បាត់មុខកីឡាករចូលសញ្ជាតិឆ្នើម ៣ នាក់ ពីក្រុមជម្រើស​​ជាតិ​កម្ពុជា លើកនេះ

កីឡាករចូលសញ្ជាតិឆ្នើមៗ ៣ នាក់បានអវត្តមានពីការកោះហៅរបស់គ្រូបង្វឹកលោក Koji Gyotoku ចូលជម្រើសជាតិ កម្ពុជា លើកនេះ ដើម្បីត្រៀមការប្រកួតមិត្តភាពទល់នឹងក្រុម តាហ្ស៊ីគីស្ថាន នៅថ្ងៃទី ៥ ខែ មិថុនា ឆ្នាំ ២០២៥។

នារសៀលថ្ងៃ ពុធ ទី ២៨ ខែ ឧសភា នេះ សហព័ន្ធបាល់ទាត់កម្ពុជា បានប្រកាសបញ្ជីឈ្មោះកីឡាករជម្រើសជាតិ កម្ពុជា ទាំង ២៣ នាក់ជាផ្លូវការ ប៉ុន្តែអ្វីដែលចាប់អារម្មណ៍ គឺការប្រមូលផ្តុំលើកនេះ គ្មានឈ្មោះរបស់ខ្សែបម្រើ Yudai Ogawa, Andres Nieto និង Takaki Ose ឡើយ ហើយជាមួយគ្នានេះក៏គ្មានឈ្មោះរបស់កីឡាករព្រះខ័នរាជស្វាយរៀង Nick Taylor និងប្រធានក្រុម សឿយ វិសាល ផងដែរ។

ជុំវិញការអវត្តមានរបស់កីឡាករខាងលើ សហព័ន្ធបាល់ទាត់កម្ពុជាបានបញ្ជាក់ថា មូលហេតុនៃការអវត្តមានរបស់កីឡាករមួយចំនួន គឺដោយសារកីឡាករខ្លះមានបញ្ហារបួស។ ចំណែកកីឡាករខ្លះទៀត​ដូច​ជា Yudai Ogawa និង Andres Nieto ជាប់ពិន័យកាតក្រហម។

ខាងក្រោមនេះ គឺជាបញ្ជីឈ្មោះកីឡាករទាំង ២៣ នាក់របស់ក្រុមគោព្រៃ កម្ពុជា៖

អ្នកចាំទី៖ អ៊ុំ វិចិត្រ (ភ្នំពេញក្រោន), វីរៈ ដារ៉ា (ព្រះខ័នរាជស្វាយរៀង) និងរ៉េត លីហេង (ណាហ្គាវើលដ៍)។

ខ្សែការពារ៖ សារ៉េត គ្រីយ៉ា (ព្រះខ័នរាជស្វាយរៀង), មីហ្ស៊ូណូ ហ៊ីការ៉ុ (ព្រះខ័នរាជស្វាយរៀង), កាន់ ម៉ូ (វិសាខា), អ៊ុក សុវណ្ណ (វិសាខា), ឡេង ណូរ៉ា (វិសាខា), ហួត វ៉ាន់ណេត (ណាហ្គាវើលដ៍) និងអ៊ឹម វ៉ាឃីម (អង្គរថាយហ្គើរ)។

ខ្សែបម្រើ៖ ជូ ស៊ីនទី (ព្រះខ័នរាជស្វាយរៀង), គឹម សុខយុទ្ធ (ព្រះខ័នរាជស្វាយរៀង), មិន រតនៈ (ព្រះខ័នរាជស្វាយរៀង), ស៊ិន សុវណ្ណមករា (វិសាខា), អ៊ិន សូដាវីដ (វិសាខា), ស៊ិន កក្កដា (វិសាខា) និងបុង សាំយូអ៊េល (ភ្នំពេញក្រោន)។

ខ្សែប្រយុទ្ធ៖ ឃូលីបាលី អាបឌែល (អង្គរថាយហ្គើរ), សៀង ចន្ធា (បឹងកេត), ញាណ សុស៊ីដាន (ព្រះខ័នរាជស្វាយរៀង), លឹម ពិសុទ្ធ (ភ្នំពេញក្រោន), សារ ទី (វិសាខា) និង ហាវ សុខនេត្រ (អាយអេសអាយ ដង្កោសែនជ័យ)៕

អត្ថបទ៖ សេម កុសល