មនុស្សអវិជ្ជមាន Archives - Kampuchea Thmey Daily

បើមិនចង់អន្តរាយ កុំយកខ្លួនបៀតមនុស្ស ៧ ប្រភេទនេះឲ្យសោះ

សាង ស្រីល័ក្ខ — Mon, 25 Jul 2022 07:10:41 +0000

ការសេពគប់មនុស្ស ត្រូវឲ្យចៀសឆ្ងាយពីប្រភេទបុគ្គលអវិជ្ជមាន មួយថ្ងៃៗបើកភ្នែកបើកមាត់សម្លឹងរាងកាយអ្នកដទៃ ដើម្បីនិយាយដើម។ ប្រសិនបើអ្នករាប់អានប៉ះមនុស្សប្រភេទនេះ គួរចៀស ហើយបើកំពុងសេពគប់គួរបញ្ឈប់ភ្លាម បើមិនចង់ឲ្យជីវិតជួបភាពអន្តរាយទៅថ្ងៃមុខ។

១ មនុស្សពូកែចាក់រុក និយាយដើម

ប្រភេទនេះមិនគិតរកសុខដាក់ខ្លួនឡើយ ថ្ងៃណាក៏យកភ្លើងមកដាក់លើទ្រូងខ្លួនឯង និយាយដើមគេលិចកើត ហើយតាំងកើតទុក្ខមិនសុខចិត្តតែខ្លួនឯង។ អស់ពីនិយាយដើមគេ ក៏តែងតាំងខ្លួនឯងជាអ្នកល្អផូរផង់ ផូសលើបណ្ដាញសង្គមថាបុគ្គលនេះមិនល្អ បុគ្គលនោះមិនល្អឡើយ។ បើដើរជួបឬរាប់អានប៉ះ សូមចៀសឆ្ងាយឲ្យបាន ជីវិតមិនមែនជាល្បែងសម្រាប់ពពួកក្រុមនិយមនិយាយដើមគេទេ។

២ មនុស្សចរិតតួឯក

មនុស្សប្រភេទនេះនៅកន្លែងណាក៏មានដែរ! កាន់តែគេចកាន់តែជួប ពពួកនេះពូកែសម្ដែងទួញសោក សុខភាពរាបសាមុខគេឯង ក្រោយខ្នងវិញសឹងថាយកកាំបិតមកចាក់ទម្លុះមិត្តណាដែលលើសគេ។ នៅមុខយើងសើចញឹមៗ ស្ងេញៗ ដូចគ្មានទុក្ខភ័យ តែក្នុងចិត្តសឹងថាខាំត្របាក់អ្នកណាបានខ្ពស់ជាងល្អជាងប៉ុណ្ណោះ។

៣ មនុស្សលោភលន់អំណាច

កន្លែងណាក៏ដោយ បើមានមនុស្សនេះរស់នៅគឺដូចក្នុងរឿងភាគ កាប់សម្លាប់គ្នាឥតឈប់ឈរ ព្រោះតែតណ្ហានៃអំណាចដឹកមុខ។ មនុស្សប្រភេទនេះមិនចេះស្កប់ស្កល់ទេ បានមួយចង់បានពីរ ធ្វើយ៉ាងម៉េចគឺឲ្យលើសគេ ធំជាងគេ ខ្លាំងជាងគេ ហើយក៏ត្រូវតែមានមនុស្សកោតខ្លាចគោរពគេដូចបងធំដែរ។ អ្នកណាមិនចូលសង ក៏ស្លាប់ខ្លួន អ្នកណាពូកែវ៉ៃអេបស៊ីអប ទ្រឈ្មោះឲ្យល្អផូរផង់ ក៏រស់បាននៅក្រោមអំណាចរបស់គេនេះហើយ។

៤ មនុស្សមានអំនួត

អំនួតនេះ និយាយឲ្យអស់សេចក្ដីបុគ្គលណាក៏មានវាក្នុងខ្លួនដែរ។ ប៉ុន្តែអំនួតមានតិចឬច្រើនអាស្រ័យលើបុគ្គលនោះ។មនុស្សអំនួតក៏មិនខុសពីមនុស្សលោភលន់អំណាចដែរ។ អ្វីក៏ដោយ ឲ្យតែលើសពេក ខ្ពស់ពេក គឺមិនល្អទាំងអស់នោះទេ។ បើអំនួតពេក ថ្ងៃណាមួយគង់តែអស់លក្ខណ៍ ធ្លាក់មកបាក់កចោលខ្លួនអាសាបង់ទេ។

៥ មនុស្សចូលចិត្តបំប៉ោងព័ត៌មាន

រឿងតូចធ្វើឲ្យក្លាយជារឿងធំ និយមបង្កចលាចលនាំឲ្យមានបញ្ហាឈឺក្បាលឥតស្វាង សុទ្ធតែស្ថិតក្នុងក្រុមមនុស្សចូលចិត្តបំប៉ោងព័ត៌មាន ដែលអ្នកក៏គួរចៀសឲ្យឆ្ងាយដែរ។ រឿងខ្លះមិនមែនជារឿង ឬបញ្ហាខ្លួនឯងទេ តែចូលចិត្តឈឺឆ្អាលបង្កើតបក្សពួកឲ្យគេឈ្លោះគ្នា ហើយអង្គុយទះដៃអបអរសើចញញឹមលាក់គំនួច។ មនុស្សកម្សោយប្រជ្ញានេះ នៅទីណាក៏មាន កន្លែងណាក៏មាន បើរាប់អានជួបសឹងថាស្មារលាកុំឲ្យជួបមួយជីវិត។

៦ មនុស្សមិនចេះស្គាល់កំហុសមិនចេះសុំទោស

កំហុសអ្នកណាក៏ធ្លាប់បង្កឲ្យមាន គ្មានបុគ្គលណាមិនចេះខុស។ ប៉ុន្តែខុសត្រូវដាក់ខ្លួន ស្គាល់ពីកំហុសខ្លួនឯង ហើយសុំទោសទៅ គឺរឿងនឹងប្រែជាល្អប្រសើរវិញហើយ។ កុំតាំងខ្លួនខ្ពស់ជាងគេ មានជាងគេ អាយុច្រើនជាងគេ ខ្លាំងជាងគេមិនខ្លបខ្លាចខ្ចិលសុំទោស ហើយទុកឲ្យរាលដាលពាសពេញ រហូតកើតរឿងធំទប់ស្កាត់លែងជាប់។ សុំទោស ប្រយោគនេះមានន័យតែពីរម៉ាត់ ស្រាលដូចសំឡី តែមានទំងន់សម្រាប់អ្នកដែលយើងសាងកំហុសលើគេ។

