ក្លិប​ បឹងកេត ទទួល​បាន​ដៃ​គូ​ឧបត្ថម្ភ​ធំ​ថ្មី​​គឺ ក្រុម​ហ៊ុន K9WIN INVESTMENT

នៅ​ថ្ងៃទី១៦  ខែមិថុនា ឆ្នាំ២០២៥ សមាគមក្លិបកីឡាបាល់ទាត់បឹងកេត បានប្រកាសជាផ្លូវការអំពី​ការ​ចុះហត្ថលេខាលើកិច្ចព្រមព្រៀងជាដៃគូឧបត្ថម្ភធំជាមួយ ក្រុមហ៊ុន K9WIN INVESTMENT ក្នុងគោលបំណងឧបត្ថម្ភគាំទ្រថវិកា ទ្រទ្រង់ដល់និរន្តរភាពរបស់ក្លិបបាល់ទាត់បឹងកេត ដើម្បីចូលរួមប្រកួតប្រជែងក្នុងពានរង្វាន់នានា តាមរយៈការចុះហត្ថលេខាលើកិច្ចព្រមព្រៀងរយៈពេល១រដូវកាល (២០២៥-២០២៦)។

លោកស្រី ពុធ ធីតា ប្រធានក្លិបបាល់ទាត់បឹងកេតបានមានប្រសាសន៍ថា ៖«នាងខ្ញុំមានអារម្មណ៍រំភើបរីករាយជាទីបំផុត ជាពិសេសក្នុងថ្ងៃនេះ ក្លិបបាល់ទាត់បឹងកេត បានក្លាយជាដៃគូសហការឧបត្ថម្ភធំ ជាមួយនឹងក្រុមហ៊ុន K9WIN INVESTMENT ក្នុងការចូលរួមចំណែកលើក​ស្ទួយវិស័យកីឡានៅក្នុងព្រះរាជាណាចក្រកម្ពុជា»។

លោកស្រីបានសង្កត់ធ្ងន់ផងដែរថា ៖«ដូចអ្នកទាំងអស់គ្នាបានដឹងហើយថា នាងខ្ញុំធ្លាប់តែងបាននិយាយ និងផ្តល់កិច្ចសម្ភាស​ជាច្រើនកន្លងមកទៅកាន់សារព័ត៌មាន អំពីភាពមិនអាចខ្វះបាន និងចាំបាច់បំផុតសម្រាប់ដំណើរការក្លិបបាល់ទាត់បាន គឺក្រុមហ៊ុនឧបត្ថម្ភ ដែលជាសសរទ្រូងដ៏សំខាន់សម្រាប់និរន្តរភាពក្លិប»។

លោកស្រី​បន្ថែម បច្ចុប្បន្នមិនថាតែនៅក្នុងប្រទេសកម្ពុជាប៉ុណ្ណោះទេ ដែលជួបជាមួយបញ្ហាហិរញ្ញវត្ថុ វាគឺកើតឡើងទូទាំងពិភពលោក ដែលភាគច្រើនគឺជួបវិបត្តិក្ស័យធន និងឈានទៅដល់ការបិទក្លិបទាំងស្រុង។

ជាចុងក្រោយ លោកស្រីបានសម្តែងការថ្លែងអំណរគុណយ៉ាងជ្រាលជ្រៅ ចំពោះក្រុមហ៊ុន K9WIN INVESTMENT និងបង្ហាញជំនឿចិត្តយ៉ាងមុតមាំ​តាមរយៈ ពិធីចុះហត្ថលេខាជាដៃគូឧបត្ថម្ភធំរវាង ក្លិបបាល់ទាត់បឹងកេត និងក្រុមហ៊ុន K9WIN INVESTMENT សមាគមក្លិបបាល់ទាត់បឹងកេត នឹងប្តេជ្ញាបន្តប្រកួតប្រជែងឱ្យកាន់តែខ្លាំងជាងមុន ដើម្បីដណ្តើមយកពានរង្វាន់នានា៕