ថៃ បង្ហាញប៉ុស្តិ៍ទូរទស្សន៍ចំនួន៣ ដែលនឹងផ្សាយបន្តផ្ទាល់ស៊ីហ្គេម នៅ កម្ពុជា

យោងតាមអាជ្ញាធរកីឡាថៃ (SAT) បានឲ្យដឹងថា ប្រជាជនថៃ នឹងអាចទស្សនាការផ្សាយបន្តផ្ទាល់នៃការប្រកួតកីឡាអាស៊ីអាគ្នេយ៍លើកទី៣២ដោយមិនគិតថ្លៃ។

លោក Kongsak Yodmanee ទេសាភិបាល SAT បានបង្ហាញកាលពីថ្ងៃចន្ទទី១០ខែមេសាថា ព្រឹត្តិការណ៍កីឡាស៊ីហ្គេមនៅប្រទេសកម្ពុជា នឹងត្រូវផ្សាយតាមប៉ុស្តិ៍យ៉ាងហោចណាស់បី។

បន្ទាប់​ពី​កិច្ច​ពិភាក្សា​ជា​មួយ​​ស្ថានីយ​ទូរទស្សន៍​របស់​ប្រទេស​ថៃ​រួច​មក ប៉ុស្តិ៍​លេខ៥, ប៉ុស្តិ៍​លេខ៩ និងប៉ុស្តិ៍ NBT នឹង​ក្លាយ​ជា​ទូរទស្សន៍​សាធារណៈ​របស់​ប្រទេស​ថៃ ដែលផ្សាយបន្តផ្ទាល់អំពីព្រឹត្តិការណ៍នៅរាជធានីភ្នំពេញ ចាប់ពី៥ដល់១៧ខែឧសភា។

ទោះបីជាយ៉ាងណាក៏ដោយ លោក Kongsak លើកឡើងថា SAT ក៏កំពុងពិភាក្សាផងដែរដើម្បីឲ្យប៉ុស្តិ៍លេខ៣ ចូលរួមជាដៃគូផ្សាយទី៤ ដើម្បីបង្កើនជម្រើសសម្រាប់អ្នកទស្សនាស៊ីហ្គេម។

គួរបញ្ជាក់ជាថ្មី ក្នុងកិច្ចប្រជុំពេញអង្គគណៈរដ្ឋមន្ត្រី កាលពីព្រឹកថ្ងៃទី ៣១ ខែមីនា ឆ្នាំ ២០២៣ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចមិនយកថ្លៃផ្សព្វផ្សាយ នូវការផ្សាយបន្តផ្ទាល់ចេញទៅក្រៅប្រទេស អំពីការប្រកួតកីឡាស៊ីហ្គេមលើកទី ៣២ឡើយ៕

ប្រែសម្រួល៖ Vann Vann

ប្រភព៖ Nation

ចុចអាន៖ សម្ដេចតេជោ ហ៊ុន សែន សម្រេចមិនយកថ្លៃផ្សាយបន្តផ្ទាល់ព្រឹត្តិការណ៍ស៊ីហ្គេម ចេញទៅក្រៅប្រទេស