បញ្ហាផ្លូវចិត្ត Archives - Kampuchea Thmey Daily

បណ្ឌិត ឈាង វណ្ណារិទ្ធ លើកឡើងពីសារសំខាន់នៃការការពារផ្លូវចិត្តក្នុងពេលមានជម្លោះជាមួយថៃ

hun sirivadh — Wed, 22 Oct 2025 03:22:19 +0000

អគ្គលេខាធិការរងរដ្ឋសភាលោកបណ្ឌិត ឈាង វណ្ណារិទ្ធ បានលើកឡើងថាការការពារផ្លូវចិត្តក្នុងពេលដែលប្រទេសមានជម្លោះជាមួយថៃកសាងបាននូវគុណតម្លៃនិងមនោសញ្ចេតនារួមជាមួយជាតិ ជំរុញការគិតនិងចំណេះដឹងផ្នែកប្រព័ន្ធផ្សព្វផ្សាយ កាត់បន្ថយការបែកបាក់ផ្ទៃក្នុង និងបង្រៀនសង្គមឱ្យមានការប្រុងប្រយ័ត្ន និងរក្សាភាពស្ងប់ស្ងាត់ក្រោមសម្ពាធ។

ថ្លែងក្នុងការធ្វើបាឋកថាស្ដីពី «យុទ្ធសាស្ត្រការការពារផ្លូវចិត្តអំឡុងពេលជម្លោះរវាងកម្ពុជា-ថៃ» ជូនដល់មន្ត្រីអគ្គលេខាធិការដ្ឋានរដ្ឋសភាកាលពីថ្ងៃទី២១ ខែតុលា ឆ្នាំ២០២៥ លោកបណ្ឌិត ឈាង វណ្ណារិទ្ធ ថា សត្រូវតែងតែទទួលបាននូវប្រយោជន៍ពេលដែលប្រទេសមួយបែកបាក់ផ្ទៃក្នុង។ លោកបន្ថែមថាក្នុងស្ថានភាពជម្លោះរវាងប្រទេសនិងប្រទេសការរក្សាផ្លូវចិត្តរបស់ពលរដ្ឋគឺជារឿងដែលសំខាន់ព្រោះការធ្វើបែបនេះមិនត្រឹមតែកាត់បន្ថយនូវការបែកបាក់ផ្ទៃក្នុងប៉ុណ្ណោះទេ តែបានកសាងនូវគុណតម្លៃមនោសញ្ចេតនាជាតិ និងការប្រុងប្រយ័ត្នផងដែរ។

លោកបន្ថែមថាដើម្បីការពារផ្លូវចិត្ត មិនត្រូវធ្វើឲ្យមានការតានតឹង មិនប្រើអារម្មណ៍ មិនជ្រួលច្របល់ រក្សាភាពនឹងន ជឿជាក់លើរដ្ឋាភិបាល គឺសំដៅលើការពង្រឹងផ្លូវចិត្តរបស់ខ្លួនអោយរឹងមាំក្នុងស្ថានការណ៍ណាមួយ ដើម្បីចៀសវាងការបាក់ទឹកចិត្តដែលជាដើមចមធ្វើអោយយើងមិនអាចបំពេញកិច្ចការណាមួយជាប្រយោជន៍ដល់ខ្លួនផ្ទាល់និងសង្គម។

ប្រទេសថៃបានបើកការវាយប្រហារលើកម្ពុជាកាលពីថ្ងៃទី២៤ ខែកក្កដា និងបន្តរហូតដល់យប់ថ្ងៃទី២៨ ខែកក្កដា មុនបទឈប់បាញ់ចូលជាធរមាន។ ក្រោយបទឈប់បាញ់ចូលជាធរមានទាហាន និងអាជ្ញាធរថៃបានបង្ករឿងជាមួយកម្ពុជាជាបន្តបន្ទាប់ដោយមានទាំងការប្រើចិត្តសាស្ត្រព័ត៌មានយោធា និងការចូលមករាយលួសបន្លាបណ្ដេញពលរដ្ឋខ្មែរនៅភូមិព្រៃចាន់ និងភូមិជោគជ័យ ចេញពីផ្ទះសំបែងជាដើម។

អ្នកជំនាញចិត្តសាស្ត្រលោក ស៊ាង លាប ធ្លាប់លើកឡើងប្រាប់កម្ពុជាថ្មីថាក្នុងស្ថានភាពដូចបច្ចុប្បន្ននេះពលរដ្ឋប្រឈមមុខនឹងបញ្ហាថប់បារម្ភច្រើនដែលប៉ះពាល់ដល់ការទុកចិត្តលើរដ្ឋាភិបាលនិងសុខភាពផ្លូវចិត្តរបស់ពួកគេដោយផ្ទាល់ផងដែរ។ លោកជំរុញដល់ពលរដ្ឋសូមតាមដាននូវព័ត៌មានផ្លូវការពីរដ្ឋាភិបាល ធ្វើលំហាត់ប្រាណ ធ្វើសមាធិ និងរក្សានូវដំណេកឱ្យបានគ្រប់គ្រាន់ ដើម្បីរក្សានូវកម្លាំងចិត្តរបស់ខ្លួនក៏ដូចជាថែរក្សាផ្លូវចិត្តបានល្អផងដែរ។

ប្រទេសកម្ពុជា និងថៃគ្រោងនឹងចុះហត្ថលេខាលើកិច្ចព្រមព្រៀងសន្តិភាពនៅចុងខែតុលានេះដោយមានប្រធានាធិបតីអាមេរិកលោក ដូណាល់ ត្រាំ និងនាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម ធ្វើជាសាក្សីផងដែរ។ ថ្លែងក្នុងពិធីសម្ពោធអាកាសយានដ្ឋានអន្តរជាតិតេជោនៅថ្ងៃទី២០ ខែតុលា នាយករដ្ឋមន្ត្រី សម្ដេចធិបតី ហ៊ុន ម៉ាណែត បានស្នើឱ្យពលរដ្ឋបន្តជឿទុកចិត្តលើរដ្ឋាភិបាល និងយោធារបស់កម្ពុជា។ សម្ដេចថា ពេលនេះមិនមែនជាពេលបំបែកបំបាក់ការទុកចិត្តគ្នានោះទេ សូមមូលមតិគ្នាជាធ្លុងមួយជឿជាក់លើកងទ័ពកម្ពុជាដែលបានលះបង់ការពារទឹកដី៕

អត្ថបទដោយ ហ៊ុន សិរីវឌ្ឍន៍

The post បណ្ឌិត ឈាង វណ្ណារិទ្ធ លើកឡើងពីសារសំខាន់នៃការការពារផ្លូវចិត្តក្នុងពេលមានជម្លោះជាមួយថៃ appeared first on Kampuchea Thmey Daily.

