Connect with us

កីឡា

ហែម​ថុន វិទីនី ​ដឹកនាំ​​ និង​ជា​​គ្រូ​​​ហែលទឹក​​ជន​ពិការ​ចូល​រួម​ប្រកួត​អាស៊ាន​ប៉ារ៉ាហ្គេម

បានផុស

នៅ

អតីត​កីឡាការិនី​ហែល​ទឹក​ជម្រើស​ជាតិ​កម្ពុជា ហែមថុន វិទីនី  បាន​ក្លាយ​ជា​គ្រូ​បង្វឹក​​ និង​ដឹកនាំ​​ក្រុម​កីឡាករ កីឡាការិនី​មាន​ពិការភាព​កម្ពុជា​​​ទៅ​​ប្រកួត​អាស៊ាន​ប៉ារ៉ាហ្គេម លើក​ទី​១១ ឆ្នាំ​២០២២ នៅ​​ប្រទេស​ឥណ្ឌូនេស៊ី ពី​ថ្ងៃ​ទី​៣០ ខែ​កក្កដា ដល់​ថ្ងៃ​ទី​៦ ខែ​សីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះ​ជា​ការ​ងារ​ថ្មី​មួយ​ទៀត​សម្រាប់​​ ហែម​ថុន វិទីនី ដែល​​ទទួល​បាន​ឱកាស​បង្ហាត់​ក្រុម​អត្តពលិក​​ជន​មាន​ពិការ​​ភាព​កម្ពុជា​ដើម្បី​ប្រកួត​ក្នុង​ព្រឹត្តិការណ៍​អន្តរជាតិ​ បន្ទាប់​ពី​​​​ធ្លាប់​តែ​បង្ហាត់​បង្រៀន​កីឡា​ហែល​ទឹក​​ធម្មតា។

វិទីនី​ បាន​ប្រាប់​ថា៖ «មាន​ការ​​ពិបាក​ក្នុង​ការ​បង្ហាត់​ដែរ​ដោយ​សារ​ពួក​គេ​មាន​ពិការ​ភាព​ខុស​ៗ​គ្នា។ អ្នក​ខ្លះ​ធ្ងន់ អ្នក​ខ្លះ​កម្រិត​ស្រាល»។

ហែមថុន វិទីនី បាន​ឲ្យ​ដឹង​ថា៖ «ពី​មុន​ខ្ញុំ​ធ្លាប់​ហ្វឹក​ហាត់​ជា​មួយគ្រូ​បង្វឹក​អន្តរជាតិ​​មួយ​រូប​​ដែល​គាត់​​​ជា​គ្រូ​បង្ហាត់​ជន​ពិការ​​ ហើយ​​ទទួល​បាន​ល្អ​​ទូទាំង​ពិភព​លោក​។ កាល​ពី​ពេល​ថ្មី​ៗ ខាង​សហព័ន្ធ​កីឡា​ហែល​ទឹកអន្តរជាតិ​​ទើប​តែ​បញ្ជូន​គាត់​មក​ប្រទេស​ខ្មែរ​​ ហើយ​គាត់​ក៏​បាន​មក​ជួប​​ក្រុម​កីឡា​ជន​ពិការ​​កម្ពុជា​យើង​ដែរ។ ជា​ពិសេស​គាត់​បាន​ជួយ​បង្ហាត់​បង្រៀន​ខ្ញុំ​បន្ថែម ដូច្នេះ​ខ្ញុំ​​យល់​ដឹង​ច្រើន​ពី​របៀប​បង្ហាត់​ជន​ពិការ»។

ហែមថុន វិទីនី ទើប​តែ​បាន​​បង្ហាត់​​​ហែល​ទឹក​ដល់​អត្តពលិក​ជន​ពិការ​កកម្ពុជា​​ប៉ុន្មាន​ខែ​ចុង​ក្រោយ និង​​បង្ហាត់​ដិត​ដល់​ក្រោយ​ពេល​វិបត្តិកូវីដ-១៩​ស្ងប់​ស្ងាត់។ ​គ្រូ​បង្វឹក​រូប​នេះ​បាន​យល់​ឃើញ​ថា៖ «បន្ទាប់​ពី​បង្ហាត់​បាន​មួយ​រយៈ​ពេល​ ខ្ញុំ​កត់​សំគាល់​ឃើញ​ថា​ ពួក​គាត់​រីក​ចម្រើន​​ច្រើន។ មែន​ទែន​ទៅ ពួក​គាត់​ខ្វះ​ខាត​ច្រើន​ណាស់ ដោយ​សារ​​ពួក​គាត់​អត់​បាន​ហ្វឹក​ហាត់​ដិត​ដល់​។ ឥឡូវ​នេះ បច្ចេកទេស​ហែល​របស់​ពួក​គាត់​ល្អ​ប្រសើរ​ច្រើន»។

វិទីនី បាន​​សង្កត់​ធ្ងន់​​ថា៖ «​ខ្ញុំ​បាន​សិក្សា​ឃើញ​ថា ពួក​គាត់​ខ្លះ​មាន​កំណត់​ត្រា​ហែល​​មិន​​ដាច់​គ្នា​ឆ្ងាយ​ប៉ុន្មាន​ជា​មួយ​កំណត់​ត្រា​​របស់​អ្នក​ដែល​ឈ្នះ​​មេដាយ​កាល​អាស៊ាន​ប៉ារ៉ាហ្គេម​ឆ្នាំ​២០១៧។ ខ្ញុំ​រំពឹង​ថា ក្រុម​កីឡាករ​យើង​នឹង​​ធ្វើ​បាន​ល្អ ​ទោះ​ជា​ទើប​​ហ្វឹក​ហាត់​វិញ ក្រោយ​វិបត្តិ​កូវីដ-១៩​។ ការ​ហ្វឹក​ហាត់តិច​ក្តី តែ​ពួក​គាត់​​រីក​ចម្រើន​បច្ចេកទេស​ច្រើន ហើយ​ក៏​ត្រៀម​ខ្លួន​រួច​រាល់​ហើយ​សម្រាប់​ការ​ប្រកួត»។

សហព័ន្ធ​កីឡា​ហែល​ទឹក​ជន​ពិការ​កម្ពុជា​បាន​បញ្ជូន​កីឡាករ​៩​រូប និង​កីឡាការិនី២​រូប​ ហើយ​​ម្នាក់​ៗ​ត្រូវ​ប្រកួត​ជា​ច្រើន​វិញ្ញាសាក្នុង​ព្រឹត្តិការណ៍​អាស៊ាន​ប៉ារ៉ាហ្គេម លើក​ទី​១១​។ នេះ​ជា​លើក​ទី​២​ដែល​ក្រុម​ហែល​​ទឹក​ជន​ពិការ​កម្ពុជា​ចូល​រួម​ប្រកួត​អាស៊ាន​ប៉ារ៉ាហ្គេម បន្ទាប់​ពី​លើក​ទី​១​កាល​ពី​ឆ្នាំ​២០១៧នៅ​ប្រទេស​ម៉ាឡេស៊ី៕

អត្ថបទ៖ វីរបុត្រ​

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម