តាមការផ្សាយរបស់ BBC នៅថ្ងៃអង្គារ ទី២១ ខែកក្កដា ឆ្នាំ២០២៦ ក្នុងចំណោមជនជាប់ចោទទាំង១៩នាក់ មេខ្លោងធំ ដែលជាស្ត្រីវ័យ ៧០ឆ្នាំ ឈ្មោះ Lie Siu Luan ត្រូវផ្តន្ទាទោស ឲ្យជាប់ពន្ធនាគារ យូរជាងគេ ពោលគឺ ៧ឆ្នាំ បន្ទាប់មកគឺ អ្នករៀបចំឯកសារក្លែងបន្លំ Lai Siu Ha ជាប់ ៦ឆ្នាំ និង ៧ខែ។ 

ជនជាប់ចោទ ៣នាក់ ដែលជាអ្នកជ្រើសរើស និងស្វែងរកទារក រួមមានស្ត្រីឈ្មោះ Astri Fitrinika និង Elin Marlina និងបុរសម្នាក់គត់ក្នុងក្រុមឈ្មោះ Djaka Hamdani ក៏ត្រូវផ្តន្ទាទោសដាក់ពន្ធនាគារម្នាក់ៗ ៦ ឆ្នាំ និង ៧ ខែ ផងដែរ។ 

ចំណែក ជនជាប់ចោទ ១៤នាក់ផ្សេងទៀត ដែលជាអ្នកមើលថែ និងតួសម្តែងជាឪពុកម្តាយបង្កើត ត្រូវកាត់ទោសឲ្យជាប់ពន្ធនាគារម្នាក់ៗ ៣ឆ្នាំ និង ៤ខែ។

សូមជម្រាបថា ក្រុមនេះបានប្រើប្រាស់បណ្តាញសង្គម ដើម្បីស្វែងរកឪពុកម្តាយក្រីក្រ ក្នុងខេត្ត West Java ដែលមិនមានលទ្ធភាពចិញ្ចឹមកូន រួចទិញទារកក្នុងតម្លៃចន្លោះពី ៥០០ ទៅ ៨៨០ ដុល្លារអាមេរិក។

ពួកគេបានធ្វើសំបុត្រកំណើត និងឯកសារសុំកូនចិញ្ចឹមក្លែងក្លាយ ខណៈមានសមាជិកខ្លះ ថែមទាំងបានដើរតួជាឪពុកម្តាយបង្កើត ដើម្បីនិយាយវីដេអូខល ជាមួយអ្នកទិញនៅសិង្ហបុរី ទៀតផង។

ទារកទាំងនោះ ត្រូវបានលក់ក្នុងតម្លៃខ្ពស់ រហូតដល់រាប់ពាន់ដុល្លារអាមេរិកក្នុងម្នាក់ៗ ហើយក្នុងចំណោមទារក ៣៤នាក់ មានទារកយ៉ាងតិច ១២នាក់ទៅហើយ ដែលត្រូវបានបញ្ជូនទៅដល់ប្រទេសសិង្ហបុរីរួចជាស្រេច។

បណ្តាញនេះ ធ្វើសកម្មភាពជួញដូរទារកខុសច្បាប់ ចាប់ពីឆ្នាំ ២០២៣ ដល់ឆ្នាំ ២០២៥ ប៉ុន្តែករណីនេះត្រូវបានបែកធ្លាយ និងបង្ក្រាបជាលើកដំបូងក្នុង ខែកក្កដា ឆ្នាំ ២០២៥ នៅពេលសមត្ថកិច្ចឥណ្ឌូណេស៊ី បើកប្រតិបត្តិការឆ្មក់បង្ក្រាប និងឃាត់ខ្លួនក្រុមសង្ស័យជាបន្តបន្ទាប់ ក្រោយមានពាក្យបណ្តឹងពីប្រជាពលរដ្ឋម្នាក់។

ជនជាប់ចោទទាំង ១៩នាក់ ត្រូវបានបញ្ជូនទៅកាត់ទោស នៅតុលាការជាផ្លូវការ ចាប់តាំងពី ខែមេសា ឆ្នាំ២០២៦ រហូតមកដល់មានការប្រកាសសាលក្រមផ្តន្ទាទោសនៅថ្ងៃអង្គារ ទី២១ ខែកក្កដា៕

អត្ថបទ៖ សុវណ្ណ

The post តុលាការឥណ្ឌូណេស៊ី ផ្តន្ទាទោសដាក់ពន្ធនាគារ មនុស្សមួយក្រុម សំណុំរឿង ជួញដូរទារក ៣៤នាក់ឆ្លងដែន ទៅ សិង្ហបុរី appeared first on Kampuchea Thmey Daily.

តាមការផ្សាយរបស់ The Straits Times នៅថ្ងៃសុក្រ ទី៣ ខែកក្កដា ឆ្នាំ២០២៦, ប្រតិបត្តិការនេះ គឺជាផ្នែកមួយនៃការបង្ក្រាបគ្រឿងញៀន របស់ប៉ូលិសឥណ្ឌូណេស៊ី ដែលចាប់អនុវត្ត តាំងពីថ្ងៃទី១ ខែនេះមក។

ទីភ្នាក់ងារប្រឆាំងគ្រឿងញៀនជាតិ ឥណ្ឌូណេស៊ី បានឲ្យដឹងថា កញ្ឆាទាំងនោះ ត្រូវរឹបអូសបាន ក្នុងខេត្ត ជ្វាខាងកើត ដោយវាជាប្រភេទផ្កាកញ្ឆាក្រៀម ដែលគេយកទៅ ផលិតបារីអេឡិចត្រូនិក (Vape)។ វាត្រូវបានលាក់ក្នុងវ៉ាលិស និងប្រអប់ជ័រ ពេលលួចយកចូលប្រទេសឥណ្ឌូណេស៊ី ពីថៃ។

ទីភ្នាក់ងារដដែលបញ្ជាក់ថា ក្រុមរត់ពន្ធគឺជាបណ្តាញជួញដូរគ្រឿងញៀន ដែលទើបបង្កើតថ្មី ហើយក្នុងនោះ មានគ្នា ១២នាក់ រួមទាំងជនបរទេសផងដែរ។

ឥណ្ឌូណេស៊ី ជាប្រទេសមានច្បាប់ប្រឆាំងគ្រឿងញៀន តឹងរ៉ឹងបំផុតមួយនៅលើពិភពលោក ដោយអនុវត្តគោលនយោបាយ គ្មានការអត់ឱនចំពោះបទល្មើសគ្រឿងញៀនគ្រប់ប្រភេទ។

ជនល្មើស អាចប្រឈមមុខនឹងការដាក់ពន្ធនាគាររយៈពេលវែង ការពិន័យជាប្រាក់យ៉ាងធ្ងន់ធ្ងរ រហូតដល់ ទោសប្រហារជីវិតដោយការបាញ់សម្លាប់ ទៀតផង៕

អត្ថបទ៖ សុវណ្ណ

The post ឥណ្ឌូណេស៊ី រឹបអូសកញ្ឆា ៣.៣៧តោន ដែលរត់ពន្ធមកពី ថៃ appeared first on Kampuchea Thmey Daily.

តាមការផ្សាយរបស់ AP, រញ្ជួយដីនេះ មានជម្រៅប្រហែល ១០គីឡូម៉ែត្រ ជាមួយចំណុចកណ្តាល មានចម្ងាយ ៤៣គីឡូម៉ែត្រ ប៉ែកអាគ្នេយ៍ទីក្រុង Palu។

ទន្ទឹមនោះ ក្រុមស្ទាបស្ទង់ភូមិសាស្រ្តអាមេរិក (USGS) បានឲ្យដឹងថា រញ្ជួយដីនេះ បានអង្រួនកោះ Sulawesi បង្កការបំផ្លិចបំផ្លាញ និងបង្ខំឲ្យមនុស្សជាច្រើននាក់ ភ័យស្លន់ស្លោ រត់ចេញពីអគារ ទៅកាន់កន្លែងសុវត្ថិភាព។

