កីឡា

សម្តេចតេជោ ហ៊ុន សែន ជូនពរ បារាំង ឈ្នះជើងឯកពិភពលោក ស្របពេល បារាំង ជួប អេស្ប៉ាញ វគ្គ ៤ ក្រុម

បានផុស

២១ វិនាទី មុន

នៅ

ថ្ងៃចន្ទ ១៣ កក្កដា ២០២៦

ដោយ

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធភានៃព្រះរាជាណាចក្រកម្ពុជា បានជូនឲ្យក្រុមបាល់ទាត់ជម្រើសជាតិ បារាំង ឈ្នះជើងឯកបាល់ទាត់ពិភពលោក World Cup ឆ្នាំ២០២៦នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោ ហ៊ុន សែន បានរៀបរាប់កាលពីថ្ងៃអាទិត្យ ទី១២ ខែកក្កដា ឆ្នាំ ២០២៦ ថា ៖«ថ្ងៃនេះខ្ញុំបានជូនសារមួយជូន ម៉ាក្រុង ប្រធានាធិបតីបារាំងរឿងបាល់ទាត់។ (តាំងពីចុងឆ្នាំ២០២២មកប្រធានាធិបតី ម៉ាក្រុង របស់បារាំង និងខ្ញុំតែងឆ្លងឆ្លើយជាមួយគ្នាជាប្រចាំ ទោះខ្ញុំមិនធ្វើជានាយករដ្ឋមន្ត្រីទៀតក៏ដោយ ដែលសារនោះបញ្ជូនទៅមកតាម Whats App)។ សាររបស់ខ្ញុំថ្ងៃនេះក្រៅពីសួរសុខទុក្ខគាត់ និងគ្រួសារ ខ្ញុំបានបង្ហាញនូវជំនឿទុកចិត្តលើក្រុមបាល់ទាត់បារាំង និងជូនពរក្រុមបាល់ទាត់បារាំងទទួលជោគជ័យរហូតលើកពានក្នុងការប្រកួតបាល់ទាត់ពិភពលោកឆ្នាំ២០២៦នេះ។ សាររបស់ខ្ញុំបញ្ចប់ដោយពាក្យ (Vive Les Bleus !!!)។

សម្តេចតេជោបានបញ្ជាក់ថា ៖«រូបថតខ្ញុំលើកពាននេះជារូបភាពដែលកីឡាករបារាំងក្នុងនាម FIFA នាំមកកម្ពុជា និងប្រទេសនានានៅអាស៊ី ឆ្នាំ២០២២។ ឯអាវលេខ ៩ ជាអាវរបស់ខ្ញុំដែលតែងពាក់លេខ ៩ ពេលចូលទាត់បាល់កាលពីពេលមុន»។

ក្រុមមាន់គក បារាំង បានឈានដល់វគ្គពាក់កណ្តាលផ្តាច់ព្រ័ត្រ បន្ទាប់ពីធ្វើបានល្អតាំងពីសន្សំពិន្ទុក្នុងពូលរហូតដល់វគ្គ ៨ ក្រុមចុងក្រោយ។ កាលវគ្គសន្សំពិន្ទុក្នុងពូល បារាំង បានឈ្នះ សេណេហ្គាល់ ៣-១, ឈ្នះ អ៊ីរ៉ាក់ ៣-០ និងឈ្នះ ន័រវែស ៤-១ ដើម្បីឈរលេខ ១ ក្នុងពូល I។

បន្ទាប់មក បារាំង បានទម្លាក់ ស៊ុយអែត នៅវគ្គ ៣២ ក្រុមចុងក្រោយ ដោយគ្រាប់បាល់ជ័យជម្នះ ៣-០ និងបន្តទម្លាក់ ប៉ារ៉ាហ្គាយ នៅវគ្គ ១៦ ក្រុមចុងក្រោយដោយគ្រាប់បាល់ជ័យជម្នះ ១-០ ហើយនៅវគ្គ ៨ ក្រុមចុងក្រោយ ពួកគេបានយកឈ្នះ ម៉ារ៉ុក ដោយលទ្ធផល ២-០ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។ ឆ្លងកាត់ ៦ ប្រកួតកន្លងមក បារាំង ឈ្នះទាំងអស់ ស៊ុតចូលដៃគូ ១៦ គ្រាប់ និងត្រូវដៃគូស៊ុតចូល ២ គ្រាប់ប៉ុណ្ណោះ។

សូមបញ្ជាក់ថា បារាំង ត្រូវជួប អេស្ប៉ាញ នៅវគ្គពាក់កណ្តាលផ្តាច់ព្រ័ត្រ យប់ថ្ងៃទី១៤ ខែកក្កដា ឆ្នាំ ២០២៦។

នៅក្នុងប្រវត្តិ World Cup បារាំង ធ្លាប់បានឈ្នះជើងឯក ២ ដងគឺ ឆ្នាំ ១៩៩៨ និង ឆ្នាំ ២០១៨ ព្រមទាំងទទួលបានចំណាត់ថ្នាក់លេខ ២ ពីរដងគឺឆ្នាំ ២០០៦ និង ឆ្នាំ ២០២២ ហើយក៏ទទួលបានចំណាត់ថ្នាក់លេខ ៣ ពីរដង គឺឆ្នាំ ១៩៥៨ និងឆ្នាំ ១៩៨៦៕