៧ មនុស្សពូកែតម្អូញ

អ្នកណាក៏មានបញ្ហាផ្ទាល់ខ្លួន មានទុក្ខសោកនៃជីវិតមកជាមួយដែរ។ មានជីវិតលើផែនដីនេះ ប្រាដកជាមានទុក្ខហើយ!សំខាន់ត្រូវចេះគ្រប់គ្រងអារម្មណ៍ រៀនបែងចែកបញ្ហាផ្ទាល់ខ្លួន និងរឿងការងារផ្សេងគ្នា។ កុំទម្លាប់យករឿងឈឺក្បាលមកដាក់លើមិត្តរួមការងារ ឬអ្នកណាក៏ដោយ យូរៗទៅអ្នកជុំវិញក៏ធុញទ្រាន់ សឹងមិនចង់រាប់អានឡើយ។ មនុស្សនេះរកភាពសុខសប្បាយមិនឃើញឡើយក្នុងជិវិត ព្រោះមិនចេះស្គាល់អ្វីទៅជាក្ដីសុខ និងមិនទម្លាប់រៀនបង្កើតក្ដីសុខដោយខ្លួន។ម្ងៃៗរស់ពឹងលើក្ដីសុខគេ សូម្បីតិចតួចក៏ត្រូវសួរគេ ហើយក៏ទ្រហោរថា គ្មានក្ដីសុខទេសម្រាប់ជីវិតនេះ។

សរុបជារួម អត្តចរិតរបស់មនុស្សមានខុសៗគ្នា គ្មានបុគ្គលណាល្អជាងអ្នកណាឡើយ។ ប៉ុន្តែត្រូវចងចាំថា គ្រប់គ្នាមានដង្ហើមលើផែនដីនេះ សុទ្ធតែមានបញ្ហាជារបស់ខ្លួនទាំងអស់។ សំខាន់ត្រូវចេះដោះស្រាយ ហើយរក្សាចិត្តឲ្យសប្បាយ កុំទម្លាប់យកក្ដីសុខអ្នកជុំវិញមកប្រៀនធៀបនឹងជីវិតខ្លួនឯង រហូតមានចរិតអាក្រក់ជាប់ខ្លួន ដើរតែរិះគន់គេឥតឈប់។ កុំរវល់តែសម្លឹងគេ រហូតភ្លេចកសាងចំណេះខ្លួនឯង គេដើរដល់ណាហើយ ឯងវិញនៅត្រឹមហ្នឹងដដែល ទាំងដែលពេលខ្លះឡើងមកដល់ចំណុចនេះ ស្មើគេសោះ៕

សាង ស្រីល័ក្ខ

ចុចអាន៖៥ វិធី ដោះស្រាយជាមួយមនុស្សគ្មានសីលធម៌ ពូកែជីកកកាយ តែរឿងផ្ទាល់ខ្លួនគេ

ចុចអាន៖មនុស្ស ៥ ប្រភេទ ក្នុងសង្គមសព្វថ្ងៃ បើសេពគប់នាំជីវិតរឹតស្មុគស្មាញ

The post បើមិនចង់អន្តរាយ កុំយកខ្លួនបៀតមនុស្ស ៧ ប្រភេទនេះឲ្យសោះ appeared first on Kampuchea Thmey Daily.

មនុស្ស ៥ ប្រភេទ ក្នុងសង្គមសព្វថ្ងៃ បើសេពគប់នាំជីវិតរឹតស្មុគស្មាញ

សាង ស្រីល័ក្ខ — Tue, 05 Jul 2022 04:48:49 +0000

គ្មានមនុស្សឯណាមានឆន្ទៈ និងសុខចិត្តរស់នៅក្នុងជីវិតដ៏ស្មុគស្មាញនោះទេ។ យើងម្នាក់ៗ ប្រាកដជាព្យាយាម ចៀសវាងវាមិនខានទេ។ ជាពិសេសសូម្បីតែស្រមៃ ក៏ធ្វើឲ្យអ្នកវិលមុខ និងឈឺក្បាល ដោយសារតែមនុស្សបែបនេះចូលមកពាក់ព័ន្ធក្នុងជីវិតដែរ។

ទោះជាយ៉ាងណាក៏ដោយ ជីវិតដ៏ស្មុគស្មាញ និងមានបញ្ហា ក៏អាចបណ្តាលមកពីរង្វង់នៃការសេពគប់របស់យើងដែរ។ ប្រសិនបើសព្វថ្ងៃនេះ មិត្តអ្នកអានកំពុងតែសេពគប់មនុស្សដែលមានចរិត និងអាកប្បកិរិយាមិនល្អ គួរចាប់ផ្ដើមដកខ្លួនចេញពីពួកគេជាជាងលង់ខ្លួន។

ខាងក្រោមនេះ គឺជាមនុស្ស ៥ ប្រភេទ ដែលអាចធ្វើឲ្យជីវិតកាន់តែស្មុគស្មាញលើសមុន។

១ ប្រភេទមនុស្សដែលចង់ដឹងចង់ឃើញ ពីជីវិតគេខុសរឿង

អត្ថិភាពរបស់មនុស្សគ្រប់គ្នា ត្រូវតែស្គាល់និងដឹងឮនៅក្នុងបរិយាកាសជុំវិញ ដូចអ្នកសារព័ត៌មានមួយរូបដែរ។ ប៉ុន្តែប្រសិនបើសូម្បីតែព័ត៌មានខ្លះ ជារឿងផ្ទាល់ខ្លួនរបស់យើងឬអ្នកផ្សេងសោះ តែបុគ្គលនេះបែរជាចេះដឹង និងជជីកសួរ ធ្វើដូចជាអាណាព្យាបាលយើង។ តើគូរមានវិធានការបែបណា ចំពោះពួគគេ? ទន្ទឹមនោះ ការនៅក្នុងរង្វង់មិត្តភ័ក្តិប្រភេទនេះ អាចជាមូលហេតុដែលធ្វើឲ្យជីវិតរបស់អ្នកកាន់តែស្មុគស្មាញ ដោយមិនដឹងខ្លួន។ ព្រោះគេនឹងរកឃើញគ្រប់យ៉ាង ដែលកើតឡើងចំពោះអ្នក រួមទាំងការបន្តរុករកបញ្ហាផ្ទាល់ខ្លួន យើងថែមទៀត។ នេះហៅថាឈ្លានពានឯកជនភាពហើយ បើជួបឬសេពគប់ប៉ះ គួរតែដកខ្លួនទៅ។

២ ប្រភេទមនុស្សយកស្តង់ដារមកវាស់វែង

មិនមានអ្វីខុសឡើយ ជាមួយនឹងស្តង់ដារនៃភាពល្អឥតខ្ចោះ។ នេះអាចធ្វើឲ្យអ្នកបន្តកែលំអខ្លួនឯង ដើម្បីក្លាយជាបុគ្គលម្នាក់ ដែលអាចធ្វើឲ្យជីវិតកាន់តែប្រសើរនាពេលអនាគត។ ទោះយ៉ាងណាក៏ដោយ វាក៏មានដែនកំណត់របស់វាដែរ ។ កុំទុកឲ្យខ្លួនឯងត្រូវបានបង្ខាំងខ្លួនថា ជាអ្នកមានភាពល្អឥតខ្ចោះ។ ការបង្កើតមិត្តជាមួយប្រភេទមនុស្សដែលឈ្លក់វង្វេងនឹងគំនិតដ៏ល្អឥតខ្ចោះ គឺជាមូលហេតុមួយដែលអាចធ្វើឲ្យជីវិតអ្នកកាន់តែស្មុគស្មាញ។ ចំណង់ចំណូលចិត្តខ្ពស់របស់គាត់ ជាមួយនឹងភាពល្អឥតខ្ចោះ អាចរារាំងអ្នកពីការច្នៃប្រឌិត។ រាល់ជំហានដែលអ្នកធ្វើ គឺតែងតែបញ្ចេញមតិដោយបុគ្គលនោះជានិច្ច។