ប្រជាជនថៃ ច្រើនឡើងៗ មានបញ្ហាផ្លូវចិត្ត ឈានដល់កម្រិតគួរឲ្យបារម្ភ

Sok Sovann — Wed, 12 Jun 2024 07:00:30 +0000

យោងតាមទិន្នន័យពីក្រុមប្រឹក្សាអភិវឌ្ឍសេដ្ឋកិច្ចនិងសង្គមជាតិថៃ (NESDC) និងផ្សាយបន្តដោយសារព័ត៌មាន Thai PBS កាលពីថ្ងៃអង្គារទី១១ខែមិថុនា, បញ្ហាសុខភាពផ្លូវចិត្តនៅប្រទេសនេះ កំពុងកើនឡើងក្នុងអត្រាគួរឲ្យព្រួយបារម្ភ ពោលគឺចំនួនអ្នកស្វែងរកការព្យាបាលវិបត្តិនេះ បានកើនឡើងពី១.៣លាននាក់ក្នុងឆ្នាំ២០១៥ ដល់ ២.៩លាននាក់ក្នុងឆ្នាំ២០២៣។

(រុបថត៖ Humanium)

ផ្អែកលើទិន្នន័យពីនាយកដ្ឋានសុខភាពផ្លូវចិត្ត ដែលចងក្រងចន្លោះថ្ងៃទី១ខែតុលាឆ្នាំ២០២៣ ដល់ថ្ងៃទី២២ខែមេសាឆ្នាំនេះ, NESDC កត់សម្គាល់ថា ប្រជាជនថៃប្រហែល ១៥.៤៨% បានរាយការណ៍ពីភាពធុញថប់ ខណៈ១៧.២០% លេចចេញសញ្ញានៃជំងឺធ្លាក់ទឹកចិត្ត និង១០.៦៣% គិតចង់ធ្វើអត្តឃាត ហើយកត្តាទាំងប៉ុន្មាននេះ ត្រូវបានគេចង្អុលចំៗទៅលើសម្ពាធផ្នែកសេដ្ឋកិច្ចសង្គម។

លើសពីនេះ កត្តាបរិស្ថានក៏ដើរតួយ៉ាងសំខាន់ធ្វើឲ្យប្រជាជនថៃ មានវិបត្តិផ្លូវចិត្តកាន់តែខ្លាំងដែរ ព្រោះថាប្រទេសនេះ កំពុងប្រឈមមុខនឹងបញ្ហាដូចជាការបំពុលបរិយាកាស PM2.5 ជាប់ចំណាត់ថ្នាក់ក្នុងចំណោមប្រទេសរងការបំពុលខ្ពស់បំផុតលើពិភពលោក។

(រុបថត៖ VN Express)

អ្វីដែលគេកត់សម្គាល់បំផុតគឺថា ក្នុងឆ្នាំសារពើពន្ធ២០២៣ ប្រជាជនថៃធម្មតា មានបញ្ហាផ្លូវចិត្តជាងអ្នកជក់គ្រឿងញៀនទៅទៀត។

សូមបញ្ជាក់ថា ក្នុងឆ្នាំ២០២៣ អត្រាធ្វើអត្តឃាតនៅប្រទេសថៃ បានឈានដល់ ៧.៩៤ក្នុងចំណោមប្រជាជន១០០ ០០០នាក់ ពោលគឺសឹងតែស្មើនឹងអត្រាក្នុងអំឡុងវិបត្តិហិរញ្ញវត្ថុ Tom Yum Kung ទៅហើយ ដែលនៅពេលនោះ វាឈានដល់ ៨.៥៩ក្នុងចំណោមប្រជាជន ១០០ ០០០នាក់៕

អត្ថបទ៖ សុខ សុវណ្ណ

ចុចអាន៖ មន្ត្រីជាន់ខ្ពស់ ជំរុញ សាលារៀន និមន្តព្រះសង្ឃសម្តែងធម្មទេសនា អប់រំផ្លូវចិត្ត និងសីលធម៌ ដល់សិស្ស

The post ប្រជាជនថៃ ច្រើនឡើងៗ មានបញ្ហាផ្លូវចិត្ត ឈានដល់កម្រិតគួរឲ្យបារម្ភ appeared first on Kampuchea Thmey Daily.

មន្ត្រីជាន់ខ្ពស់ ជំរុញ សាលារៀន និមន្តព្រះសង្ឃសម្តែងធម្មទេសនា អប់រំផ្លូវចិត្ត និងសីលធម៌ ដល់សិស្ស

អ៊ិន ពិសី — Wed, 21 Feb 2024 09:09:34 +0000

មន្ត្រីជាន់ខ្ពស់ក្រសួងអប់រំ យុវជន និងកីឡា បានជំរុញ និងលើកទឹកចិត្តដល់សាលារៀនទាំងអស់ និមន្តព្រះសង្ឃមកសម្តែងធម្មទេសនា ដើម្បីអប់រំផ្លូវចិត្ត និងសីលធម៌ដល់សិស្សានុសិស្សឱ្យក្លាយជាសិស្សល្អ ពលរដ្ឋល្អ និង មិត្តល្អ នៅក្នុងសង្គម។

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅរសៀលថ្ងៃទី ២១ កុម្ភៈ នេះថា នៅក្នុងកម្មវិធីសិក្សា ក្រសួងអប់រំ បានដាក់ចេញចំណុចស្នូលដែលសំខាន់នោះគឺ ការនាំឱ្យសិស្សក្លាយជាពលរដ្ឋពេញលេញ ដោយទទួលបានទាំងវិជ្ជាសម្បទា បំណិនសម្បទា ចរិយាសម្បទា និងកាយសម្បទា ហើយដើម្បីសម្រេចគោលដៅនេះ សាលានីមួយៗ ក្រៅពីបង្រៀនមេរៀនកំណត់ដោយក្រសួងហើយនោះ ក្រសួង ក៏លើកទឹកចិត្តឱ្យអនុវត្តសកម្មភាពផ្សេងៗ និងភាពច្នៃប្រឌិតទៅតាមការចាំបាច់ និងស្របតាមតម្រូវការរបស់សិស្ស។

លោកស្រី បានបន្តថា ក្រៅពីនេះ ក្រសួង ក៏បានជំរុញឱ្យសាលាបណ្តុះចរិយាសម្បទា និងបំណិនសម្បទាដែរ តាមសកម្មភាព និងវិធីសាស្ត្របង្រៀនមុខវិជ្ជាស្នូលទាំងអស់ ដោយប្រើប្រាស់វិធីសាស្ត្របង្រៀនបែបថ្មី ដើម្បីជំរុញសិស្សានុសិស្សមានជំនាញផ្សេងៗ ដូចជាមានអត្តចរិតធ្វើការជាក្រុមបាន ចេះរស់នៅក្នុងសង្គម ជាពលរដ្ឋល្អ មានសុជីវធម៌ និងសីលធម៌ ស្របទៅតាមអ្វីដែលជាកូនខ្មែរមាន។

