កីឡា

ល្ងាចនេះ ក្រុមប៉េតង់កម្ពុជាបុរសធ្វើដំណើរទៅប្រកួតជើងឯកពិភពលោក

បានផុស

២ years មុន

នៅ

ថ្ងៃអង្គារ ១៦ វិច្ឆិកា ២០២១

ដោយ

ក្រុមប៉េតង់ជម្រើសជាតិកម្ពុជាផ្នែកបុរសនឹងធ្វើដំណើរទៅប្រទេសអេស្ប៉ាញប្រហែលជាម៉ោង៦កន្លះល្ងាចនេះដើម្បីចូលរួមប្រកួតជើងឯកប៉េតង់ពិភពលោកឆ្នាំ២០២១។

សុខ ចាន់មាន កាលឈ្នះមេដាយមាសពិភពលោកឆ្នាំ២០១៦

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីក្រុមប៉េត់កម្ពុជាផ្នែកនារីបានបញ្ចប់ភារកិច្ចនៅក្នុងការប្រកួតជើងឯកប៉េតង់ពិភពលោកនៅប្រទេសអេស្ប៉ាញឆ្នាំនេះដោយទទួលបានមេដាយមាស១គ្រឿងដោយកីឡាការិនី អ៊ុក ស្រីមុំ លើប្រភេទវិញ្ញាសាវាយយកពិន្ទុទោល ហើយវិញ្ញាសា៣នាក់ទល់៣នាក់បានឡើងដល់ត្រឹមវគ្គ៨ក្រុមចុងក្រោយ ពួកគាត់រួមទាំងគ្រូបង្វឹកផ្នែកនារីកំពុងធ្វើដំណើរមកប្រទេសមាតុភូមិវិញតាមការគ្រោងទុកមកដល់ប្រហែលជាម៉ោង៥កន្លះល្ងាចនេះ។

សម្រាប់ក្រុមប៉េតង់បុរសដែលត្រូវធ្វើដំណើរទៅល្ងាចនេះមានកីឡាករ សុខ ចាន់មាន, ថោង ឈឿន, ញ៉ែម បូរ៉ា និង ស៊ីង វង់ ព្រមទាំងគ្រូបង្វឹកផ្នែកបុរសលោក អ៊ឹម ផាត។

សម្រាប់កីឡាករ សុខ ចាន់មាន បានឈ្នះមេដាយមាសពិភពលោកលើវិញ្ញាសាវាយយកពិន្ទុផ្នែកបុរសកាលពីឆ្នាំ២០១៦នៅប្រទេសម៉ាដាហ្គាស្ការ បន្ទាប់ពីយកឈ្នះកីឡាករបារាំងនៅវគ្គផ្តាច់ព្រ័ត្រ។ ប៉ុន្តែពីរឆ្នាំក្រោយមកកីឡាករកម្ពុជារូបនេះមិនអាចការពារតំណែងមេដាយមាសរបស់ខ្លួនបានទេនៅឆ្នាំ២០១៨ដោយមេដាយមាសទៅកីឡាករបារាំង ROCHER Dylan។

អ៊ុក ស្រីមុំឈ្នះមេដាយមាសពិភពលោកឆ្នាំ២០២១

អ៊ុក ស្រីមុំ ជាកីឡាការិនីកម្ពុជាទី២ដែលបានឈ្នះមេដាយមាសពិភពលោកលើវិញ្ញាសាវាយយកពិន្ទុនារីទោលនេះ បន្ទាប់ពីវីរកីឡាការិនីកម្ពុជា កែ ឡេង ដែលបានឈ្នះ៤ដងជាប់គ្នាមុនពេលចូលនិវត្ត។

កម្ពុជាបានបញ្ជូនកីឡាការិនី៤នាក់គឺ អ៊ុក ស្រីមុំ, អ៊ុន ស្រីយ៉ា, ស៊្រាង សុរ៉ាឃីម និង ឃួន យ៉ារី ព្រមទាំងគ្រូបង្វឹក សុខ ម៉ុង ហើយក៏មានថ្នាក់ដឹកនាំសហព័ន្ធ និងមន្ត្រីក្រសួងអប់រំ យុវជន និងកីឡារួមដំណើរជាមួយផងដែរ៕

អត្ថបទ៖ វីរបុត្រ

Related Topics:កីឡាប៉េតង់