ចម្រៀង ៦ បទត្រូវបានដាក់​នៅ World Cup 2026 ប៉ុន្តែមានតែ ១ បទត្រូវ​បាន​ជ្រើស​រើស​​ជា​ផ្លូវ​ការ

ព្រឹត្តិការណ៍បាល់ទាត់ជើងឯកពិភពលោក World Cup 2026 មានបទចម្រៀង ៦ បទ ដែលច្រៀងដោយតារាល្បីៗក្នុងពិភពលោក ត្រូវបានទម្លាក់ ប៉ុន្តែក្នុងចំណោមនោះមានតែ ១ បទប៉ុណ្ណោះ ដែល​ត្រូវបានចាត់ទុកជាបទចម្រៀងផ្លូវការ។

ជាទម្លាប់នាមុន World Cup មកដល់ គឺតែងតែមានការទម្លាក់បទចម្រៀងផ្សេងៗ និងមានមួយបទ ជាបទផ្លូវការ ដើម្បីអមនៅក្នុងព្រឹត្តិការណ៍លំដាប់ពិភពលោកនេះ។ មុន World Cup 2026 មកដល់ ក៏មានការទម្លាក់បទចម្រៀងជាបន្តបន្ទាប់ផងដែរ ពោលគិតត្រឹមពេលនេះ គឺចំនួន ៦ បទឯណោះ។

បទចម្រៀងចំនួន ៦ បទត្រូវបានទម្លាក់មុន World Cup 2026 មកដល់ រួមមានបទ Lighter ច្រៀងដោយតារាចម្រៀង Jelly Roll និង Carin Leon, បទ Por Ella ច្រៀងដោយ Los Angeles Azules និង Belinda, បទ Illuminate ច្រៀងដោយ Jessie Reyez និង Elyanna។ បទ Goals ច្រៀងដោយ Lisa, Anitta និង Rema, បទ Echo ច្រៀងដោយ Daddy Yankee និង Shenseea និងបទ Dai Dai ច្រៀងដោយតារាស្រី Shakira និង Burna Boy។

ក្នុងចំណោមនោះ បទចម្រៀង «Goals» ច្រៀងដោយតារាស្រី Lisa សមាជិកក្រុម Black Pink, Rema និង Echo គឺត្រូវបានរងការរិះគន់យ៉ាងខ្លាំងទៅលើអត្ថន័យ និងការស្លៀកពាក់ស៊ិចស៊ីជ្រុល ដែលចំណុចទាំងនេះមិនបានឆ្លុះបញ្ចាំងអំពីបាល់ទាត់ទាល់តែសោះ។ ជាមួយគ្នានេះ ក៏មានអ្នកយល់ច្រឡំផងដែរ ថា បទនេះជាបទផ្លូវការនៅក្នុងព្រឹត្តិការណ៍បាល់ទាត់ជើងឯកពិភពលោក ២០២៦។

តាមការបញ្ជាក់របស់ FIFA គឺមានតែមួយបទប៉ុណ្ណោះ ដែលត្រូវបានចាត់ទុកជាបទចម្រៀងផ្លូវការនៅ World Cup 2026 នេះ នោះគឺបទចម្រៀង «Dai Dai» ច្រៀងដោយតារាស្រី Shakira និង Burna Boy។ អត្ថន័យ​បទនេះ គឺផ្តោតទៅលើការលើកទឹកចិត្ត ថាមពល ភាពរួបរួមសាមគ្គី និងចំណង់ចំណូលចិត្តចំពោះបាល់ទាត់ សម្រាប់ព្រឹត្តិការណ៍ World Cup 2026។

«Dai Dai» គឺជាពាក្យរបស់ អ៉ីតាលី ដែលមានន័យថា «មកលើកទឹកចិត្ត ទៅទៅ ឬតោះទៅ»។ ហើយនៅក្នុង​បទ​ចម្រៀង​នោះទៀតសោត ក៏មានលាយបញ្ចូលជាមួយភាសា ៤ ទៀតផងដែរ ដូចជា អេស្ប៉ាញ បារាំង អង់គ្លេស និង ជប៉ុន៕

អត្ថបទ៖ សេម កុសល