ដ្បិតភ្លាមៗ មិនទាន់មានសេចក្តីរាយការណ៍អំពីមនុស្សស្លាប់ និងរបួស ប៉ុន្តែទីភ្នាក់ងារ គ្រប់គ្រងគ្រោះមហន្តរាយជាតិ បានព្រមានថា អាចនឹងមានជនរងគ្រោះ ពីរញ្ជួយដីនេះ។

អ្នកក្រុង Palu បានប្រាប់សារព័ត៌មានក្នុងស្រុកថា ការរញ្ជួយនេះមានកម្លាំងខ្លាំង ធ្វើឲ្យមនុស្សឆោឡោ ហើយភ្ញៀវក្នុងសណ្ឋាគារ ត្រូវបានជម្លៀសចេញទាំងភិតភ័យ។

សូមជម្រាបថា ឥណ្ឌូណេស៊ី ស្ថិតនៅតាមបណ្តោយខ្សែក្រវាត់ភ្លើងប៉ាស៊ីហ្វិក ដែលជាតំបន់​មានសកម្មភាពរញ្ជួយដីខ្ពស់ ដោយសារតែចលនារបស់បន្ទះប្លាកែត។ ប្រទេស​អាស៊ី​មួយនេះ តែងតែជួបប្រទះការរញ្ជួយដី និងបន្ទុះភ្នំភ្លើង ទាមទារការត្រៀមខ្លួនជាបន្ត និងកិច្ចខិតខំប្រឹងប្រែងទប់​ស្កាត់​ជា​និច្ច។

ជាក់ស្តែង កាល​ពី​ខែ​មករា ​ឆ្នាំ​២០២១ គ្រោះរញ្ជួយដីកម្រិត ៦.២រ៉ិចទ័រ បានអង្រួន​កោះ​ Sulawesi ដដែលនេះ ដោយសម្លាប់មនុស្សជាង ១០០នាក់ និង​ធ្វើ​ឲ្យ​ប្រជាជន​រាប់ពាន់នាក់ គ្មានផ្ទះសម្បែង៕

អត្ថបទ៖ សុខ សុវណ្ណ

The post គ្រោះរញ្ជួយដីកម្រិត ៦.៧រ៉ិចទ័រ វាយប្រហារឥណ្ឌូណេស៊ី បង្កការបំផ្លិចបំផ្លាញ appeared first on Kampuchea Thmey Daily.

លោក Budi Hermanto អ្នកនាំពាក្យនគរបាលក្រុងហ្សាកាតា បានឱ្យដឹងថា កម្លាំងសន្តិសុខចម្រុះចំនួន ៤ ១៥១នាក់ ក្នុងនោះរួមមានទាំងទាហាន ៥០០នាក់ផង នឹងត្រូវដាក់ពង្រាយ ដើម្បីជួយគ្រប់គ្រងស្ថានការណ៍បាតុកម្មនេះ ដោយលោកបានអំពាវនាវដល់អ្នកចូលរួមទាំងអស់ កុំឱ្យបំផ្លិចបំផ្លាញទ្រព្យសម្បត្តិសាធារណៈ និងហាមដាច់ខាតការកាន់អាវុធចូលរួម។ ក្រុមសង្គមស៊ីវិល និងសហជីពកម្មករមិនទាន់ចូលរួមនៅក្នុងបាតុកម្មលើកនេះទេ ប៉ុន្តែ​​ការ​ចល័តទ័ពដ៏ច្រើននេះ បានបង្ហាញពីការព្រួយបារម្ភយ៉ាងខ្លាំងរបស់រដ្ឋាភិបាល ព្រោះថា កាលពីឆ្នាំ២០២៥ កន្លងទៅ បាតុកម្មហិង្សារឿងជីវភាពរស់នៅ បានបង្ខំឱ្យលោក Prabowo បណ្ដេញរដ្ឋមន្ត្រីក្រសួងហិរញ្ញវត្ថុចេញពីតំណែងម្តងរួចមកហើយ។

