រុមហើយឡើងវគ្គ ៨ ក្រុមចុងក្រោយគឺ បារាំង ម៉ារ៉ុក ន័រវែស និងអង់គ្លេស។ ក្នុងចំណោម ៤ ក្រុមនេះគឺ មាន ៣ ក្រុមមកពីតំបន់អឺរ៉ុប គឺ បារាំង ន័រវែស និង អង់គ្លេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បារាំង បានឈ្នះ ប៉ារ៉ាហ្គាយ ដោយលទ្ធផល ១-០ នៅវគ្គ ១៦ ក្រុមចុងក្រោយ ហើយ ម៉ារ៉ុក បានឈ្នះ កាណាដា ដោយលទ្ធផល ៣-០។ បារាំង និង ម៉ារ៉ុក ត្រូវជួបគ្នានៅវគ្គ ៨ ក្រុមចុងក្រោយ។

ជាមួយគ្នានេះ ក្រុមជម្រើសជាតិ ន័រវែស បានយកឈ្នះ ប្រេស៊ីល ដោយលទ្ធផល ២-១ នៅវគ្គ១៦ ក្រុមចុងក្រោយ ហើយ អង់គ្លេស បានយកឈ្នះ ម៉ិកស៊ិក ដោយលទ្ធផល ៣-២។ ន័រវែស និងអង់គ្លេស ត្រូវជួបគ្នានៅវគ្គ ៨ ក្រុមចុងក្រោយ។

នៅសល់ ៤ ក្រុមទៀតសម្រាប់វគ្គ ៨ ក្រុមចុងក្រោយ រវាង ក្រុម អាហ្សង់ទីន ប៉ះ អេហ្ស៊ីប និង ស្វីស ប៉ះ កូឡូប៊ី ហើយ ព័រទុយហ្កាល់ ប៉ះ អេស្ប៉ាញ និង បែលហ្ស៊ិក ប៉ះ អាមេរិក។ នៅមានក្រុមមកពីអឺរ៉ុបជាច្រើនទៀតដែលនៅមានឱកាសឡើងវគ្គ ៨ ក្រុមចុងក្រោយគឺ អេស្ប៉ាញ ព័រទុយហ្គាល់ បែលហ្ស៊ិក និង ស្វីស។

ចំណែក ក្រុមម្ចាស់ផ្ទះវិញមានពីរហើយបានធ្លាក់គឺ កាណាដា និង ម៉ិកស៊ិក បានធ្លាក់ ដោយនៅសល់តែ សហរដ្ឋអាមេរិក មួយដែលត្រូវប្រកួតជាមួយ បែលហ្ស៊ិក វគ្គ ១៦ ក្រុមចុងក្រោយ។

គិតត្រឹមព្រឹកថ្ងៃទី៦ ខែកក្កដានេះ ការប្រកួតបានដំណើរការចំនួន ៩២ ប្រកួតហើយ ក្នុងនោះកើតមានគ្រាប់បាល់ចំនួន ២៦៩ គ្រាប់។ កីឡាករ ៣ នាក់ រកបាន ៧ គ្រាប់ស្មើគ្នាគឺ Lionel Messi, Kylian Mbappe និង Erly Haaland។ កីឡាករអង់គ្លេស Harry Kane រកបាន ៦ គ្រាប់ និងមានកីឡាករ ៦ នាក់ទៀតរកបាន ៤ គ្រាប់ស្មើគ្នា។ កីឡាករដែលរកបានគ្រាប់បាល់ច្រើនគ្រាប់សុទ្ធតែនៅមានឱកាសប្រជែងពានស្បែកជើងមាស ដោយសារក្រុមរបស់ពួកគេសុទ្ធតែបានឡើងវគ្គ ៨ ក្រុមចុងក្រោយ។

ចំពោះអ្នកទស្សនាផ្ទាល់វិញគឺសរុបចំនួន ៦,០០១,២៧៤ នាក់ ដែលគិតជាមធ្យម ៦៥,២៣១ នាក់ក្នុងមួយប្រកួត។ ចំនួនទស្សនាផ្ទាល់នេះបានកើនឡើងទ្វេដង បើប្រៀបធៀបនឹងកំណត់ត្រាចាស់ កាលពីឆ្នាំ ១៩៩៤ ដែលមានអ្នកទស្សនាសរុបចំនួន ៣,៥៧៨,៥៣៨នាក់៕