ទ្វីបអាស៊ី រកឃើញ ៥ ក្រុមកក់កៅអី ទៅជុំចុងក្រោយ ជើងឯក​ពិភព​លោក World Cup ២០២៦

នៅក្នុងទ្វីប អាស៊ី បានរកឃើញក្រុមជម្រើសជាតិចំនួន ៥ ហើយ ដែល​ដណ្តើម​បានកៅអីឡើងទៅប្រកួតជុំចុងក្រោយក្នុងព្រឹត្តិការណ៍បាល់ទាត់ជើងឯកពិភពលោក (World Cup) ២០២៦ ជាផ្លូវការ។

ការប្រកួតជម្រុះជុំ​ទី​៣​ប្រចាំទ្វីប អាស៊ី គឺនៅសល់ ១ ប្រកួតទៀតសម្រាប់ពូលនីមួយៗ ប៉ុន្តែបច្ចុប្បន្នគឺបានរកឃើញ ៥ ក្រុមហើយ ដែលសុវត្ថិភាពឡើងទៅប្រកួតជុំចុងក្រោយ World Cup ២០២៦ ដែល​សហម្ចាស់ផ្ទះ​មាន​ អាមេរិក ម៉ិកស៊ិក និង កាណាដា។

ក្នុងនោះពូល A មាន អ៉ីរ៉ង់ ឈរលេខ ១ ក្នុងពូល និង អ៊ុយបេគីស្ថាន ឈរលេខ ២ ក្នុងពូល។ ចំណែកពូល B មាន កូរ៉េខាងត្បូង ឈរលេខ ១ ក្នុងពូល និង ហ្ស៊កដានី ឈរលេខ ២ ។ ពូល C មាន ជប៉ុន ឈរនៅលេខ ១ ក្នុងពូល ខណៈ អូស្ត្រាលី ឈរនៅលេខរៀងទី ២ ក្នុងពូល គឺត្រូវរង់ចាំអ៊ុតមើលប្រកួតចុងក្រោយសិន ដោយសារពួកគេមានពិន្ទុលើសក្រុមលេខ ៣ អារ៉ាប៊ីសាអ៊ូឌីត តែ ៣ ពិន្ទុប៉ុណ្ណោះ។

គួរបញ្ជាក់ថា រូបមន្តប្រកួតជម្រុះប្រចាំទ្វីប អាស៊ី លើកនេះ គឺមានភាពប្រែប្រួលខុសពីរាល់ដង ដោយសារ World Cup ឆ្នាំ ២០២៦ គឺបានបង្កើនក្រុមចូលរួមពី ៣២ ក្រុមឡើងទៅ ៤៨ ក្រុម ហើយនៅទ្វីប អាស៊ី ក៏បានកើនកៅអីចូលរួមផងដែរ ដោយពីមុនទទួលបាន ៤ កៅអីកន្លះ ប៉ុន្តែលើកនេះ ទទួលបាន ៨ កៅអីកន្លះ។

មានន័យថា ក្រុមលេខ ១ និងលេខ ២ ក្នុងពូលនីមួយៗប្រចាំពូលទាំង ៣ នឹងត្រូវឡើងទៅប្រកួតនៅជុំចុងក្រោយក្នុងព្រឹត្តិការណ៍ជើងឯកបាល់ទាត់ពិភពលោក ២០២៦។ ដោយឡែកក្រុម ដែលឈរលេខ ៣ និងលេខ ៤ ក្នុងពូល នឹងត្រូវប្រកួតជម្រុះបន្តទៀត ដើម្បីរក ២ ក្រុមឡើងទៅប្រកួតនៅជុំចុងក្រោយ និង ១ ក្រុមទៀត ត្រូវប្រកួតជម្រុះ (playoff) ជាមួយក្រុមមកពីទ្វីបផ្សេង៕

អត្ថបទ៖ សេម កុសល