៣ ប្រភេទមនុស្សគិតអវិជ្ជមាន

និយាយឲ្យទូលំទូលាយ របៀបគិតរបស់មនុស្សអាចបែងចែកជាពីរ។ មានមនុស្សមួយចំនួន ដែលតែងតែមានការគិតវិជ្ជមាន ឬការគិតវិជ្ជមាន។ ខណៈពេលដែលអ្នកផ្សេងទៀត មានទំនោរទៅរកការគិតអវិជ្ជមាន ឬការគិតវិជ្ជមាន។ ការរស់នៅក្នុងរង្វង់មនុស្សដែលតែងតែគិតអវិជ្ជមាន អាចធ្វើឲ្យជីវិតរបស់អ្នកកាន់តែស្មុគស្មាញ។ រឿងតូចតាចដែលអ្នកធ្វើតែងតែត្រូវបានគេវាយតម្លៃថាអាក្រក់។ ជាពិសេស ប្រសិនបើអ្វីដែលអ្នកធ្វើ ច្រើនស្របតាមការចង់បានរបស់គេវិញ។

៤ ប្រភេទមនុស្សដើរតួជាជនរងគ្រោះ

តួអង្គដែលមានអាកប្បកិរិយាជាជនរងគ្រោះ តែងមានគ្រប់មធ្យោបាយដើម្បីសង្គ្រោះខ្លួនពីស្ថានការណ៍ដ៏អាក្រក់បំផុត សូម្បីតែរត់ពីកំហុស ដែលខ្លួនបានធ្វើ ក៏គេធ្វើបានដែរ។ អ្នកដែលចូលចិត្តលេងជាតួជនរងគ្រោះ ជាមនុស្សមួយប្រភេទដែលអាចធ្វើឲ្យជីវិតអ្នកកាន់តែស្មុគស្មាញ និងធុញថប់លើសមុន។ ការសេពគប់ឬនៅជិតពួកគេ អ្នកនឹងក្លាយជាគោលដៅរបស់គេ សម្រាប់ធ្វើរឿងណាមួយ ដែលពួកគេចង់បានតែប៉ុណ្ណោះ។

៥ ប្រភេទបង្កើតបក្សពួក ឬក្រុមនិយាយដើម

ការអង្គុយជុំគ្នាពេលនិយាយពីអ្នកដទៃ សម្រាប់មនុស្សមួយចំនួនគឺជាការរីករាយខ្លាំងណាស់។ អ្វីដែលសំខាន់ គឺត្រូវជជែកលេងសើច និងនិយាយដើមគេឲ្យបានសប្បាយចិត្ត។ ការធ្វើមិត្តជាមួយនឹងប្រភេទអ្នកនិយាយដើម ដូចឲ្យនាំខ្លួនឯងឲ្យផុងតែរឿងឥតបានការ។ អាកប្បកិរិយាមនុស្សប្រភេទនេះ អាចធ្វើឲ្យជីវិតរបស់អ្នកកាន់តែស្មុគស្មាញ។ ជាពិសេស ប្រសិនបើពួកគេបញ្ចេញបញ្ហាឯកជនភាពរបស់អ្នក នៅក្នុងការជជែកនោះ ហើយគិតថាជារឿងសប្បាយរបស់ពួកគេវិញ។

សរុបជារួមទៅ ជីវិតអាចនឹងកាន់តែស្មុគស្មាញ គឺដោយសារតែកំហុសរបស់យើង ក្នុងការជ្រើសរើសមិត្ត។ បើជួបមនុស្សទាំង៥ប្រភេទខាងលើ ត្រូវចៀសឲ្យឆ្ងាយ តាមដែលអាចធ្វើទៅបានហើយ៕

ប្រែសម្រួល៖ សាង ស្រីល័ក្ខ

ចុចអាន៖ឈប់សង្ស័យ! បុគ្គលណាអវិជ្ជមានគួរដកខ្លួនឆាប់ បើមិនចង់អន្តរាយដល់ខ្លួន

ចុចអាន៖ជឿអត់! អ្នកនិយមតាមដានរឿងរ៉ាវជីវិតគេជាងជីវិតខ្លួន គឺមានជំងឺផ្លូវចិត្តធ្ងន់ធ្ងរ

The post មនុស្ស ៥ ប្រភេទ ក្នុងសង្គមសព្វថ្ងៃ បើសេពគប់នាំជីវិតរឹតស្មុគស្មាញ appeared first on Kampuchea Thmey Daily.

ជឿអត់! អ្នកនិយមតាមដានរឿងរ៉ាវជីវិតគេជាងជីវិតខ្លួន គឺមានជំងឺផ្លូវចិត្តធ្ងន់ធ្ងរ

សាង ស្រីល័ក្ខ — Thu, 19 Aug 2021 06:27:21 +0000

បើទោះបីជាការនិយាយលេងសើច (និយាយដើម) ពីរឿងរ៉ាវរបស់អ្នកដទៃជាការកម្សាន្ត ឬជាទម្លាប់ពីកំណើតក្ដី។ តែនេះក៏អាចជារោគសញ្ញាមួយទៀត នៃជំងឺផ្លូវចិត្តដែលមាន ប៉ុន្តែក្រុមមនុស្សទាំងនោះ ជួនមិនដឹងថាខ្លួនមានជំងឺនេះទេ។

ការចេះដឹងរឿងគេជ្រុលនិយម ឬពូកែចាត់ចែងឲ្យជីវិតគេទៅខាងនេះខាងនោះតាមចិត្តខ្លួនចង់បាន ធ្វើឲ្យបញ្ហាផ្លូវចិត្តបុគ្គលនោះនឹងកាន់តែស្មុគស្មាញខ្លាំង។ ដោយសារម្ង៉ៃៗគេពូកែយករឿងអ្នកដទៃមកដាក់លើទ្រូងឯង នាំឲ្យក្ដៅរហូតកើតជានៅមិនសុខដេកមិនលក់ បើមិនបាននិយាយរឿងឬចាត់ចែងអ្នកណាម្នាក់ឲ្យសមគំនិតគេចង់បាន គេនឹងមានសំពាធអារម្មណ៍កើតមានអត់ដឹងខ្លួន។ អ្នកខ្លះជួននៅមិនសុខ ធ្វើការមិនបាន ព្រោះខួរក្បាលស្តុកទុកតែរឿងគេជាងរឿងខ្លួន។