ក្រុមនិស្សិតមកពីសាកលវិទ្យាល័យនានា ជុំវិញរដ្ឋធានីហ្សាកាតា គ្រោងនឹងជួបជុំគ្នា នៅ​រសៀលថ្ងៃនេះ នៅម្ដុំរង្វង់មូល Plaza Indonesia ដែលស្ថិតនៅចម្ងាយប្រហែល ៣គីឡូម៉ែត្រពីវិមានប្រធានាធិបតី។ យោងតាមការលើកឡើងរបស់សហភាពនិស្សិតនៃសាកលវិទ្យាល័យឥណ្ឌូណេស៊ី (BEM UI) សេដ្ឋកិច្ចរបស់ប្រទេស កំពុងតែធ្លាក់ចុះដុនដាបខ្លាំង រហូតធ្វើឱ្យវិនិយោគិនបរទេសដកទុនរត់ ដែលបណ្ដាលឱ្យទីផ្សារភាគហ៊ុនដួលរលំ ហើយប្រាក់ Rupiah បានក្លាយជាលុយដែលធ្លាក់ថ្លៃអាក្រក់បំផុតប្រចាំតំបន់អាស៊ី នៅក្នុងឆ្នាំ២០២៦។ បន្ថែម​ពី​នោះ ក្រុមនិស្សិត បានរិះគន់ចំៗទៀត​ថា រដ្ឋាភិបាលបែរជាធ្វើឱ្យស្ថានភាពកាន់តែអាក្រក់ទៅៗ តាមរយៈការចំណាយថវិកាជាតិខ្ជះខ្ជាយ និងការបាត់បង់ឯករាជ្យភាពរបស់ធនាគារកណ្តាល។

បាតុករមានលក្ខខណ្ឌទាមទារធំៗចំនួន ៥ចំណុច ដោយក្នុងនោះ រួមមាន ការស្នើឱ្យរដ្ឋាភិបាល «បញ្ឈប់ការបំផ្លាញ» ថវិកាជាតិ ព្រមទាំងបញ្ចុះតម្លៃទំនិញប្រើប្រាស់ប្រចាំថ្ងៃ និងតម្លៃប្រេងឥន្ធនៈ។ ថ្វីដ្បិត​រដ្ឋាភិបាលព្យាយាមរក្សាតម្លៃប្រេងដែលមានការឧបត្ថម្ភធនក្ដី ប៉ុន្តែការដំឡើងថ្លៃប្រេងសាំង​​សប្ដាហ៍នេះ ដោយសារតែឥទ្ធិពលនៃសង្គ្រាមលើប្រទេសអ៊ីរ៉ង់ បានធ្វើឱ្យប៉ះពាល់ដល់ជីវភាពប្រជាជនវណ្ណៈកណ្ដាលយ៉ាងខ្លាំង។ លើសពីនេះ ក្រុមនិស្សិតក៏បានទាមទារឱ្យលុបចោលកម្មវិធីផ្ដល់អាហារឥតគិតថ្លៃដ៏ចម្រូងចម្រាស ដែលជាគម្រោងដ៏ធំរបស់លោក Prabowo ផងដែរ បន្ទាប់ពីលោកប្រធានាធិបតី ទើបតែបានបណ្ដេញប្រធានអនុវត្តគម្រោងនេះចេញពីតំណែង ជុំវិញរឿងអាស្រូវពុករលួយកាលពីពេលថ្មីៗនេះ៕

ប្រែសម្រួល៖ ឈាង

The post ឥណ្ឌូណេស៊ី ដាក់ពង្រាយកម្លាំងរាប់ពាន់នាក់ ត្រៀមទប់នឹងបាតុកម្មនិស្សិតប្រឆាំងរដ្ឋាភិបាល appeared first on Kampuchea Thmey Daily.

តាម​សេចក្ដី​រាយការណ៍​របស់​ទីភ្នាក់ងារតាមដានភ្នំភ្លើងជាតិ ដែលត្រូវ​បាន​ចុះផ្សាយ​ដោយ​សារព័ត៌មាន CNA នា​ថ្ងៃ​ទី​៥ ខែ​មិថុនា ឆ្នាំ​២០២៦ នេះ ភ្នំភ្លើង Lewotobi Laki-Laki ដែលស្ថិតនៅលើកោះ Flores បានផ្ទុះឡើងយ៉ាងខ្លាំងនៅវេលា​ម៉ោង ១១ និង ១៥ នាទីព្រឹក ដោយបាញ់ចេញនូវ​កម្ទេចកម្អែល និងផេះភ្នំភ្លើងឡើងលើមេឃកម្ពស់រហូតដល់ ២,៥គីឡូម៉ែត្រ។ ការផ្ទុះដ៏ខ្លាំងនេះ បានកើតឡើង បន្ទាប់ពីមានការផ្ទុះតូចៗជាច្រើនលើក តាំងពីព្រលឹមស្រាងៗមកម៉្លេះ។

