Premier League វ៉ាដាច់គេ ក្នុងលីគកំពូលអឺរ៉ុបទាំង៥ ផ្តល់ប្រាក់រង្វាន់ឱ្យក្រុមជើងឯកច្រើនបំផុត

លីគកំពូល អង់គ្លេស Premier League បានវ៉ាដាច់លីគនៅ អឺរ៉ុប ទាំងអស់ ជាពិសេសលីគលំដាប់កំពូលទាំង ៥ ជាលីគផ្តល់ប្រាក់រង្វាន់ឱ្យក្រុមឈ្នះជើងឯកច្រើនជាងគេបង្អស់។

នៅលីគលំដាប់កំពូលទាំង ៥ របស់ អឺរ៉ុប រដូវកាល ២០២៥-២០២៦ នេះ បានរកឃើញក្រុមឈ្នះជើងឯកអស់ហើយ ក្នុងនោះ Premier League បានទៅលើ Arsenal។ លីគកំពូល អេស្ប៉ាញ La Liga បានទៅលើ Barcelona។

ចំណែកលីគ Serie A របស់ អ៉ីតាលី បានទៅលើ Inter Milan, លីគ Ligue1 របស់ បារាំង បានទៅលើក្រុម Paris Saint-Germain និងចុងក្រោយលីគ Bundesliga របស់ អាល្លឺម៉ង់ បានទៅលើក្រុម Bayern Munich។

បើនិយាយអំពីប្រាក់រង្វាន់ គឺ លីគកំពូល អង់គ្លេស ឈរនៅលើគេ ក្នុងនោះក្រុមជើងឯកទទួលបានច្រើនជាង ២៣៩.២៥ លានដុល្លារអាមេរិក។ លីគកំពូល អាល្លឺម៉ង់ ឈរនៅលំដាប់លេខ ២ ដោយក្រុមជើងឯកទទួលបាន ៩៧ លានដុល្លារអាមេរិក។

លីគកំពូល អ៉ីតាលី ឈរលំដាប់លេខ ៣ ដោយក្រុមជើងឯកទទួលបាន ៨១.៥ លានដុល្លារអាមេរិក។ លីគកំពូល អេស្ប៉ាញ ឈរលេខលំដាប់លេខ ៤ ក្នុងនោះក្រុមជើងឯកទទួលបាន ៦៧.៥ លានដុល្លារអាមេរិក និងចុងក្រោយលីគកំពូល បារាំង ទទួលបាន ៣៥ លានដុល្លារអាមេរិក។

គួរបញ្ជាក់ ថា ប្រាក់រង្វាន់បានបង្ហាញខាងលើ គឺជាប្រាក់រង្វាន់ ដែលក្រុមនីមួយៗទទួលបានពីលីគ បន្ទាប់ពីឈ្នះជើងឯក ពោលគឺមិនបានរាប់បញ្ចូលពីការលក់សិទ្ធផ្សាយ ក៏ដូចជាការធ្វើពាណិជ្ជកម្មផ្សេងៗរបស់ក្លិបឡើយ៕

អត្ថបទ៖ សេម កុសល