តាមពិតនេះគ្រាន់តែជាផ្នែកមួយ នៃជីវិតបុគ្គលនិយមយករឿងគេមកចែកចាយ ជាត្រាវចម្អែតមាត់ពួកគេប៉ុណ្ណោះ។ តែមួយផ្នែកទៀតគឺប៉ះពាល់ផ្លូវអារម្មណ៍ បុគ្គលដែលរួមស្ដាប់ជាមួយពួកគេ។ អ្នកខ្លះអាចទន់ខ្សោយផ្លូវចិត្ត ពេលស្ដាប់ហើយប្រែជាមិនសប្បាយចិត្ត ភ្លាមមួយរំពេចក៏មាន។ នេះក៏ដោយសារជីវិតពួកគេហ៊ុមព័ទ្ធដោយបុគ្គលបង្កើតគ្រុប បង្កើតបក្សពួកនិយមនិយាយដើមអ្នកជុំវិញ តើមានន័យអីទៀត ដែលសុខភាពផ្លូវចិត្តរឹងមាំបាន។

ទម្លាប់យករឿងគេមកចែកចាយជាក្រុមជាបក្ស យូរៗទៅរាងកាយនឹងទ្រុឌទ្រោម ឬញៀននឹងការនិយាយដើមអ្នកផងទាំងពួង មិនលើកលែងសូម្បីមេកោយខ្លួនឯង។ អ្នកខ្លះឃើញសមាជិកថ្មីចូលមកធ្វើការ ក៏ទៅរាក់ទាក់ដូចចង់រាប់អាន។ តាមពិតទៅអត់ទេ! ពួកគេមកស៊ើបដើម្បីចង់ដឹងពីអ្នកចំណូលថ្មី ដើម្បីងាយស្រួលយកចុះចូលជាក្រុមតែមួយ។

បើសិនបានជួបឬរាប់អានបុគ្គលមួយថ្ងៃៗប្រមូលផ្ដុំតែនិយាយរឿងគេ ចូរប្រញាប់ដកខ្លួនឆាប់។ នៅពេលអ្នកនៅជិតបុគ្គលអស់នោះ មានតែធ្វើឲ្យរាងកាយទទួលបានតែរឿងអវិជ្ជមាន និងបន្ទុកដែលពួកគេដាក់មកប៉ុណ្ណោះ។ ជាពិសេសបើស្ដាប់រឿងឥតបានការនេះច្រើន ធ្វើឲ្យកើតជំងឺផ្លូវចិត្តតាមពួកគេ ហើយកើតជាថប់បារម្ភ មានបញ្ហានៃការគេង នឹកឃើញតែរឿងដដែលៗ និងមានអារម្មណ៍សោកសៅទៅតាមដែរ៕

អត្ថបទ៖ សាង ស្រីល័ក្ខ

ចុចអាន៖ទ្រឹស្ដីព្រះពុទ្ធ៖ លក្ខណ:សម្បត្តិ ៥យ៉ាងនៃអ្នកស្ដាប់ដ៏ល្អម្នាក់

ចុចអាន៖កុំមើលរំលង! សញ្ញានៃជំងឺភ័យស្លន់ស្លោឬថប់បារម្ភ ជាស្ថានភាពផ្លូវចិត្តគ្រោះថ្នាក់ខ្លាំង បើមិនឆាប់ព្យាបាល

ចុចអាន៖ឃាតកផ្លូវចិត្ត ៣ ប្រភេទ សម្លាប់មនុស្សមិនរើសមុខ គេឯងតែងយល់ច្រឡំថា ជាជំងឺប្រចាំកាយ

The post ជឿអត់! អ្នកនិយមតាមដានរឿងរ៉ាវជីវិតគេជាងជីវិតខ្លួន គឺមានជំងឺផ្លូវចិត្តធ្ងន់ធ្ងរ appeared first on Kampuchea Thmey Daily.

ឈប់សង្ស័យ! បុគ្គលណាអវិជ្ជមានគួរដកខ្លួនឆាប់ បើមិនចង់អន្តរាយដល់ខ្លួន

សាង ស្រីល័ក្ខ — Tue, 08 Jun 2021 09:06:58 +0000

មនុស្សអវិជ្ជមានតែងនាំទុក្ខ នាំភ្លើង សន្សំតែរឿងក្ដៅចិត្តក្ដៅទ្រូងចូលមកក្នុងខ្លួនយើង មិនចេះចប់មិនចេះតែប៉ុណ្ណោះ។ តើចាំបាច់អីដែលយើង ត្រូវនៅក្បែរ ខាតពេលជាមួយធ្វើអ្វី។

បើសព្វថ្ងៃនេះអ្នកកំពុងជួបមនុស្សប្រភេទនេះ សូមប្រញាប់ដកខ្លួនជាប្រញាប់ បើមិនចង់ឲ្យខ្លួនអន្តរាយជាប់ឈ្មោះតាមជាមួយពួកគេ។

មនុស្សយើងគ្រប់គ្នា អ្នកណាក៏មានភាពអាក្រក់រៀងៗខ្លួនដែរ គ្មានអ្នកណាល្អជាងអ្នកណាឡើយ។ សំខាន់តើយើងគួរប្រើភាពអាក្រក់របស់យើងទៅបំផ្លាញអ្នកដទៃដែរទេ? គួរឬមិនគួរយើងមានតែត្រិះរិះពិចារណាគិតខ្លួនឯង។

តួយ៉ាងចំពោះមនុស្សអវិជ្ជមានឬហៅម៉្យាងទៀតថា បុគ្គលគិតតែរឿងមិនល្អគ្មានចិត្តជ្រះថ្លាពីខាងក្នុង ចូលចិត្តធ្វើអ្វីប្លែកៗឥតទំនង បង្ករឿងបង្កតែភាពក្ដៅក្រហាយដល់អ្នកដទៃឥតឈប់ឈរ។

បើអ្នកបានជួប សូមចៀសឆ្ងាយ កាន់តែឆ្ងាយកាន់តែល្អ! បើអ្នកនៅជិតគ្មានអីក្រៅពីចម្លងស្ទាយអាក្រក់ៗពីគ្នាតែប៉ុណ្ណោះ! ស្ទាយល្អៗ គំនិតជួយសង្គម សាងភាពរីករាយដល់មនុស្ស ម៉េចមិនចម្លងមិនធ្វើតាមគ្នា។

ត្រូវគិតថា សង្គមមួយនេះដើរដល់ណាហើយ មិនមែននៅត្រាំត្រែងជាមួយភាពអវិជ្ជមានមួយជីវិតឡើយ។ ប្រញាប់ក្រោកឡើងសាងសុភមង្គលដល់ខ្លួនឯង កុំមានទំនោរទោរទន់តាមកម្ម តាមមនុស្សអវិជ្ជមានអូសទាញ។