លោកស្រី បានបន្តទៀតថា «អីចឹងការនិមន្តព្រះសង្ឃមកសម្តែងធម្មទេសនាអប់រំដល់សិស្ស ក៏ដូចជារៀបចំពិធីផ្សេងៗ ទាក់ទងនឹងការតាំងសម្មាធិជាដើម ឬ ការអប់រំទេសនាផ្លូវចិត្តនេះ ក៏ជាផ្នែកមួយចូលរួមបន្ថែមធ្វើឱ្យចរិយាសម្បទារបស់សិស្សានុសិស្សឆ្លើយតបទៅនឹងកម្មវិធីសិក្សា»។

លោកស្រី បន្ថែមទៀតថា នៅក្នុងកម្មវិធីក្រៅម៉ោងសិក្សាដែលក្រសួងបានដាក់ចេញទៅឱ្យសាលានីមួយៗ អនុវត្ត គឺ សាលា អាចច្នៃប្រឌិតទៅតាមអ្វីជាក់ស្ដែងតាមមូលដ្ឋានរបស់ខ្លួនដូចជាអាចដាក់បញ្ចូលនូវព័ត៌មានវិទ្យា កម្មវិធីផ្សេងៗ ជាតម្រូវការក្នុងមូលដ្ឋាន ហើយក្នុងនោះប្រសិនបើកម្មវិធីធម្មទេសនាជាតម្រូវការ សាលារៀន អាចដាក់បញ្ចូលបាន។ ព្រោះថា ក្រសួងតែងតែលើកទឹកចិត្ត និងជំរុញសាលារៀនអនុវត្តឱ្យបាននូវស្តង់ដារសាលារៀនគំរូដែលបានដាក់ចេញទៅ ក៏ដូចជាសម្រេចឱ្យបាននូវលទ្ធផលសិក្សារំពឹងទុកមានចែងក្នុងកម្មវិធីសិក្សា។

លោកស្រី ឃួន វិច្ឆិកា បានបញ្ជាក់ថា «ការចូលរួមធម្មទេសនារបស់ព្រះសង្ឃ អប់រំផ្លូវចិត្ត គឺថាសាលា អាចធ្វើទៅបាន ដើម្បីចូលរួមពង្រឹងស្មារតីសិស្ស ក៏ដូចជាអប់រំសីលធម៌របស់សិស្សផងដែរ»៕

អត្ថបទ ៖ សំអឿន

The post មន្ត្រីជាន់ខ្ពស់ ជំរុញ សាលារៀន និមន្តព្រះសង្ឃសម្តែងធម្មទេសនា អប់រំផ្លូវចិត្ត និងសីលធម៌ ដល់សិស្ស appeared first on Kampuchea Thmey Daily.

ទម្លាប់ល្អ ៤ យ៉ាង ជួយអ្នកឲ្យមានភាពរីកចម្រើន

សាង ស្រីល័ក្ខ — Mon, 31 Jul 2023 02:30:00 +0000

មនុស្សត្រូវបានបង្កើតឡើងដោយសម្ពាធខាងក្រៅនិងពីខាងក្នុងខ្លួន។ យើងមិនអាចគ្រប់គ្រងស្ថានការណ៍ខាងក្រៅរបស់យើងបានទេ ប៉ុន្តែយើងអាចផ្លាស់ប្តូរខ្លួនឯងដោយដឹងខ្លួន។ ក្នុងនោះ មានតែការពង្រឹងខ្លួនឯងជានិច្ច ទើបជីវិតរបស់អ្នកកាន់តែគួរឲ្យចាប់អារម្មណ៍ ឈានទៅមុខយ៉ាងខ្លាំង។

សមិទ្ធិផលដ៏អស្ចារ្យបំផុតរបស់មនុស្សម្នាក់គឺការខិតខំដើម្បីកាន់តែល្អ និងសម្បូរបែបនៅថ្ងៃខាងមុខ ចូរបង្កើតទម្លាប់ទាំង ៤ នេះ ប្ដូរជីវិតអ្នក ហើយពង្រឹងខ្លួនឯង។

១ អានឲ្យបានច្រើន

ក្នុងជីវិត យើងទាំងអស់គ្នាចៀសមិនរួចនូវគ្រាដែលមានការច្របូកច្របល់ និងអស់សង្ឃឹម។ យើងមិនតែងតែមានសំណាងគ្រប់គ្រាន់ដែលមានអ្នកផ្សេងនៅក្បែរយើង ដោយមានជំនួយនោះទេ។ ប៉ុន្តែអ្នកដែលអាចងាកទៅរកសៀវភៅ អាចជួយអ្នកស្វែងរកទិសដៅសម្រាប់អនាគត និងកម្លាំងដើម្បីឆ្ពោះទៅមុខ។ ទស្សនវិទូជនជាតិបារាំងម្នាក់ឈ្មោះ Montesquieu បាននិយាយថា “សម្រាប់ខ្ញុំ ការអានគឺជាវិធីដ៏ល្អបំផុតដើម្បីបំបាត់ភាពអពមង្គលក្នុងជីវិត គ្មានអ្វីស្មោកគ្រោកដែលមិនអាចបំបាត់ដោយការអាននោះទេ”។ ការអានគឺជាឱសថដ៏ល្អសម្រាប់ព្យាបាលជីវិតរបស់អ្នក និងជាផ្លូវកាត់ដើម្បីពង្រឹងខ្លួនឯង។ ចំណាយពេលកន្លះម៉ោងដើម្បីអានដោយស្ងប់ស្ងាត់ជារៀងរាល់ថ្ងៃ អ្នកនឹងពង្រីកចំណេះដឹង បង្កើនកម្រិតនៃការយល់ដឹង ពង្រឹងកម្លាំងខាងក្នុងនិងរឹងមាំជាងមុនដើម្បីប្រឈមមុខនឹងជីវិត។

