ធ្លាប់ចាញ់កម្ពុជា ពេលនេះ U-19 សិង្ហបុរី កោះហៅកីឡាថ្មីថែម​ត្រៀមពានថ្មីពេលប៉ះ​គ្នាម្ដងទៀត

ក្រុមជម្រើសជាតិសិង្ហបុរី អាយុក្រោម១៩ឆ្នាំ បានកោះហៅកីឡាករចំនួន ២៣នាក់ ដើម្បីចូលរួមការប្រកួតជម្រុះ​ពានរង្វាន់យុវជនទ្វីបអាស៊ីអាយុក្រោម ២០ឆ្នាំ (AFC U-20 Asian Cup)។

U-20 សិង្ហបុរី រួមពូល I ជាមួយកម្ពុជា, តាជីគីស្ថាន និង លីបង់ ខណៈកាលពីខែកក្កដា កន្លងទៅក្រុមនេះបានចាញ់​កម្ពុជា ម្ដងហើយ (១-០) ក្នុងពានយុវជនអាស៊ីអាគ្នេយ៍ ដែលជាហេតុធ្វើឱ្យលើកនេះបានកោះហៅកីឡាករថ្មីច្រើន ជាពិសេសជាកីឡាករដែលបានលេងច្រើននៅក្នុងលីគបាល់ទាត់សិង្ហបុរី។

ក្រុមចុងក្រោយត្រូវបានកាត់ចេញពីក្រុមបឋម ដែលមានកីឡាករចំនួន២៩នាក់ ហើយបាននិងកំពុងហ្វឹកហាត់​ចាប់តាំងពីថ្ងៃច័ន្ទ ទី២៩ ខែសីហា ឆ្នាំ២០២២។ កីឡាករថ្មីចំនួន ៩នាក់ត្រូវបានកោះហៅឱ្យទៅតំណាងប្រទេសសិង្ហបុរី ក្នុងក្រុមអាយុក្រោម ១៩ឆ្នាំជាលើកដំបូង ខណៈដែលកីឡាករ ១៤នាក់ផ្សេងទៀត បានចូលរួមក្នុងការប្រកួតពានរង្វាន់ AFF U-19 Championship 2022 នៅប្រទេសឥណ្ឌូណេស៊ី កាលពីដើមខែកក្កដា។

គ្រូបង្វឹក Fadzuhasny Juraimi បាននិយាយថា៖ «ក្រុមនេះមានភាពរឹងមាំទាំងផ្លូវកាយ និងផ្លូវចិត្ត ដោយកីឡាករ​ដែល​បានជ្រើសរើស សុទ្ធតែប្រកួតបានច្រើន និងធ្វើបានល្អនៅក្នុងលីគកំពូល Singapore Premier League (SPL), លីគ U-21 និងលីគទី២ (Singapore Football League)។»

«ដោយមិនគិតពីលទ្ធផល បទពិសោធន៍នេះនឹងមានសារៈសំខាន់សម្រាប់ការអភិវឌ្ឍន៍កីឡាករ។ វាមិនមែនរាល់ថ្ងៃទេ កីឡាករទាំងនេះនឹងត្រូវប្រកួតជាមួយប្រទេសតាជីស្គីស្ថាន និងលីបង់ ហើយពួកគេត្រូវតែចាប់យកឱកាសនេះ​ដោយដៃទាំងពីរដោយលេងយ៉ាងក្លាហាន និងមានការផ្តោតអារម្មណ៍ដើម្បីអនុវត្តទម្រង់លេងរបស់យើងនៅលើទីលាន»។ សម្ដីរបស់ លោក Fadzuhasny Juraimi។

បញ្ជាក់ថា U-20 សិង្ហបុរី នឹងជួប U-20 កម្ពុជា នៅថ្ងៃទី១៦ ខែកញ្ញា ដែលជាប្រកួតទី២ នៅក្នុងពូល៕

អត្ថបទ៖ មន្នីរ័ត្ន