ទោះយើងមិនមែនបុគ្គលជោគជ័យដូចអ្នកផ្សេង តែយ៉ាងណា គ្រាន់តែរស់នៅឲ្យល្អ មានដំបូលជ្រក មានរបស់ហូបគ្រប់ ធ្វើអ្វីដែលខ្លួនចង់ធ្វើ មិនកេងប្រវ័ញ្ច មិនចង់ចំណេញអ្នកណា ដឹងគុណដល់អ្នកមានគុណឬអ្នកធ្លាប់ជួយឬឲ្យ។ ប្រើភាពស្មោះត្រង់មិនវៀចវេរទៅរកគេ ដើម្បីសាងភាពចំណេញដល់ខ្លួនឯង នោះចាត់ទុកថាអ្នកបាននាំសុភមង្គលមួយដ៏អស្ចារ្យមកខ្លួនហើយ។ ជាពិសេសកុំរស់នៅជិតមនុស្សអវិជ្ជមាន មួយថ្ងៃៗគ្មានគិតអីក្រៅពីនាំភ្លើងមកដុតយើងឲ្យសៅហ្មង ខូចអារម្មណ៍តែប៉ុណ្ណោះ។

ឈប់សង្ស័យ! ឈប់គិតច្រើន ថាគួរចេញឬមិនចេញ ចុងក្រោយនេះគួរសម្រេចចិត្តដើរចេញឆាប់កាន់តែល្អ។ ជីវិតយើងនឹងដេកលក់ស្រួល ឈប់មានរឿងអាក្រក់ៗពីពួកគេមករំខានសតិរបស់យើង។ យើងអាចហូបឆ្ងាញ់រស់នៅស្រួលចិត្តជាងមុន ហើយយើងក៏បានសេពគប់មនុស្សថ្មីៗចូលមកក្នុងជីវិតបន្ថែម។ ដកពួកគេចេញកុំឲ្យនាំចង្អៀតចិត្តច្រើន ហើយក៏មិនមានអ្វីត្រូវស្ដាយ ជាមួយមនុស្សអវិជ្ជមានទាំងនោះឡើយ៕

អត្ថបទ៖ សាង ស្រីល័ក្ខ

ចុចអាន៖គន្លឹះតូចៗយើងតែងមើលរំលង តែបានបន្ថែមអត្ថន័យឲ្យជីវិត ល្អប្រសើរជាងមុន

ចុចអាន៖មនុស្សច្រណែននឹងបញ្ចេញសកម្មភាពទាំងនេះ ទោះពូកែសំដែងយ៉ាងណាក៏ដោយ

The post ឈប់សង្ស័យ! បុគ្គលណាអវិជ្ជមានគួរដកខ្លួនឆាប់ បើមិនចង់អន្តរាយដល់ខ្លួន appeared first on Kampuchea Thmey Daily.

ហេតុអ្វីមនុស្សខ្លះ មិនដែលមានពេលវេលាគ្រប់គ្រាន់ សូម្បីតែសម្រាប់ខ្លួនឯង ?

សាង ស្រីល័ក្ខ — Tue, 09 Feb 2021 03:47:35 +0000

កុំអង្គុយតូចចិត្ត! ងើបមុខមកគិត ហើយសួរខ្លួនឯងថា ហេតុអ្វីបានជាមិនដែលមានពេលវេលាគ្រប់គ្រាន់ សូម្បីតែហាត់ប្រាណ កម្សាន្តឬមួយស្នាក់នៅចោលការងារស្រលះមុខដូចគេសូម្បីម្តង?
គ្រប់គ្នាតែងតែមានអារម្មណ៍ថា ខ្លួនឯងមានកម្ម មួយជាតិនេះមិនដែលដកខ្លួនរួច មិនអាចសប្បាយដូចគេ?

គ្មានជាតិមុខជាតិក្រោយឯណាទេ! ពេលវេលាគឺក្នុងដៃយើង!

អារម្មណ៍តានតឹងនៅក្នុងសម្ពាធពេលវេលា ដែលត្រូវបង្ខំចិត្តធ្វើការម្នាក់ឯង ខណៈអ្នកផ្សេងគេមានឱកាស និងមានលុយកាក់ដើរកម្សាន្តបានធ្វើឲ្យមនុស្សខ្លះបន្ទោសកម្មព្រេងវាសនា មិនព្រមសម្លឹងមើលមកខ្លួនឯងវិញ ថាខ្លួននេះហើយជាម្ចាស់នៃពេលវេលា។

ប្រសិនជីវិតមួយនេះមិនធ្វើឲ្យយើងមានក្តីសុខទេ វាបង្ហាញថាសកម្មភាពប្រចាំថ្ងៃរបស់យើងមិនត្រឹមត្រូវទេ ច្នោះហើយយើងគួរបន្តសកម្មភាពដដែលនោះទាំងមិនសប្បាយចិត្តបែបនេះដល់ថ្ងៃស្លាប់ ឬចង់ផ្លាស់ប្តូរចោល?

អ្នកស្រាវជ្រាវ Cassie Mogilner និងសហសេវិករបស់នាងបានសរសេរសៀវភៅមួយ នៅឆ្នាំ ២០១២ ថា មនុស្សខ្លះ ដោយរវល់ជាមួយការងារ ពេលវេលានិងទ្រនិចនាទីដែលនៅសល់សម្រាប់ការចង់ធ្វើលំហាត់ប្រាណ ការសម្អាតខ្លួន តុបតែង ជាមួយសិល្បៈណាមួយ ដែលជាចំណូលចិត្តខ្លួនផ្ទាល់ ជាមួយទំនាក់ទំនងសង្គម ជាមួយមិត្តភក្តិនិងក្រុមគ្រួសារ ត្រូវបានថយចុះ សឹងដល់សូន្យដែល(លេសរកលុយ)សែនពេញនិយម តែតាមការពិត គេជាមនុស្សមិនចេះមានផែនការពេលវេលា។

បញ្ហានៅត្រង់សម្ពាធពេលវេលា និងអារម្មណ៍ដែលយើងមិនដឹងថាមកពីអ្វី បែរជាបន្ទោសព្រេងវាសនា ។ បើយើងមិនមានពេលវេលាគ្រប់គ្រាន់ ដើម្បីធ្វើអ្វីដែលយើងចង់ធ្វើ នេះជាជីវិតមួយដែលយើងមិនពេញចិត្តទេ និងមិនយូរមិនឆាប់ ជីវិតបែបនេះ នឹងនាំទៅរកអពមង្គលនៃវិបត្តិផ្លូវចិត្ត។

ចំណែក ការសិក្សាដោយសម្ភាសន៍លើជនជាតិអូស្រ្តាលីដែលធ្វើការឲ្យគេប្រមាណជាង ៧.០០០ នាក់បានរកឃើញថា សម្ពាធពេលវេលាគឺជា“ ការបំភាន់” ដោយគំនិតខ្លួនឯង ដែលតាមពិតមិនទម្លាប់មានផែនការនិងទញ់ទាល់គ្មានគោលដៅ។

១ ពួកគេមិនខ្វល់រឿងពេលវេលា

មនុស្សទាំងនោះមិនដែលគិតថា តើជាទូទៅខ្លួនត្រូវការពេលវេលាប៉ុន្មានសម្រាប់ការរស់នៅជាមូលដ្ឋាន ដូចជា ម៉ោងធ្វើការ ប្រាក់រកមកបាន និងការថែទាំផ្ទាល់ខ្លួន(ចិត្តនិងកាយ)ដែលត្រូវការហាត់ប្រាណ និងដើរកម្សាន្ត។ ពួកគេផ្ទុកគំនិតមួយថា ខ្លួនមិនមានពេលវេលាទំនេរទេ មិនមានដាច់ខាត។