២ ហាត់ប្រាណ

មិនថាអ្នកជួបបញ្ហា ឬលំបាកយ៉ាងណានោះទេ សូមព្យាយាមអនុវត្ត ក្នុងរយៈពេលដ៏ខ្លី អ្នកនឹងមានអារម្មណ៍ស្រស់ស្រាយជាងមុន និងងាយស្រួលក្នុងការស្វែងរកដំណោះស្រាយចំពោះបញ្ហា។ ដំណក់ញើសដែលធ្លាក់នៅពេលអ្នកហាត់ប្រាណធ្វើឲ្យអ្នកមានអារម្មណ៍ធូរស្រាល ដូចជាសម្ពាធទាំងអស់ត្រូវបានបញ្ចេញជាមួយនឹងញើសផ្សេងទៀត។ ការធ្វើលំហាត់ប្រាណរយៈពេលកន្លះម៉ោងក្នុងមួយថ្ងៃ ដូចបញ្ចៀសអារម្មណ៍អវិជ្ជមានឲ្យចាកចេញពីអ្នកបន្តិចម្តង ៗ សំរាមផ្លូវចិត្តត្រូវបានសម្អាតយ៉ាងឆាប់រហ័សដូចគ្នា។

៣ ស្ងាត់នៅពេលវាពិបាក

យើងទាំងអស់គ្នាត្រូវឆ្លងកាត់គ្រាដ៏ខ្មៅងងឹតបំផុតនៃជីវិតពីពេលមួយទៅពេលមួយ។ នៅក្នុងផ្លូវរូងក្រោមដីដ៏ងងឹត និងត្រជាក់ដ៏វែងនោះ មានមនុស្សចាប់ផ្តើមខឹងសម្បារ ហើយបញ្ចប់ជីវិតខ្លួនឯង។ ខណៈពេលដែលអ្នកផ្សេងទៀតជ្រើសរើសនៅស្ងៀម ផ្តោតលើការស្វែងរកវិធីដោះស្រាយបញ្ហា និងទទួលបានភាពជោគជ័យ។

មុននឹងត្រូវបានគេស្គាល់ជាសាធារណៈ អ្នកប្រលោមលោកជនជាតិជប៉ុន Keigo Higashino ក៏បានឆ្លងកាត់សម័យមួយដែលគ្មាននរណាស្គាល់គាត់ដែរ។ នៅឆ្នាំ ១៩៨៥ គាត់បានល្បីល្បាញយ៉ាងឆាប់រហ័សជាមួយនឹងប្រលោមលោក “After School” ។ ស្នាដៃនេះមិនត្រឹមតែឈ្នះរង្វាន់ Edogawa Rampo លើកទី ៣១ ប៉ុណ្ណោះទេ ថែមទាំងលក់បាន ១០០,០០០ ច្បាប់ផងដែរ។ ដោយមានទំនុកចិត្តនឹងជោគជ័យនេះ កីឡាករវ័យ ២៧ ឆ្នាំរូបនេះបានសម្រេចចិត្តលាឈប់ពីការងារដើម្បីលះបង់ពេលវេលាដើម្បីសរសេរ។

ទោះជាយ៉ាងណាក៏ដោយ ប៉ុន្មានឆ្នាំក្រោយមក ការលក់ស្នាដៃរបស់គាត់ស្ថិតក្នុងកម្រិតធម្មតា ប្រាក់ចំណូលក៏ថយចុះគួរឲ្យកត់សម្គាល់។ ប្រសិនបើវាជាអ្នកដ៏ទៃ ធ្លាក់ពីលើកំពូលទៅបាតជ្រោះ ប្រហែលជាគេមិនអាចទប់ទល់នឹងការវាយលុកបានឡើយ ហើយចុះចាញ់តាំងពីយូរយារណាស់មកហើយ។ ប៉ុន្តែពេលនេះ គាត់ជឿថាគាត់ត្រូវតែខិតខំបន្ថែមទៀត។ ប្រសិនបើការលក់សៀវភៅខ្សោយ សូមសរសេរសៀវភៅពីរបីក្បាលទៀត ប្រសិនបើអ្នកអានមិនឃើញលក្ខណៈពិសេសច្រើនទេ សូមសាកល្បងប្រធានបទបន្ថែមទៀត។ នៅក្នុងដំណើរការនៃការកកកុញឥតឈប់ឈរគាត់បានរកឃើញរចនាប័ទ្មផ្ទាល់ខ្លួនរបស់គាត់បន្តិចម្តង ៗ ។ ១៣ឆ្នាំក្រោយមក គាត់បានចេញសៀវភៅ “Secret” ដែលជាស្នាដៃដែលទើបតែចេញបានធ្វើឱ្យមានការចាប់អារម្មណ៍ ដោយលក់បានជាង ៥០០,០០០ ច្បាប់ក្នុងរយៈពេលដ៏ខ្លី។

ការប្រមូលផ្តុំខ្លួនឯងឥតឈប់ឈរនឹងកាន់តែមានភាពចាស់ទុំ និងរឹងមាំ។ រយៈពេលដែលធ្លាក់បាតជ្រោះក៏ជាពេលវេលាដ៏ល្អបំផុតដើម្បីប្រមូលផ្តុំ និងបង្កើនខ្លួនឯងផងដែរ។ ចូររលាស់ចេញនូវទុក្ខក្នុងលោកនេះ ទុកចោលនូវកិត្តិនាម និងការទទួលបានដោយឡែក ពិចារណាអំពីគុណសម្បត្តិ និងគុណវិបត្តិរបស់ខ្លួន ដើម្បីស្វែងរកផ្លូវត្រូវ។ នៅស្ងៀមដើម្បីដោះស្រាយបន្ថែមទៀត និងធ្វើឲ្យមានការរីកចម្រើនដ៏អស្ចារ្យ។

៤ គិតច្រើនពេលនៅម្នាក់ឯង

ខ្លាចនៅម្នាក់ឯង ខ្លាចប្រឈមមុខនឹងខ្លួនឯងមែនទេ? ខ្លាចបន្ទប់ស្ងាត់ មិនដឹងធ្វើម៉េច? ខ្លាចអត់មានអ្នកទៅជាមួយទេ យកទូរសព្ទមកដាក់ពេញម៉ោង? ប្រសិនបើអ្នកឃើញខ្លួនឯងនៅក្នុងខ្លួន កុំបារម្ភព្រោះអ្នកមិននៅម្នាក់ឯង។ យើងតែងតែខ្លាចការនៅម្នាក់ឯង ដោយមិនដឹងពីតម្លៃនៃគ្រាទាំងនោះ។

Oprah ធ្លាប់និយាយថា “គ្រប់ពេលវេលាតែម្នាក់ឯងធ្វើឲ្យយើងជានរណា” ។ ការរៀនរីករាយនឹងការនៅម្នាក់ឯងគឺជាវិន័យដ៏អស្ចារ្យបំផុតក្នុងជីវិត។ យ៉ាងណាមិញ ជីវិតគឺជាដំណើរដ៏ឯកា អ្នកណាមិនមកម្នាក់ឯង? ការចំណាយពេលមួយភ្លែតដើម្បីភ្ជាប់ទំនាក់ទំនងកាន់តែស៊ីជម្រៅជាមួយខ្លួនអ្នកជារៀងរាល់ថ្ងៃគឺជាការស្រលាញ់ និងការយកចិត្តទុកដាក់យ៉ាងជ្រាលជ្រៅបំផុត។

