កត្តា ៤ នេះ ធ្វើឱ្យ ជប៉ុន កាន់តែខ្លាំង រហូតត្រូវបានចាត់ទុកជាក្រុមធំមួយនៅ World Cup 2026

ក្រុមបាល់ទាត់ជម្រើសជាតិ ជប៉ុន បានធ្វើឱ្យពិភពលោកមានការភ្ញាក់ផ្អើលជាខ្លាំង អំពីសមត្ថភាពក្រុមពួកគេបច្ចុប្បន្ន បន្ទាប់ពីមួយរយៈចុងក្រោយនេះ បានឈ្នះក្រុមលំដាប់ World Cup ជាច្រើន ដូចជា ប្រេស៊ីល អង់គ្លេស ជាដើម។ ជាមួយគ្នានេះ ក្រុមរហស្សនាមដាវសាំម៉ូរ៉ៃ ត្រូវបានគេចាត់ទុកជាបេក្ខភាពក្រុមធំមួយនៅ World Cup 2026 ។

ក្រុមជម្រើសជាតិ ជប៉ុន មានភាពខ្លាំងក្លាជាយូរមកហើយ គ្រាន់តែពីមុនត្រូវបានគេទទួលស្គាល់ត្រឹមតំបន់ អាស៊ី ប៉ុន្តែបច្ចុប្បន្នត្រូវបានពិភពលោកទទួលស្គាល់ទាំងមូលតែម្តង។ រឿងដ៏ភ្ញាក់ផ្អើល គឺកាលពី World Cup 2022 ពួកគេបានបំបាក់ក្រុមខ្លាំងៗដូចជា អាល្លឺម៉ង់ អេស្ប៉ាញ។ ចំណែកការប្រកួតមិត្តភាពកន្លងៗមក ពួកគេបានបន្តបំបាក់ អាល្លឺម៉ង់ ៤-១, ឈ្នះ ប្រេស៊ីល ៣-២ និងឈ្នះក្រុមជាច្រើនទៀត រួមទាំងថ្មីៗនេះទើបឈ្នះ អង់គ្លេស ១-០។

មានកត្តាច្រើន ដែលធ្វើឱ្យជម្រើសជាតិមកពី អាស៊ី នេះមានភាពខ្លាំងក្លាសឹងមិននឹកស្មានដូច្នេះ ប៉ុន្តែសារព័ត៌មាន «កម្ពុជាថ្មី» សូមលើកយកកត្តាសំខាន់ ៤ ដែលធ្វើឱ្យក្រុមរហស្សនាមដាវសាំម៉ូរ៉ៃអាចឈានដល់កម្រិតនេះ។

១. កត្តាប្រព័ន្ធអភិវឌ្ឍយុវជនល្អ៖ ជប៉ុន បានផ្តោតលើការវិនិយោគការអភិវឌ្ឍយុវជនជាច្រើនឆ្នាំមកហើយ។ ពួកគេមានរចនាសម្ព័ន្ធថ្នាលបាល់ទាត់យុវជនច្បាស់លាស់ តាមរយៈការបង្កើតសាលាថ្នាលគុណភាព បូកជាមួយការរៀបចំរបស់ក្លិបអាជីព ដែលបានធ្វើការជាមួយគ្នាយ៉ាងល្អ។ រឿងដ៏សំខាន់មួយទៀត គឺយុវជនរបស់គេត្រូវបានបណ្តុះឡើង ដោយមានវិន័យ និងសាមគ្គីភាព។

២. កត្តាល្បឿន និងបច្ចេកទេស៖ ក្រោយទទួលបានការបណ្តុះបណ្តាលល្អទាំងវិន័យ និងបច្ចេកទេស បានធ្វើឱ្យកីឡាករជប៉ុនទាំងអស់លេងដោយទំនុកចិត្ត និងគុណភាពនៅលើទីលាន។ បច្ចុប្បន្ន ការលេងដោយសាមគ្គីភាព និងលឿនរហ័ស ដើម្បីវាយបកលើគូប្រកួត បានក្លាយជាអត្តសញ្ញាណមួយសម្រាប់ក្រុមដាវសាំម៉ូរ៉ៃតែម្តង។

៣. កីឡាករមានសមត្ថភាពកម្រិត អឺរ៉ុប៖ ក្នុងបញ្ជីឈ្មោះរបស់ក្រុម ជប៉ុន បច្ចុប្បន្ន គឺគ្មានកីឡាករលេងក្នុងស្រុក ឬ នៅអាស៊ី សូម្បីម្នាក់ ដោយកីឡាករទាំងអស់លេងនៅ អឺរ៉ុប ដូចជានៅ អង់គ្លេស អេស្ប៉ាញ បារាំង អ៉ីតាលី អាល្លឺម៉ង់ ហូល្លង់ ប៊ែលហ្សិក ជាដើម។ តាមរយៈស្ថិតិប្រកួតកន្លងមក កីឡាករពួកគេសុទ្ធតែជាកីឡាករជម្រើសដំបូងក្នុងក្រុមពួកគេរៀងៗខ្លួន។ ដូច្នេះហើយ ទើបអ្នក​ឃើញការលេងរបស់ ជប៉ុន បច្ចុប្បន្ន គឺខ្លាំងឈានដល់កម្រិត អឺរ៉ុប ទៅហើយ។

៤. កត្តាគ្រូបង្វឹកពោរពេញដោយយុទ្ធសាស្ត្រ៖ គ្រូបង្វឹករបស់ក្រុមជម្រើសជាតិ ជប៉ុន បច្ចុប្បន្ន គឺលោក Hajime Moriyasu ដែលត្រូវបានតែងតាំង តាំងពីឆ្នាំ ២០១៨ មក។ លោកជាជនជាតិ ជប៉ុន ប៉ុន្តែសញ្ញាបត្រគ្រូបង្វឹកកម្រិត អឺរ៉ុប UEFA Pro License។ លោកត្រូវបានគេទទួលស្គាល់ ជាគ្រូបង្វឹកម្នាក់ ដែលមានយុទ្ធសាស្ត្រដឹកនាំបត់បែនបានលឿន ដោយអាចស្របបានគ្រប់ស្ថានការណ៍ទៅតាមគូប្រកួត។

កត្តាទាំង ៤ ខាងលើ​ ជាចំណុចសំខាន់ ធ្វើឱ្យ ជប៉ុន ក្លាយជាក្រុមខ្លាំងមួយនៅពេលបច្ចុប្បន្ន។ នៅ World Cup 2026 ពួកគេលែងក្លាយជាក្រុមធម្មតាទៀតហើយ ដោយចាប់ពីពេលនេះតទៅ នឹងត្រូវបានគេចាត់ទុកជាក្រុមលំដាប់ធំមួយ។ World Cup 2026 ក្រុមជម្រើសជាតិ ជប៉ុន ស្ថិតនៅពូល F ជាមួយ ហូល្លង់, ជប៉ុន, ស៊ុយអែត និង ទុយនីស៊ី៕

អត្ថបទ៖ សេម កុសល