ភាពខុសគ្នាធំមួយនេះ ជាកត្តាវិបត្តិធ្ងន់ធ្ងរបំផុតសម្រាប់គ្រួសារដែលបន្តបញ្ហានេះដល់កូនតូចៗរបស់ពួកគេ។ ក្មេងៗមិនដែលបានលំហែរហើយថែមទាំងត្រូវបានរងស្ត្រេសនៃឳពុកម្តាយភាពរអ៊ូរទាំ និងតូចចិត្ត។

អ្នកស្រាវជ្រាវបានសរសេរថា“ អ្នកដែលមានអារម្មណ៍ថាខ្លួនឯងត្រូវធ្វើការច្រើនជាងអ្នកផ្សេងទើបរស់ តែគេមិនដែលគិតចង់ផ្លាស់ប្តូរវិធីរស់នៅរបៀបនោះចេញទេ។ ពួកគេមានហេតុផលជានិច្ចក្នុងការតវ៉ាថាជីវិតខ្លួនមិនស្រួលជាងអ្នកដទៃ តែមិនព្រមទទួលស្គាល់ឡើយថាភាពងាយស្រួលឬទុក្ខព្រួយ គឺជាទង្វើររបស់មនុស្ស យើងជាម្ចាស់នៃសុភមង្គលក្នុងជីវិតយើង។

២ មនុស្សប្រភេទ «គិតអ្វីក៏ពិបាក»

អ្នកខ្លះចិញ្ចឹមជីវិតមកដោយគ្រាន់តែចង់មានបាន តែមិនបាន ឲ្យសំខាន់លើការយកចិត្តទុកដាក់រឿងពិសេសៗដូចជា អារម្មណ៍កូនៗ ឬមនុស្សក្នុងគ្រួសារជាប្តី ប្រពន្ធ ឲ្យតម្លៃតែគំនិតចង់មានបានមិនចេះចប់របស់ខ្លួន លោភលន់លើសមាឌ ហើយលះបង់ពួកគេចោលរហូតដល់ភ្លេចថា ថ្ងៃណាមួយពួកគេក៏លែងត្រូវការយើងវិញដូចគ្នា។

ការស្រាវជ្រាវផ្សេងទៀតបានបង្ហាញថា នេះទាក់ទងសំខាន់នឹងឥរិយាបថ ចិត្តគំនិតរបស់យើងដែលតែងតែស្តីបន្ទោសនាឡិកា ហើយគិតអ្វីក៏ពិបាក គិតអ្វីក៏គិតថា ទៅមិនរួចធ្វើមិនបាន? មនុស្សជោគជ័យជាច្រើនលើលោកនេះ អាចធ្វើទៅបាន ដោយសារគេមានការបែងចែកច្បាស់លាស់អំពី ពេលវេលាណាមួយសម្រាប់ខ្លួនឯងសម្រាប់អានសៀវភៅ ដើរកម្សាន្ត ធ្វើលំហាត់ប្រាណទៀងពេល និងធ្វើសិល្បៈណាដែលយើងចូលចិត្ត ។

អ្នកខ្លះ «គ្មានពេលទេអានសៀវភៅ!» «គ្មានពេលទេធ្វើម្ហូបទិញគេចុះ!!»«ហាត់ប្រាណអីរវល់ណាស់!» បង្រៀនកូនអី គ្មានពេលទេ។ យើងអាចរកឃើញឫសគល់នៃពេលវេលាដែលចាក់ដោតយ៉ាងជ្រៅនៅក្នុងចិត្តវិទ្យារបស់យើងនេះគឺជាការយល់ដឹងខាងវិទ្យាសាស្ត្រមួយចំនួនដើម្បីជួយឱ្យមនុស្សខ្លះរសនៅរមនាជាងមនុស្សច្រើនទៀត។

៣ ទម្លាប់មិនព្រមប្តូរ

នៅក្នុងការសិក្សាមួយកាលពីឆ្នាំ ២០០៤ លើមនុស្សធ្វើការជិត ៨០០ នាក់នៅក្នុងរដ្ឋអូហៃអូអ្នកស្រាវជ្រាវវិភាគថា ស្ត្រីដែលធ្វើកិច្ចការផ្ទះអស់រយៈពេលជាង ១០ ម៉ោងក្នុងមួយសប្តាហ៍ពួកគេមានអារម្មណ៍ធុញថប់ ប៉ុន្តែបុរសធ្វើកិច្ចការផ្ទះក្នុងពេលវេលាដូចគ្នាពួកគេមិនមានអារម្មណ៍តេងតែងទេ(អារម្មណ៍ស្ម័គ្រចិត្តធ្វើ និងអារម្មណ៍ថាត្រូវតែធ្វើគឺខុសគ្នា!)

ជីវិតមនុស្សក៏ដូច្នោះដែរ គឺចេះរំលែកចេញកំណត់ពេល ចេះកាត់ចិត្តមិនលោភលន់មិនអស់មិនហើយ។

នៅក្នុងការសិក្សាមួយផ្សេងទៀត អ្នកស្រាវជ្រាវបានធ្វើការស្ទង់មតិបុគ្គលិកជាង ២៥០០ នាក់នៅក្រុមហ៊ុនបច្ចេកវិទ្យានិងក្រុមហ៊ុនសេវាកម្មហិរញ្ញវត្ថុ។ ពួកគេបានរកឃើញថាមនុស្សដែលងប់ងល់ច្រើន ចង់ធ្វើអ្វីដដែលៗ ហើយមានជីវិតមិនដែលរីករាយខ្លាំងទៅៗ និងមិនដែលមានកាលវិភាគ មិនដែលចេះគិតអ្វីទុកជាមុនទេចាំដល់ពេលចាំប្រញាប់ប្រញាល់ឬរអ៊ូរទាំ។

ចុះតើអ្នកកំពុងអានជាមនុស្សប្រភេទណាដែរអ៊ីចឹង?

ប្រែសម្រួល៖ហាណា

ប្រភព៖greatergood

ចុចអាន៖

The post ហេតុអ្វីមនុស្សខ្លះ មិនដែលមានពេលវេលាគ្រប់គ្រាន់ សូម្បីតែសម្រាប់ខ្លួនឯង ? appeared first on Kampuchea Thmey Daily.