នៅពេលអ្នកយល់ច្រឡំ សូមបើកសៀវភៅដើម្បីជម្រះអ័ព្ទ ហើយស្វែងរកទិសដៅ។
នៅពេលអ្នកក្រៀមក្រំ លំហាត់ប្រាណអាចរំលាយអារម្មណ៍អវិជ្ជមាន និងជម្រះចិត្តរបស់អ្នក។
ពេលជួបបញ្ហា ចូរតាំងចិត្តប្រមូលកម្លាំង ហើយកុំចុះចាញ់។
នៅពេលអ្នកនៅម្នាក់ឯង ចូរភ្ជាប់ទំនាក់ទំនងជាមួយខ្លួនអ្នកឲ្យកាន់តែស៊ីជម្រៅ ដើម្បីកែតម្រូវខ្លួនអ្នក និងបន្តទៅមុខទៀត៕

អត្ថបទ៖ សាង ស្រីល័ក្ខ

ចុចអាន៖៨ យ៉ាងត្រូវដឹងថា ជីវិតកើតមកមិនបានជំពាក់នរណាម្នាក់ សូម្បីតែការពន្យល់

The post ទម្លាប់ល្អ ៤ យ៉ាង ជួយអ្នកឲ្យមានភាពរីកចម្រើន appeared first on Kampuchea Thmey Daily.

ក្រសួងអប់រំដាក់ចេញវិធានការ២បង្រៀនឲ្យគ្រូចេះសង្កេតមើលបញ្ហាផ្លូវចិត្តរបស់ក្មេងនាសម័យឌីជីថល

អុន ស្រីមាន — Thu, 24 Nov 2022 05:08:36 +0000

ក្នុងរយៈពេលប៉ុន្មានឆ្នាំចុងក្រោយនេះ កុមារភាគច្រើននៅកម្ពុជាមានបញ្ហាផ្លូវចិត្ត និងមិនចេះនិយាយច្រើនបន្ទាប់ពីពួកគេប្រើប្រាស់ប្រព័ន្ធឌីជីថលច្រើន។ ជាការឆ្លើយតបក្រសួងអប់រំក៏បានដាក់ចេញនូវសេចក្តីណែនាំ និងសៀវភៅអប់រំផ្លូវចិត្តចំពោះកុមារ ដល់គ្រូបង្រៀនដើម្បីឱ្យពូកគាត់ចេះសង្កេត និងជួយអប់រំកុមារពីបញ្ហាផ្លូវចិត្ត។ នេះបើតាមការលើកឡើងរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។

នៅក្នុងបរិបទកូវីដ-១៩ បានធ្វើឱ្យសាលារៀនទូទាំងប្រទេសកម្ពុជាផ្អាកដំណើរការសិក្សាផ្ទាល់រយៈពេលជិត២ឆ្នាំ ដោយតម្រូវឱ្យសិស្សានុសិស្ស សិក្សាតាមប្រព័ន្ធអនឡាញ។ ជាហេតុនាំឱ្យពួកគេមានឱកាសប្រើប្រាស់ប្រព័ន្ធអេឡិចត្រូនិចច្រើន ដូចជាទូរសព្ទដៃទំនើប ឬ អាយផេបជាដើម ធ្វើឱ្យពួកគេចាកឆ្ងាយពីសង្គមមនុស្ស ផ្តាច់ការទាក់ទងនាំឱ្យក្មេងមួយចំនួនទៀតមានបញ្ហាផ្លូវចិត្ត មិនចេះនិយាយផងដែរ។

ដោយមើលឃើញថា បច្ចុប្បន្ននេះ មិនមែនមានតែយុវជនទេដែលមានបញ្ហាផ្លូវចិត្ត និងជំងឺបាក់ទឹកចិត្ត សូម្បីតែកុមារក៏កើតនូវជំងឺមួយនេះដែរ។ ដូច្នេះហើយ រដ្ឋមន្ត្រីក្រសួងអប់រំ បណ្ឌិត្យសភាចារ្យ ហង់ជួន ណារ៉ុន បានលើកឡើងថា ក្រសួងអប់រំបានចេញនូវចំណាត់ការពីរ ដើម្បីឆ្លើយតបនឹងបញ្ហាទាំងនេះ។

ចំណាត់ការទី១ គឺដាក់ចេញនូវសេចក្តីណែនាំ និងសៀវភៅបណ្តុះបណ្តាលសុខភាពផ្លូវចិត្តដល់កុមារ ដើម្បីបង្រៀនឱ្យគ្រូបង្រៀនចេះកត់សម្គាល់ពីបញ្ហាផ្លូវចិត្តរបស់ពួកគេ។ ចំណាត់ការទី២ គឺដាក់ចេញនូវសុខភាពបន្តពូជរបស់យុវវ័យក្នុងកម្មវិធីសិក្សា ដើម្បីឱ្យពួកគាត់បានដឹងពីការលូតលាស់របស់កុមារ និងរបៀបនៃការគាំទ្រដល់ពួកគេ។

លោករដ្ឋមន្ត្រីក្រសួងអប់រំ បានសង្កត់ធ្ងន់ថា កំណែទម្រង់នេះ គឺផ្តោតសំខាន់លើចំណេះដឹងរបស់គ្រូ ចំពោះការយល់ដឹងពីការវិវត្តរបស់កុមារ និងយុវវ័យ ដើម្បីជួយគាំទ្រដល់សិស្សានុសិស្សគ្រប់រូប ជៀសវាងមានគ្រោះថ្នាក់ផ្សេងៗដល់អ្នកសិក្សា។

បន្ថែមពីនោះ សាលារៀនគឺជាកន្លែងមួយសម្រាបជួយអ្នកសិក្សាគ្រប់រូប ស្ទើរតែគ្រប់វិស័យ ជាពិសេស គ្រូបង្រៀនត្រូវពង្រឹងផ្នែកប្រឹក្សាយោបល់ឱ្យបានខ្លាំងក្លា សម្រាប់ជួយដោះស្រាយបញ្ហាដល់ពួកគេ ព្រោះសុខភាពផ្លូវចិត្តគឺជារឿងមួយដែលសំខាន់មិនគួរមើលរំលង។ ការផ្សព្វផ្សាយឱ្យបានទូលំទូលាយ និងបង្កើតជាវេទិកាអប់រំផ្លូវចិត្តតាមរយៈប្រព័ន្ធផ្សេងៗ គឺជារឿងមួយដែលមានសារៈសំខាន់ណាស់សម្រាប់ពួកគេ។

