កីឡាករ Zaniolo ជាប់ជម្រើសជាតិអ៊ីតាលីត្រៀមជម្រុះ Euro ក្រោយចប់រឿងភ្នាល់ខុសច្បាប់

គ្រូបង្វឹកបាល់ទាត់​ជម្រើស​ជាតិ​អ៉ីតាលី លោក Luciano Spalletti បានស្នើសុំសហព័ន្ធជាតិ មុនពេលបញ្ចូលកីឡាករ Nicolo Zaniolo នៅក្នុងបញ្ជីចុងក្រោយសម្រាប់​ព្រឹត្តិការណ៍ Euro 2024 ដោយខ្សែប្រយុទ្ធរូបនេះត្រូវសហការជាមួយអាជ្ញាធរក្នុងការស៊ើបអង្កេតលើសកម្មភាពភ្នាល់ខុសច្បាប់។

សហព័ន្ធបាល់ទាត់អ៉ីតាលី (FIGC) បានផ្តល់ភាពច្បាស់លាស់ទាំងអស់សម្រាប់សមាជិក​ Aston Villa ដែលត្រូវបានកោះហៅនៅថ្ងៃសុក្រសម្រាប់ការប្រកួតជម្រុះប្រចាំពូល C ដ៏សំខាន់នៅក្នុងដីជាមួយម៉ាសេដ្វាន (North Macedonia)​ នៅថ្ងៃទី១៧ ខែវិច្ឆិកា និងចេញទៅអ៊ុយក្រែន​៣​ថ្ងៃ​បន្ទាប់។

លោក Spalletti បានប្រាប់សន្និសីទសារព័ត៌មានកាលពីថ្ងៃចន្ទថា ៖«គាត់ (Zaniolo) មិនមានអ្វីពាក់ព័ន្ធនឹងស្ថានភាពនោះទេ (ការភ្នាល់បាល់ទាត់) គ្មានអ្វីកើតឡើងឡើយ។ មុនពេលកោះហៅ Zaniolo ខ្ញុំបាននិយាយទៅ​ប្រធាន (Gabriele Gravina) និងសហព័ន្ធ ហើយគ្មានអ្វីប្រឆាំងនឹងរឿងនេះទេ»។

អ៉ីតាលីអាចកក់កៅអីមួយនៅអឺរ៉ូឆ្នាំក្រោយ ប្រសិនបើពួកគេយកឈ្នះ ម៉ាសេដ្វាន ហើយ​គេច​ផុត​ពីការចាញ់អ៊ុយក្រែន។

កីឡាករ Zaniolo ត្រូវបានអនុញ្ញាតឱ្យចាកចេញពីក្រុមកាលពីខែមុន មុនពេលការប្រកួតជម្រុះទល់នឹងជម្រើស​ជាតិ​ម៉ាល់ត៍ (Malta) និងអង់គ្លេស រួមជាមួយនឹងខ្សែបម្រើមិត្តរួមក្រុម Sandro Tonali បន្ទាប់ពីកីឡាករទាំងពីរត្រូវបានប្រាប់ពីការជាប់ពាក់ព័ន្ធក្នុងការស៊ើបអង្កេតដោយព្រះរាជអាជ្ញាទីក្រុង Turin។

កាលពីខែមុន ក្លិបនៅក្របខណ្ឌ Premier League គឺ Aston Villa ដែល Zaniolo លេងឱ្យ​បានចេញសេចក្តីថ្លែងការណ៍មួយដោយនិយាយថា ៖«Aston Villa អាចបញ្ជាក់ថា Nicolo Zaniolo កំពុងជួយសហព័ន្ធបាល់ទាត់អ៉ីតាលី (FIGC) និងការស៊ើបអង្កេតរបស់អាជ្ញាធរពាក់ព័ន្ធលើសកម្មភាពភ្នាល់ខុសច្បាប់»។

ចាប់តាំងពីពេលនោះមក កីឡាករ Tonali ដែលលេងឱ្យ Newcastle ត្រូវបានជាប់បម្រាមរយៈពេល១០ខែ ខណៈ​ខ្សែបម្រើ Nicolo Fagioli របស់ Juventus បានទទួលយកការហាមឃាត់រយៈពេល៧ខែសម្រាប់ការបំពានច្បាប់លើការភ្នាល់លើការប្រកួត៕

ប្រែសម្រួល៖ មន្នីរ័ត្ន
ប្រភព៖ Reuters