មនុស្សបីប្រភេទដែលពួកអ្នកមានខ្លាចមិនឲ្យបៀត ហើយមួយប្រភេទទៀតគោរពស្វែងរក

សាង ស្រីល័ក្ខ — Wed, 16 Dec 2020 08:09:01 +0000

ពាក្យថា អ្នកមាន ចេះតែដើរលេងប៉ោឡែ រាប់អានពួកឡេមឡឺម ចូលចិត្តគេទ្រ គេឡកលើយ ឬមិនចេះគិត គឺជាគំនិតខុសហើយ!
អ្នកគិតអញ្ចឹង បានជាអ្នកមិនអាចក្លាយជាអ្នកមានបាន!
ទម្រាំក្លាយជាអ្នកមាន និងរក្សាភាពមានបានយូរយារច្រើនជំនាន់ ពួកគេមានវិធីសាស្ត្រជាច្រើនដែលយើងមិនធ្លាប់បានដឹង។ ក្នុងចំណោមនោះការសេពគប់សែនសំខាន់ក្រៃលែងក្នុងជីវិតពួកគេ។ ពួកគេប្រយ័ត្នបំផុតលើទំនាក់ទំនងនិងបណ្តាញ ។
ខាងក្រោមនេះ ជាមនុស្សបីប្រភេទធំៗ ដែលពួកអ្នកមានមិនចង់ឃើញមកនៅក្បែរៗ រួមមាន៖

១ មនុស្សអែបអបចង់បានលាភ

មនុស្សចង់បានលាភច្រើនពេកហើយលើភពផែនដីនេះ រហូតដល់ថ្នាក់ដាក់ខ្លួន ទន់ជ្រាយបែបណាក៏គេអាចធ្វើបាន ចំណែកអ្នកអែបអបយកបុងក៏មានមិនខ្វះ។ ពួកអ្នកមានកើតមកភ្លាម គឺឪពុកម្ដាយគេបង្រៀនឲ្យរៀនចាកចេញពីជំពូកពួកមនុស្សអស់ទាំងនេះ។

២ មនុស្សពឹងពាក់

មនុស្សភាគច្រើនចង់មករកចូលក្បែរអ្នកមានប្រាក់អំណាច ដោយចិត្តមិនស្មោះ គឺជំពូកមនុស្សចូលចិត្ត ពឹងគេ ខ្ចីលុយរកស៊ី ចង់តោងឲ្យមានបានដែរ ឬចង់បានជំនួយ យកឈ្មោះទៅប្រើថតរូបផុសយកឡូយ លាបពណ៌ខូចកិត្តិយសគេ។ល។ អ្នកមានៗខ្លាចណាស់ជំពូកមនុស្សបែបនេះ ឲ្យតែដឹងគឺដាក់មេប្រូច

៣ និយាយច្រើនចេចចូច

មនុស្សមាត់អេចអូច តែងធ្វើឲ្យខូចការធំ។ គេមិនយកមកនៅក្បែរបានយូរទេ។ ថ្ងៃនេះគេមិនដឹងពុតអ្នក ថ្ងៃណាមួយលាក់មិនជិតឡើយ។

ចំណែកមនុស្សមួយប្រភេទនេះដែលរាប់អានជាមួយអ្នកមានបានយូរយារ រហូតចាស់ព្រឹទ្ធិ ចាស់ព្រេងអាចមានបានរកស៊ីចងសម្ព័ន្ធមួយគឺមានប៉ុន្មានចំណុចនេះក្នុងខ្លួន៖

១ មនុស្សត្រង់ទៅត្រង់ទៅមក

ក្នុងចំណងមិត្តភាព បើអ្នកចេះតែឆ្លើយអូខេ អ្នកមិនមែនមិត្តទេ ជាទាសករឬជាបរិវា។ មនុស្សដូចអ្នកមិនខ្វះឡើយឲ្យតែមានលុយឲ្យ។

២ មនុស្សចេះគោរពខ្លួនឯង

មនុស្សចេះគោរពខ្លួនឯង មិនពឹងមិត្ត មិនយកប្រយោជន៍ មិនយកទំនាក់ទំនងមកធ្វើជំនួញ។

៣ មិនទាក់ទាញបានដោយលុយកាក់

មនុស្សនេះនឹងមិនរញីរញ័រនៅនឹងមុខទ្រព្យធនទេ។ ជាមនុស្សដែលពួកអ្នកមានគោរពក្រែងចិត្ត និងឲ្យតម្លៃ ចង់យកមកនៅជាក្លើម្រាក់រហូតតទៅ។

៤ មនុស្សចេះជួយគ្នាឈឺឆ្អាល

ពាក្យថាមិត្ត តោងចេះចេញមុខរារាំងការពារគ្នា នេះជាប្រភេទមនុស្សកម្ររកបាន ព្រោះក្នុងសង្គមអ្នកមាន ភាគច្រើនល្អនឹងមុខក្រោយខ្នងរុញគ្នាចុះរណ្តៅ។

៥ មនុស្សនិយាយហើយធ្វើ

មនុស្សសន្យាប៉ប៉ោច អួតអាង មិនខ្វះទេ ពួកអ្នកមានបានជួបរាល់ថ្ងៃ ព្រោះឲ្យតែមានឱកាស ពួកមនុស្សប៉ប៉ោចនឹងមកបង្ហាញខ្លួន។ ពួកអ្នកមានតែងហត់នឿយចិត្តខ្លាំងណាស់នឹងជំពូកមនុសុ្សមិនបានការទាំងនេះចោមព័ទ្ធ។ គេត្រូវការមិត្តម្នាក់ណាដែលនិយាយយ៉ាងណាធ្វើយ៉ាងនោះ។

ប្រែសម្រួល៖ហាណា

ចុចអាន៖ទម្លាប់មួយដែលក្សត្រី Elizabeth បានបង្ខំឲ្យព្រះអង្គ Philip ដាច់ខាតត្រូវតែឈប់

ចុចអាន៖លួចស្រលាញ់យូរប៉ុណ្ណា ទើបខាងប្រុសៗ ដាច់ចិត្តសារភាព?

The post មនុស្សបីប្រភេទដែលពួកអ្នកមានខ្លាចមិនឲ្យបៀត ហើយមួយប្រភេទទៀតគោរពស្វែងរក appeared first on Kampuchea Thmey Daily.

នៅឲ្យឆ្ងាយពីមនុស្សអវិជ្ជមាន បើមិនចង់ជួបវិបត្តិ ៦ យ៉ាងនេះ

Sonya — Sat, 12 Dec 2020 09:41:18 +0000

រឿងមួយដែលត្រូវប្រយ័ត្នប្រយែងបំផុត គឺគួរសេពគប់ជាមួយអ្នកណា នៅក្នុងជីវិតយើង។ មនុស្សជោគជ័យក្នុងអាជីព តែងចៀសវាងមនុស្សអវិជ្ជមានចោល ពីជីវិតពួកគេ។

នេះជាហេតុផល ៦ យ៉ាង ដែលអ្នកគួរចៀសវាង មនុស្សអវិជ្ជមានក្នុងជីវិតអ្នក ៖

១. មនុស្សអវិជ្ជមានអាចមានឥទ្ធិពលលើអាកប្បកិរិយា

មនុស្សអវិជ្ជមាននឹងធ្វើឱ្យអ្នកធ្លាក់ទឹកចិត្ត ហើយពួកគេនឹងព្យាយាមទាញអ្នកចុះទៅកន្លែងងងឹតជាមួយពួកគេ។ ដូចលោក Robert Tew ធ្លាប់និយាយថា “ កុំទុកឱ្យមនុស្សអវិជ្ជមាននៅក្បែរ ហើយឲ្យគេមកបំពុលអ្នកឲ្យសោះ ” ។