គួររំលឹកថា សព្វថ្ងៃនេះជំងឺផ្លូវចិត្ត ការបាក់ទឹកចិត្ត គឺជាជំងឺមួយប្រភេទដែលកាចសាហាវខ្លាំង កំពុងវាយលុកខ្លាំងដល់សង្គមខ្មែរ មិនថាជាកុមារ ឬយុវជនឡើយ។ ដូច្នេះម្តាយឪពុក និងអាណាព្យាបាលគ្រប់រូប ត្រូវយកចិត្តទុកដាក់ តាមសង្កេត និងកំណត់ពីការប្រើប្រាស់ប្រព័ន្ធឌីជីថលចំពោះកូនឱ្យបានត្រឹមត្រូវ ជៀសវាងពួកគេមានបញ្ហាអ្វីមួយជាយកថាហេតុ៕

អត្ថបទ៖ អុន ស្រីមាន

The post ក្រសួងអប់រំដាក់ចេញវិធានការ២បង្រៀនឲ្យគ្រូចេះសង្កេតមើលបញ្ហាផ្លូវចិត្តរបស់ក្មេងនាសម័យឌីជីថល appeared first on Kampuchea Thmey Daily.

៥ វិធី ព្យាបាលផ្លូវអារម្មណ៍ឲ្យធូរស្បើយ ដោយខ្លួនឯង

សាង ស្រីល័ក្ខ — Mon, 01 Aug 2022 07:19:48 +0000

មនុស្សភាគច្រើនគិតថាការព្យាបាលដោយខ្លួនឯង គឺដូចគ្នានឹងការធ្វើដំណើរដែរ។ ពួកគេធ្វើដំណើរទៅកន្លែងឆ្ងាយៗ ដែលមានទេសភាពគួរឲ្យភ្ញាក់ផ្អើល ដើម្បីបន្ធូរអារម្មណ៍មួយរយៈ។ ទោះបីជាការព្យាបាលដោយខ្លួនឯង មិនតែងតែត្រូវទៅដើរលេងក៏ដោយ។ ប៉ុន្តែវាអាចត្រូវបានធ្វើតាមរបៀបសាមញ្ញ សូម្បីតែនៅផ្ទះក៏ដោយ។ ដូច្នេះតើវិធីងាយៗអ្វីខ្លះ ដែលអាចធ្វើបាន សម្រាប់ការព្យាបាលដោយខ្លួនឯង។

១ ធ្វើលំហាត់ប្រាណឲ្យបានទៀងទាត់ តើអ្នកជាមនុស្សដែលឧស្សាហ៍ហាត់ប្រាណមែនទេ? ឬគ្រាន់តែខ្ជិលធ្វើកីឡា ហើយជ្រើសរើសដេក? ទោះបីជាការហាត់ប្រាណមានអត្ថប្រយោជន៍ល្អក៏ដោយ អ្នកដឹងពីផ្លូវកាយ និងផ្លូវចិត្ត។ លំហាត់ប្រាណគឺជាវិធីសាមញ្ញមួយ ក្នុងការព្យាបាលខ្លួនឯង។ នៅពេលអ្នកហាត់ប្រាណ រាងកាយ និងចិត្តរបស់អ្នកនឹងមានអារម្មណ៍ធូរស្រាលជាងមុន។ ដោយប្រយោល នេះក៏បញ្ចេញនូវអារម្មណ៍អវិជ្ជមាន ដែលដោះស្រាយ និងក្លាយជាបន្ទុកផ្លូវចិត្ត។

២ ចាប់យកចំណង់ចំណូលចិត្ត មនុស្សគ្រប់រូបមានចំណង់ចំណូលចិត្តផ្ទាល់ខ្លួន។ ខណៈពេលដែលអ្នកផ្សេងទៀតមានចំណង់ចំណូលចិត្ត ដែលមិនប្រើថាមពលខ្លាំងពេក។ ចំណង់ចំណូលចិត្តបែបណាក៏ដោយ ប្រសិនបើគ្រប់គ្រងបានត្រឹមត្រូវ វាពិតជាអាចនាំមកនូវផលប្រយោជន៍។ ការមានចំណង់ចំណូលចិត្ត គឺជាវិធីដ៏សាមញ្ញមួយ ដែលអាចធ្វើបានសម្រាប់ការព្យាបាលដោយខ្លួនឯង។

៣ ទំនាក់ទំនងសង្គមជាមួយបរិយាកាសជុំវិញ បរិយាកាសជុំវិញ មានលក្ខណៈផ្ទាល់ខ្លួន និងពិសេស។ ប៉ុន្តែ នៅតែមិនមានមនុស្សជាច្រើនបានដឹងអំពីវាទេ។ ពួកយើងភាគច្រើនចាត់ទុកតំបន់ជុំវិញរបស់យើង ជាកន្លែងដែលមិនសូវទាក់ទាញ។ ចំណែកឯការធ្វើសង្គម ជាមួយមជ្ឈដ្ឋានជុំវិញ អាចជាវិធីសាមញ្ញមួយសម្រាប់ការព្យាបាលដោយខ្លួនឯង។ ប្រសិនបើអ្នកជាអ្នកសង្កេត និងប្រុងប្រយ័ត្ន មានរឿងគួរឲ្យចាប់អារម្មណ៍ ដែលអាចទទួលបានពីមជ្ឈដ្ឋានជុំវិញ។ នេះរួមបញ្ចូលទាំងបទពិសោធន៍ដ៏មានតម្លៃ ដែលមិនអាចរកបានពីកន្លែងណាផ្សេងទៀតឡើយ។

៤ លេងជាមួយសត្វចិញ្ចឹម តើអ្នកជាមនុស្សម្នាក់ដែលចូលចិត្តសត្វចិញ្ចឹមមែនទេ? មានសត្វចិញ្ចឹមជាច្រើនសម្រាប់ជ្រើសរើស។ ចាប់ផ្តើមពីឆ្មា ត្រី និងសត្វចិញ្ចឹមដ៏គួរឲ្យស្រលាញ់ផ្សេងៗ។ សម្រាប់អ្នកដែលចង់ព្យាបាលដោយខ្លួនឯង ក្នុងទម្រង់នៃសកម្មភាពសាមញ្ញ ការលេងជាមួយសត្វចិញ្ចឹម គឺជារឿងមួយក្នុងចំណោមពួកគេ។ អាកប្បកិរិយាគួរឲ្យស្រលាញ់របស់សត្វចិញ្ចឹម នឹងលើកទឹកចិត្តអ្នក ហើយរំសាយថាមពលអវិជ្ជមាន។ នោះអ្នកអាចត្រលប់មកវិញដោយរំភើប និងលើកទឹកចិត្ត។

