កីឡា

បារាំង ឡើងវគ្គពាក់កណ្តាលផ្តាច់ព្រ័ត្រ ខណៈ Mbappé នៅលើ Messi ជាអ្នករកគ្រាប់បាល់ច្រើន

បានផុស

១៧ នាទី មុន

នៅ

ថ្ងៃសុក្រ ១០ កក្កដា ២០២៦

ដោយ

ក្រុមបាល់ទាត់ជម្រើសជាតិ បារាំង បានឡើងទៅកាន់វគ្គពាក់កណ្តាលផ្តាច់ព្រ័ត្រ នៃព្រឹត្តិការណ៍បាល់ទាត់ពិភពលោក World Cup 2026 បន្ទាប់ពីបានយកឈ្នះ ជម្រើសជាតិ ម៉ារ៉ុក ដោយលទ្ធផល ២-០ នៅវគ្គ ៨ ក្រុមចុងក្រោយកាលពីយប់មិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតវគ្គ ៨ ក្រុមចុងក្រោយ ក្រោមក្រសែភ្នែកអ្នកទស្សនាផ្ទាល់ចំនួនជាង ៦ ម៉ឺននាក់ ក្រុមមាន់គក បារាំង បានបង្ហាញសមត្ថភាពល្អទាំងការគ្រប់គ្រងបាល់ និងបង្កើតឱកាសស៊ុតជាច្រើនលើក ខណៈក្រុម ម៉ារ៉ុក ពិបាកសម្រុកទៅតំបន់គ្រោះថ្នាក់របស់បារាំង។

នៅវគ្គទី១ បារាំង ទទួលបានពិន័យស៊ុត ១១ ម៉ែត្រ នៅនាទីទី ២០ ប៉ុន្តែប្រធានក្រុម Kylian Mbappé ស៊ុតមិនបានសម្រេចដោយអ្នកចាំទីរបស់ម៉ារ៉ុក Yassine Bounou ជួយសង្គ្រោះបាន ដែលធ្វើឲ្យចប់វគ្គទី១គ្មានគ្រាប់បាល់កើតឡើង។

អ្នកចាំទីម៉ារ៉ុក Yassine Bounou សង្គ្រោះបាល់ពីការស៊ុតរបស់ Kylian Mbappe

ទោះជាយ៉ាងណា បារាំង នៅតែអាចរកបានគ្រាប់ដល់ទៅ ២ គ្រាប់ នៅវគ្គទី២ ដោយខ្សែប្រយុទ្ធ Kylian Mbappé នៅនាទី ៦០ ហើយរូបគេក៏បានបញ្ជូនបាល់ឲ្យ Ousmane Dembélé ស៊ុតគ្រាប់បាល់ទី២ ក្នុងជ័យជម្នះ ២-០ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។

ជាមួយគ្នានេះ Kylian Mbappé បានតាមស្មើគ្រាប់បាល់ ៨ គ្រាប់ របស់ Lionel Messi ក្នុងនាមជាកីឡាកររកបានគ្រាប់បាល់ច្រើនជាងគេក្នុងព្រឹត្តិការណ៍បាល់ទាត់ពិភពលោក ឆ្នាំ ២០២៦ នេះ ប៉ុន្តែកីឡាករជម្រើសជាតិបារាំង ឈរចំណាត់ថ្នាក់លេខ ១ ដោយសារបានបញ្ជូនបាល់ឲ្យមិត្តរួមក្រុម ៣ ដង។

៨គ្រាប់របស់ Kylian Mbappé គឺស៊ុតចូល ២ គ្រាប់ ពេល បារាំង ឈ្នះ សេណេហ្គាល់ ៣-១ និង ស៊ុតចូល ២ គ្រាប់ ពេលឈ្នះ អ៊ីរ៉ាក់ ៣-០ នៅវគ្គសន្សំពិន្ទុក្នុងពូល។ នៅវគ្គ ៣២ ក្រុមចុងក្រោយ រូបគេ ស៊ុតចូល ២ គ្រាប់ទៀតនៅពេលបារាំង ឈ្នះ ស៊ុយអែត ៣-០, នៅវគ្គ ១៦ ក្រុមចុងក្រោយ ស៊ុតប៉េណាល់ទី១១ម៉ែត្រ ១គ្រាប់ ពេល បារាំង ឈ្នះ ប៉ារ៉ាហ្គាយ ១-០ និងស៊ុត ១ គ្រាប់ នៅពេល បារាំង ឈ្នះ ម៉ារ៉ុក ២-០ នៅវគ្គ៨ក្រុមចុងក្រោយ ហើយក៏បញ្ជូនបាល់ឲ្យមិត្តរួមក្រុមស៊ុតចូលបាន ៣ ដង៕