២. មតិប្រតិកម្មអវិជ្ជមានពីមនុស្សអវិជ្ជមានប៉ះពាល់ដល់ការគិត

ប្រសិនបើអ្នកដើរលេងជាមួយក្រុមមនុស្សអវិជ្ជមាន ហើយស្ដាប់ពួកគេនិយាយ ពួកគេនឹងចាប់ផ្ដើមជះឥទ្ធិពលដល់ការគិតរបស់អ្នក។ ត្រូវចាត់ទុកមនុស្សអវិជ្ជមាន គឺជាបិសាចជញ្ជក់ឈាម ដែលយើងគួរចៀសឆ្ងាយ។

៣. ពួកគេគឺជាបំពង់បង្ហូរថាមពល

ភាពអវិជ្ជមានរបស់គេមិនមែនតែធ្វើឲ្យខ្លួនគេហត់នឿយ ប៉ុន្តែក៏ធ្វើឲ្យយើងហត់នឿយតាមដែរ។ ពេលដែលនៅជុំវិញមនុស្សអវិជ្ជមាន ពួកគេប្រៀបដូចជាជាបំពង់បង្ហូរថាមពលចេញពីខ្លួនអ្នក។ ពួកគេគឺជាក្រុមដែលបានបូមយកគ្រប់យ៉ាង ទាំងកម្លាំងកាយ និងចិត្ត ចេញពីយើង។

៤. បំផ្លាញភាពជឿជាក់របស់អ្នក

ប្រសិនបើនៅជុំវិញខ្លួនអ្នក មានក្រុមមនុស្សអវិជ្ជមាន ធានាថាពួកគេនឹងព្យាយាមនិយាយរឿងអាក្រក់ណាមួយ ប្រាប់អ្នក ធ្វើឲ្យអ្នកភ្លេចភ្លាំងស្មារតី បាត់បង់ជំនឿចិត្ត និងភាពជឿជាក់ផ្ទាល់ខ្លួន។

៥. មនុស្សអវិជ្ជមានមិនដែលផ្ដល់ការលើកទឹកចិត្ត

មនុស្សអវិជ្ជមានមិនត្រឹមតែអវិជ្ជមានប៉ុណ្ណោះទេ ពួកគេនៅពូកែខាងនិយាយបំបាក់ទឹកចិត្ត និងផ្ដល់ឱ្យអ្នកនូវមតិអវិជ្ជមានផងដែរ។

អ្វីដែលត្រូវការក្នុងគ្រាជួបទុក្ខលំបាកនោះ គឺមានអ្នកដែលលើកទឹកចិត្ត គាំទ្រ ហើយបញ្ចុះបញ្ចូលអ្នក តែក្រុមមនុស្សអវិជ្ជមានគឺផ្ទុយពីនេះ។

៦. មិនរីកចម្រើនទៅមុខ

ប្រសិនបើមានមិត្តជាមួយមនុស្សអវិជ្ជមាន ពួកគេនឹងត្រេកអរនៅពេលអ្នកបរាជ័យ ព្រោះពួកគេមិនចង់ឃើញអ្នក រីកចម្រើនជាងពួកគេឡើយ។ ចង់បានជីវិតល្អប្រសើរ គឺត្រូវសេពគប់ជាមួយមនុស្សដែលគិតវិជ្ជមាន ដើរទាន់សម័យកាល ហើយនឹងជួយឱ្យអ្នកឈានទៅមុខជាមួយគេដែរ។

មកដល់ចុងក្រោយនេះ អ្នកអាចរៀនសម្លឹងមើលមនុស្ស ហើយសម្រេចចិត្តថា មនុស្សប្រភេទណា ដែលអ្នកគួរធ្វើជាមិត្ត និងសក្តិសមចំណាយពេលជាមួយ៕

ប្រែសម្រួល៖ សាង ស្រីល័ក្ខ

ចុចអាន៖ ធ្វើរបៀបណាទទួលបានការឱ្យតម្លៃក្នុងសង្គមកាន់តែច្រើនឡើង

ចុចអាន៖ ពាក្យថា មនុស្សទន់ខ្សោយពឹងសំណាង មនុស្សរឹងមាំ ពឹងខ្លួនឯងមានន័យដូចម្តេច?

The post នៅឲ្យឆ្ងាយពីមនុស្សអវិជ្ជមាន បើមិនចង់ជួបវិបត្តិ ៦ យ៉ាងនេះ appeared first on Kampuchea Thmey Daily.

មនុស្សអវិជ្ជមាន Archives - Kampuchea Thmey Daily

បើមិនចង់អន្តរាយ កុំយកខ្លួនបៀតមនុស្ស ៧ ប្រភេទនេះឲ្យសោះ

មនុស្ស ៥ ប្រភេទ ក្នុងសង្គមសព្វថ្ងៃ បើសេពគប់នាំជីវិតរឹតស្មុគស្មាញ

ជឿអត់! អ្នកនិយមតាមដានរឿងរ៉ាវជីវិតគេជាងជីវិតខ្លួន គឺមានជំងឺផ្លូវចិត្តធ្ងន់ធ្ងរ

ឈប់​សង្ស័យ! ​បុគ្គល​ណា​អវិជ្ជមាន​គួរ​ដក​ខ្លួន​ឆាប់ ​បើ​មិន​ចង់​អន្តរាយដល់​ខ្លួន

ហេតុអ្វី​មនុស្ស​ខ្លះ មិន​ដែល​មាន​ពេលវេលា​គ្រប់គ្រាន់​ សូម្បី​តែ​សម្រាប់​ខ្លួនឯង ?

មនុស្ស​បី​ប្រភេទ​ដែល​ពួក​អ្នកមាន​ខ្លាច​មិន​ឲ្យ​បៀត ហើយ​មួយ​ប្រភេទ​ទៀត​គោរព​ស្វែងរក

នៅឲ្យ​​ឆ្ងាយ​ពី​មនុស្ស​អវិជ្ជមាន បើ​មិន​ចង់​ជួប​វិបត្តិ ៦ យ៉ាងនេះ

ឈប់សង្ស័យ! បុគ្គលណាអវិជ្ជមានគួរដកខ្លួនឆាប់ បើមិនចង់អន្តរាយដល់ខ្លួន

ហេតុអ្វីមនុស្សខ្លះ មិនដែលមានពេលវេលាគ្រប់គ្រាន់ សូម្បីតែសម្រាប់ខ្លួនឯង ?

មនុស្សបីប្រភេទដែលពួកអ្នកមានខ្លាចមិនឲ្យបៀត ហើយមួយប្រភេទទៀតគោរពស្វែងរក

នៅឲ្យឆ្ងាយពីមនុស្សអវិជ្ជមាន បើមិនចង់ជួបវិបត្តិ ៦ យ៉ាងនេះ