៥ អានសៀវភៅដែលអ្នកចូលចិត្ត មនុស្សជាច្រើនគិតថា ការព្យាបាលគឺទៅកន្លែងស្ងប់ស្ងាត់ ដើម្បីព្យាបាលអ្នកខូចចិត្ត។ ដោយមិនដឹងខ្លួន ការព្យាបាលដោយខ្លួនឯង ក៏អាចធ្វើឡើងតាមរយៈសកម្មភាពតូចៗ និងសាមញ្ញៗផងដែរ។ ប្រភេទនៃការព្យាបាលដោយខ្លួនឯងសាមញ្ញមួយ ដែលអ្នកអាចជ្រើសរើស គឺការអានសៀវភៅដែលអ្នកចូលចិត្ត។ មិនថាជាការអានប្រលោមលោក រឿងកំប្លែង ឬការអានផ្សេងៗ។ គ្រោងការអានដ៏គួរឲ្យចាប់អារម្មណ៍មួយ នឹងធ្វើឲ្យអារម្មណ៍របស់អ្នកប្រសើរឡើង ដូច្នេះអ្នកអាចសម្រាកបានកាន់តែច្រើន។

បន្ថែមពីលើការធ្វើដំណើរ វាប្រែថាការព្យាបាលដោយខ្លួនឯង ក៏អាចត្រូវបានធ្វើតាមរយៈសកម្មភាពសាមញ្ញផងដែរ។ អំពីសកម្មភាពទាំងប្រាំខាងលើ តើមួយណាជាជម្រើសរបស់អ្នក?

ប្រែសម្រួល៖ សាង ស្រីល័ក្ខ

ចុចអាន៖ហេតុផល ៥ យ៉ាង គួរឈប់បន្ទោសខ្លួនឯងថា ជាបន្ទុកគ្រួសារទៀត

ចុចអាន៖ចិត្តគំនិត ៥ យ៉ាង រារាំងភាពជោគជ័យរបស់អ្នក

The post ៥ វិធី ព្យាបាលផ្លូវអារម្មណ៍ឲ្យធូរស្បើយ ដោយខ្លួនឯង appeared first on Kampuchea Thmey Daily.

កុំចង់ដឹងឮរឿងទាំង ៤ នេះ បើមិនចង់ឲ្យជីវិតពោរពេញដោយភាពអវិជ្ជមាន

សាង ស្រីល័ក្ខ — Tue, 28 Jun 2022 09:38:31 +0000

កាលពីនៅក្នុងពោះម្ដាយគ្រប់រូបតែងតែព្យាយាមយករឿងវិជ្ជមាន មកដាក់ក្នុងខ្លួន ដើម្បីថែទាំសុខភាពផ្លូវចិត្តកូន ដល់ពេលដឹងក្ដី រឿងអវិជ្ជមាននៅក្នុងសង្គមក៏ចាប់ផ្ដើមមានឥទ្ធិពលមកលើការលូតលាស់របស់មនុស្សសឹងតែគ្រប់គ្នា។ ការលូតលាស់ជាមួយរឿងអវិជ្ជមាន អាចនាំឲ្យមនុស្សនោះវិវត្តទៅជាមនុស្សអវិជ្ជមាន ដែលបង្កគ្រោះថ្នាក់ដល់អ្នកជុំវិញខ្លួន និងខ្លួនគេផងដែរ។ កត្តានេះហើយ ទើបយើងគប្បីជៀសវាងដឹងឮរឿងខាងក្រោមនេះ កុំឲ្យជីវិតកាន់តែដុនដាប៖

១. រឿងរន្ធត់

សម័យបច្ចេកវិទ្យាការចែករំលែករឿងមិនល្អដើរទន្ទឹមគ្នានឹងចំណេះដឹងដូចគ្នា។ រឿងរន្ធត់ដែលមនុស្សចូលចិត្តចែករំលែកនៅលើបណ្ដាញសង្គមភាគច្រើនគឺវីដេអូ ឬរូបភាពមិនសមរម្យពីគ្រោះថ្នាក់ណាមួយដោយមិនបិទបាំងស្នាមរបួស និងឈាម ទោះបីជាគេហាមប្រាមយ៉ាងណាក្ដីការចែករំលែករឿងអពមង្គលទាំងនេះ នៅតែត្រូវគេចែករំលែកដ៏ទូលំទូលាយតាមសារ និងក្រុមឯកជនដដែល។

២. រឿងអមនុស្ស

រឿងអមនុស្សត្រូវចាស់ៗហាមតៗគ្នាទៅហើយ ប៉ុន្តែមនុស្សមួយចំនួននៅតែបន្តជំនះហេតុតែចង់ដឹងចង់ឮ។ រឿងប្រភេទនេះ គេចាត់ទុកជារឿងអវិជ្ជមានព្រោះថាការទស្សនារឿងភ័យខ្លាចបង្កឲ្យមនុស្សមានសុខភាពផ្លូវចិត្តទន់ខ្សោយឆាប់ប្រតិកម្មនឹងរឿងអវិជ្ជមាន ជាងមនុស្សមិនមើលរឿងខ្មោច។

៣. រឿងអ្នកដទៃ

មនុស្សភាគច្រើនចូលចិត្តយកជីវិតរបស់ខ្លួនទៅប្រៀបធៀបនឹងជីវិតអ្នកដទៃ រួចមកអង្គុយតូចចិត្ត បំបាក់កម្លាំងចិត្តខ្លួនឯងទៅវិញ។ ជីវិតមនុស្សម្នាក់ៗមានសុខមានទុក្ខខុសៗគ្នា សូម្បីតែបងប្អូនធំធាត់ជាមួយគ្នា មានជីវិតមិនដូចគ្នាផង ទម្រាំតែអ្នកដទៃទៀត។ ចំណែកឯជម្លោះគ្រួសារគេនោះ ក៏មិនគួរយកមកគិតនាំតែសៅហ្មងដែរ ព្រោះតែវាគឺជារឿងអពមង្គលមិនគួរជាគំរូដល់ជីវិតយើងឡើយ។

៤. ពាក្យសម្ដីអ្នកដទៃ

កុំចង់ដឹងពាក្យសម្ដីមិនបានការអ្នកណាចង់និយាយអ្វីក៏ស្រេចតែគេទៅ ជីវិតរបស់អ្នកមានតម្លៃណាស់ អ្នកត្រូវតែរស់នៅសម្រាប់សេចក្ដីសុខខ្លួនឯង ជាជាងតាមផ្គាប់ចិត្តអ្នកដទៃ។ ដើមដែលគេនិយាយពីអ្នក វាមិនដែរជារឿងល្អនោះទេ ការចង់ដឹងនោះ មិនចំណេញអ្វីក្រៅពីភាពមិនសប្បាយចិត្ត និងនាំឲ្យក្ដៅក្រហាយដល់ចិត្តតែប៉ុណ្តោះ។ បើដឹងថាគេនិយាយដើមហើយ អ្នកគ្រាន់តែកត់ចំណាំមនុស្សប្រភេទនោះទៅ កុំឲ្យថ្ងៃក្រោមរាប់អានចំទៅបានហើយ។