ដោយសារតែស្ថានភាពកាន់តែគួរឱ្យព្រួយបារម្ភ អាជ្ញាធរបានដំឡើងកម្រិតប្រកាសអាសន្នដល់កម្រិតខ្ពស់បំផុតទីពីរ និងបានហាមឃាត់ដាច់ខាតមិនឱ្យប្រជាពលរដ្ឋចូលទៅជិតក្នុងរង្វង់ ៥គីឡូម៉ែត្រ ជុំវិញមាត់រណ្ដៅភ្នំភ្លើងឡើយ។ ជាមួយគ្នានេះដែរ ទីភ្នាក់ងារភ្នំភ្លើង ក៏បានព្រមានដល់ប្រជាជនដែលរស់នៅក្បែរដងទន្លេ ឱ្យមានការប្រុងប្រយ័ត្នខ្ពស់ ចំពោះគ្រោះថ្នាក់​កម្អែល​ភ្នំភ្នើង ប្រសិនបើមានភ្លៀងធ្លាក់ខ្លាំង។

លោក Partahian Panjaitan ប្រធានព្រលានយន្តហោះក្នុងតំបន់ បានប្រាប់ថា អាជ្ញាធរ បានសម្រេចចិត្តផ្អាកដំណើរការព្រលានយន្តហោះ នៅក្នុងក្រុង Maumere ដែលស្ថិតនៅចម្ងាយប្រហែល ៦០គីឡូម៉ែត្រពីភ្នំភ្លើងភ្លាមៗ ដែលការបិទនេះ បានប៉ះពាល់ដល់ជើងហោះហើរក្នុងស្រុកចំនួន៥។

សូម​ជម្រាប​ថា ភ្នំភ្លើង ដែលមានកម្ពស់ ១ ៥៨៤​ម៉ែត្រមួយនេះ ធ្លាប់បានផ្ទុះ និងព្រួសផ្សែងយ៉ាងសាហាវកម្ពស់ដល់ទៅ ១៨គីឡូម៉ែត្រ ដែលកាលណោះបានបង្ខំឱ្យលុបចោលជើងហោះហើរអន្តរជាតិរហូតដល់ ២៤ នៅលើកោះទេសចរណ៍បាលី។

ឥណ្ឌូណេស៊ី គឺជាប្រទេសប្រជុំ​កោះដ៏ធំមួយ ដែលតែងតែជួបប្រទះគ្រោះរញ្ជួយដី និងការផ្ទុះភ្នំភ្លើងញឹកញាប់បំផុត ដោយសារតែភូមិសាស្ត្ររបស់ប្រទេសនេះស្ថិតនៅលើតំបន់ «ខ្សែក្រវាត់ភ្លើងប៉ាស៊ីហ្វិក» ឬ​ហៅ​ថា Pacific Ring of Fire៕

ប្រែសម្រួល៖ ឈាង

The post ផ្ទុះ​ភ្នំភ្លើង «Laki-Laki» នៅឥណ្ឌូណេស៊ី ព្រួសផ្សែងខ្មៅពេញមេឃ បង្ខំឱ្យព្រលានយន្តហោះបិទទ្វារបន្ទាន់ appeared first on Kampuchea Thmey Daily.