ភាពអវិជ្ជមាន គឺជាឃាតកលាក់មុខជាយូរណាស់មកហើយ ជាក់ស្ដែងផលរំខានទាំងនេះ មិនបង្ហាញភ្លាមៗដូចរលាកទឹកក្ដៅទេ ប៉ុន្តែវាសន្សំម្ដងបន្តិចៗរហូតដល់យកឈ្នះលើជីវិតយើងដោយជោគជ័យ។ សូមចាប់ផ្ដើមជីវិតរឹងមាំជាមួយនឹងផ្លូវចិត្តដ៏ស្រស់បំព្រងរបស់អ្នក ទើបជីវិតអ្នករឹងមាំ និងស្រស់ស្រាយងាយស្រួលកក្នុងការតស៊ូតទៅមុខទៀត៕

អត្ថបទ៖វារី

ចុចអាន៖បុគ្គលមានអំនួតខ្លាំងពេក ឬ មោទនភាពហួសហេតុ នឹងជួបផលអវិជ្ជមាន ៥ នេះ ក្នុងជីវិត

ចុចអាន៖មនុស្សលួចច្រណែនឫស្សា លើអ្នកដែលលើសខ្លួន នឹងជួបឥទ្ធិពលអវិជ្ជមាន ៥ នេះក្នុងជីវិត

The post កុំចង់ដឹងឮរឿងទាំង ៤ នេះ បើមិនចង់ឲ្យជីវិតពោរពេញដោយភាពអវិជ្ជមាន appeared first on Kampuchea Thmey Daily.

តើការខូចចិត្ត ប៉ះពាល់ផ្លូវចិត្តនិងផ្លូវកាយខ្លាំងដល់កម្រិតណា?

សាង ស្រីល័ក្ខ — Tue, 24 May 2022 03:13:05 +0000

មនុស្សមួយចំនួនបានដឹងរួចហើយថា អារម្មណ៍ខូចចិត្តវាពិបាកប៉ុណ្ណា។ ហេតុអ្វីបានអ្នកខ្លះ ស្ទើរតែសម្លាប់ខ្លួន និងធ្វើរឿងឆ្កួតៗជាច្រើនព្រោះតែស្នេហា? សម្រាប់អ្នកដែលមិនដឹង ថ្ងៃនេះយើងខ្ញុំនឹងពន្យល់លម្អិត ពីការខូចចិត្ត ថាតើវាប៉ះពាល់ខ្លាំងកម្រិតណា។

ឥទ្ធិពលការខូចចិត្តមកលើផ្លូវចិត្ត

សេចក្ដីឈឺចាប់ដែលបណ្ដាលមកពីស្នេហានេះ ឈឺខ្លាំងជាងជំងឺក្រពះទៀត វាប្រៀបបានដូចជាអ្នកចងថ្ម ៥០គីឡូជាប់ទ្រូងអញ្ចឹង។ ពិបាកដកដង្ហើម ថប់ទ្រូង ដូចមានប្រហោងក្នុងទ្រូង មានអារម្មណ៍ថាចង់ផុតដង្ហើមម្ដងៗ ហើយទឹកភ្នែកទប់មិនចង់បានទេ។ បានយំម្ដងៗ យំដង្ហក់ យំទប់មិនឈ្នះ បើមានអ្នកលួងទៀតដូចទឹកបាក់ទំនប់។ ការឈឺចាប់មួយដែលធ្វើឲ្យអ្នកមានអារម្មណ៍ថា មួយផែនដីឈឺចាប់តែម្នាក់ឯង។

សរុបមក ការខូចចិត្តមិនថាស្រាលឬធ្ងន់ វាតែងប៉ះពាល់ដល់សតិអារម្មណ៍អ្នកខ្លាំងដល់ថ្នាក់សរសៃប្រសាទទៀតផង កុំថាឡើយចង់សម្លាប់ខ្លួន។

ឥទ្ធិពលការខូចចិត្តមកលើផ្លូវកាយ

អ្នកខ្លះឈឹចាប់រហូតដល់ថ្នាក់ស្រកគីឡូ ១០-២០គីឡូ ក្នុងរយៈពេលខ្លី អ្នកខ្លះឡើងគីឡូ ១០ ២០ គីឡូរយៈពេលខ្លីដូចគ្នា។ ឈឺចាប់ខ្លាំងរហូតដល់ប៉ះទង្គិចប្រព័ន្ធប្រសាទ និងបេះដូង។ មិនឃ្លានបាយទឹក មិនចង់ចេញក្រៅជួបអ្នកណា ដល់ថ្នាក់កើតជំងឺក្រពះ គិតច្រើនឡើងឈឺក្បាលដល់ក្ដៅខ្លួនទៀតផង។ ហើយក៏មានករណីចូលមន្ទីរពេទ្យដាក់អុកស៊ីសែនដែរ ព្រោះគាត់ឈឺចាប់ មិនអាចគ្រប់គ្រងខ្លួនឯងបានដល់ថ្នាក់ថប់ចង់ដាច់ខ្យល់។ ដូចអ្នកដឹងស្រាប់ហើយថា អ្នកខ្លះទៀតធ្វើបាបរាងកាយខ្លួនឯង ឲ្យមានការឈឺចាប់ ដើម្បីសម្រាលការឈឺចាប់ក្នុងចិត្តបានខ្លះ។

មូលហេតុទាំងនេះហើយ ទើបឪពុកម្ដាយមិនចង់ឲ្យកូនជាទីស្រលាញ់របស់គាត់ មានស្នេហាក្មេងខ្ចីឡើយ។ ខ្លាចកូនគ្រប់គ្រងអារម្មណ៍មិនបាន ព្រោះវាពិបាកនឹងទប់ទល់ការឈឺចាប់ណាស់។ កម្ពុជាថ្មីសង្ឃឹមថា អ្នកដែលមិនទាន់ស្គាល់ការឈឺចាប់នេះ អាចពិចារណាក្នុងការមានស្នេហាឲ្យបានម៉ត់ចត់ មនុស្សបែបណាគួរសេពគប់ មនុស្សបែបណាមិនគួរបៀត៕

អត្ថបទ៖ វារី

ចុចអាន៖តើមនុស្សវិកលចរិត គេសម្គាល់បានយ៉ាងដូចម្ដេច?

The post តើការខូចចិត្ត ប៉ះពាល់ផ្លូវចិត្តនិងផ្លូវកាយខ្លាំងដល់កម្រិតណា? appeared first on Kampuchea Thmey Daily.