តាមការផ្សាយរបស់ The Star ដែលដកស្រង់សម្តីរបស់មន្ត្រីនៅប៉ុស្តិ៍សង្កេតការណ៍ ភ្នំភ្លើង Semeru, ភ្នំនេះបានផ្ទុះ ៣ដងទៀត ចន្លោះម៉ោង ១:០៥ នាទីរំលងអធ្រាត្រ ដល់ម៉ោង ៨:៣៧ នាទីព្រឹក ខណៈការផ្ទុះមួយលើកៗ មានរយៈពេល ១០៩-១៤២ វិនាទី។ 

ក្នុងចំណោមការផ្ទុះទាំង៣លើក ការផ្ទុះខ្លាំងបំផុត គឺកើតឡើងនៅម៉ោង ៦:២៨ នាទីព្រឹក ដោយបាញ់ផេះឡើងលើមេឃកម្ពស់ ១ ០០០ម៉ែត្រ និងបង្ខំឲ្យពលរដ្ឋនៅជុំវិញនោះ ជម្លៀសខ្លួន ជាបណ្តោះអាសន្ន សិន។

កាលពីដើមខែនេះ  ភ្នំភ្លើង Semeru ក៏ផ្ទុះដែរ ដោយបាញ់ផេះ ឡើងលើមេឃកម្ពស់ ៩០០ម៉ែត្រ បណ្តាលឲ្យអាជ្ញាធរ ចេញការប្រកាសអាសន្នកម្រិត ៣ និងព្រមានពលរដ្ឋ នៅឲ្យឆ្ងាយរង្វង់ ១៣គីឡូម៉ែត្រ ពីភ្នំភ្លើងនេះ។

មុនពេលផ្ទុះ ទិន្នន័យអង្កេត បង្ហាញថា ភ្នំភ្លើង Semeru ដែលស្ថិតក្នុងខេត្ត ជ្វាខាងកើត បានរង្គើដល់ទៅ ១៨ដង។

សូមជម្រាបថា Semeru ស្ថិតក្នុងចំណោមភ្នំភ្លើងសកម្មជិត ១៣០ភ្នំរបស់ ឥណ្ឌូណេស៊ី។ ការផ្ទុះដ៏ធំលើកចុងក្រោយរបស់ភ្នំនេះ គឺកាលពីឆ្នាំ២០២១ ដែលបានសម្លាប់មនុស្ស ៥១នាក់ និងរបួសរាប់រយនាក់ ហើយជម្លៀសមនុស្សជាង ១០ ០០០នាក់៕

អត្ថបទ៖ សុខ សុវណ្ណ

The post ភ្នំភ្លើង Semeru នៅ ឥណ្ឌូណេស៊ី ផ្ទុះ ៣ដងទៀតហើយ បង្ខំឲ្យជម្លៀស មនុស្សជាបន្ទាន់ appeared first on Kampuchea Thmey Daily.

តាមការផ្សាយរបស់ BBC, ភ្នំភ្លើង Dukono លើកោះ Halmahera បានផ្ទុះនៅម៉ោង ៧:៤១ នាទីព្រឹក ថ្ងៃសុក្រ ទី៨ ខែឧសភា ឆ្នាំ២០២៦ បាញ់ផេះឡើងលើមេឃ កម្ពស់ ១០គីឡូម៉ែត្រ។

ឥទ្ធិពលរបស់វា បានឆក់យកជីវិតមនុស្ស ៣នាក់ ក្នុងនោះមាន ២នាក់ ជាទេសចរជនជាតិសិង្ហបុរី និងម្នាក់ទៀត ជាអ្នកស្រុក។ យ៉ាងណា គេមិនទាន់អាចយកសព របស់អ្នកទាំង៣ ចេញមកបានទេ។ 

តាមការបញ្ជាក់ពីមន្ត្រីក្នុងតំបន់, អ្នកឡើងភ្នំមួយក្រុមនេះ មានគ្នា២០នាក់ មិនបានអើពើនឹងបម្រាម របស់អាជ្ញាធរឡើយ ដោយពួកគេនៅតែផ្គើន ធ្វើដំណើរឡើងភ្នំ ទាំងដែលមានហានិភ័យខ្ពស់។ ពេលនេះ ក្រុមសង្គ្រោះ កំពុងតាមរកអ្នកដែលជាប់នៅលើនោះ។

Dukono គឺជាភ្នំភ្លើងដែលសកម្មមួយ និងមានប្រជាប្រិយភាពបំផុត សម្រាប់អ្នកឡើងភ្នំនិងទេសចរ។ វាបានផ្ទុះជិត ២០០ដងហើយ បើគិតចាប់តាំងពីចុងខែមីនាមក។

បច្ចុប្បន្ន ភ្នំនេះ ត្រូវបានដាក់បញ្ចូលក្នុងកម្រិតទី ២ នៃប្រព័ន្ធព្រមានកម្រិតអាសន្នភ្នំភ្លើង ទាំង ៣ របស់ ទីភ្នាក់ងារភ្នំភ្លើងនៃប្រទេស ឥណ្ឌូណេស៊ី ដែលបង្ហាញពីការកើនឡើងនៃសកម្មភាព និងតម្រូវឱ្យមានការប្រុងប្រយ័ត្នខ្ពស់៕

អត្ថបទ៖ សុខ សុវណ្ណ

The post ភ្នំភ្លើងឥណ្ឌូណេស៊ី ផ្ទុះយ៉ាងកំណាច សម្លាប់មនុស្ស ៣នាក់ ខណៈអ្នកឡើងភ្នំជាង ១០នាក់ ជាប់នៅលើនោះ appeared first on Kampuchea Thmey Daily.

តាមការផ្សាយរបស់ The Star, នៅឥណ្ឌូណេស៊ី ភ្នំភ្លើង Semeru ដែលជាភ្នំភ្លើងដ៏គ្រោះថ្នាក់ និងសកម្មបំផុតមួយ បានផ្ទុះនៅម៉ោង៨ព្រឹក បាញ់ផេះ ឡើងលើមេឃកម្ពស់ រហូតដល់ទៅ ៩០០ម៉ែត្រ បណ្តាលឲ្យអាជ្ញាធរ ចេញការប្រកាសអាសន្នកម្រិត ៣ និងព្រមានពលរដ្ឋ នៅឲ្យឆ្ងាយរង្វង់ ១៣គីឡូម៉ែត្រ ពីភ្នំភ្លើងនេះ។

មុនពេលផ្ទុះ ទិន្នន័យអង្កេត បង្ហាញថា ភ្នំភ្លើង Semeru ដែលស្ថិតក្នុងខេត្ត ជ្វាខាងកើត បានរង្គើដល់ទៅ ១៨ដង។

ចំណែក នៅហ្វីលីពីនឯណោះ ក៏កើតមានគ្រោះផ្ទុះភ្នំភ្លើងដែរ ដោយបង្ខំឲ្យមនុស្សរាប់ពាន់នាក់ ត្រូវជម្លៀសខ្លួន ជាបន្ទាន់ និងប្រកាសអាសន្ន កម្រិត៣ ដូចគ្នា។

យោងតាមវិទ្យាស្ថានភ្នំភ្លើងវិទ្យារបស់ហ្វីលីពីន, ភ្នំភ្លើង Mayon បានផ្ទុះ បង្ខំឲ្យមនុស្សជិត ១ ៥០០គ្រួសារ ត្រូវជម្លៀសជាបន្ទាន់ ទៅកាន់មជ្ឈមណ្ឌលជម្លៀសបណ្តោះអាសន្ន។

ស្ថាប័ននេះ បានឲ្យដឹងថា​ ភ្នំភ្លើងបានបាញ់ផេះ ជះគ្របលើខេត្ត Albay បង្កជាផលប៉ះពាល់ខ្លាំងគួសម ហើយចេញការព្រមានអំពីបំណាក់ដី និងលំហូរនៃកម្អែភ្នំភ្លើងផងដែរ។

លើសពីនេះ ហ្វីលីពីន បានដាក់បំរាម មិនឲ្យនរណាម្នាក់ ចូលទៅក្នុងតំបន់គ្រោះថ្នាក់ រង្វង់៦គីឡូម៉ែត្រ ជុំវិញភ្នំភ្លើងនេះ ដាច់ខាត៕

អត្ថបទ៖ សុខ សុវណ្ណ

The post អាស៊ាន ២ប្រទេស ជួបគ្រោះផ្ទុះភ្នំភ្លើង ឈានដល់ប្រកាសអាសន្ន និងជម្លៀសពលរដ្ឋ បន្ទាន់ appeared first on Kampuchea Thmey Daily.