តាមការផ្សាយរបស់ Al Jazeera នៅថ្ងៃពុធ ទី២៩ ខែមេសា ឆ្នាំ២០២៦, ការដកខ្លួនរបស់អារ៉ាប់រួម នឹងធ្វើឡើងជាផ្លូវការនៅថ្ងៃសុក្រ ទី១ ខែឧសភា ខណៈចំណាត់ការនេះ ធ្វើឲ្យសម្ព័ន្ធមិត្តទាំងឡាយ សម្តែងការសោកស្តាយ និងខកចិត្តយ៉ាងខ្លាំង។

ហេតុផល២យ៉ាងធំៗ ដែលគេមើលឃើញថា ឈានដល់ការសម្រេចដកខ្លួនរបស់អារ៉ាប់រួម គឺដោយសា​រប្រទេសនេះ ចង់ងាកមកគិតពីផលប្រយោជន៍ជាតិជាធំវិញ និងព្រោះតែសង្គ្រាមអ៊ីរ៉ង់ មិនធូរស្រាល។

ជុំវិញរឿងនេះ រដ្ឋមន្ត្រីក្រសួងថាមពលអារ៉ាប់រួម Suhail Mohamed al-Mazrouei លើកឡើងថា ការសម្រេចចិត្ត ធ្វើឡើងបន្ទាប់ពីមានការពិនិត្យយ៉ាងយកចិត្តទុកដាក់ លើយុទ្ធសាស្ត្រថាមពលរបស់មហាអំណាចតំបន់មួយនេះ។ វាគឺជាការសម្រេចចិត្តលើគោលនយោបាយ ហើយគិតពីស្ថានភាពបច្ចុប្បន្ន និងទៅអនាគត ដែលពាក់ព័ន្ធនឹងកម្រិតនៃផលិតកម្មប្រេង។ 

ទន្ទឹមនោះដែរ នៅពេលត្រូវបានសួរថា តើអារ៉ាប់រួម មានបានពិគ្រោះយោបល់ជាមួយ អារ៉ាប៊ីសាអូឌីត ដែលជាសមាជិកដ៏មានឥទ្ធិពលបំផុតរបស់ OPEC ដែរឬទេ? លោកឆ្លើយថា ទីក្រុងអាប៊ុយដាប៊ី មិនបានលើកបញ្ហានេះ ទៅពិភាក្សាជាមួយប្រទេសដទៃណាមួយឡើយ។

OPEC ដែលមានឈ្មោះពេញ Organization of the Petroleum Exporting Countries ឬជាភាសាខ្មែរហៅថា «អង្គការនៃបណ្តាប្រទេសនាំចេញប្រេង» ត្រូវបានបង្កើតឡើង ក្នុងគោលបំណងគ្រប់គ្រង និងសម្របសម្រួលគោលនយោបាយប្រេង ក្នុងចំណោមប្រទេសជាសមាជិក។

គោលដៅចម្បងរបស់អង្គការនេះ គឺរក្សាស្ថិរភាពតម្លៃប្រេង នៅលើទីផ្សារពិភពលោក, ធានាឲ្យបាននូវចំណូលថេរ សម្រាប់ប្រទេសសមាជិកដែលពឹងផ្អែកលើការលក់ប្រេង និងកំណត់បរិមាណផលិតកម្មប្រេង ពោលគឺបើចង់ឲ្យប្រេងឡើងថ្លៃ ពួកគេនាំគ្នាផ្អាកផលិត តែបើចង់ឲ្យចុះថ្លៃ ពួកគេបង្កើនការផលិតវិញ។

ដោយសារប្រទេសសមាជិក OPEC រួមគ្នាគ្រប់គ្រងទុនបម្រុងប្រេងជិត ៨០% នៃពិភពលោកទាំងមូល ដូច្នេះ រាល់ការសម្រេចចិត្តកាត់បន្ថយ ឬបង្កើនការផលិតរបស់ពួកគេ នឹងធ្វើឲ្យតម្លៃសាំង នៅតាមស្ថានីយទូទាំងពិភពលោក ឡើងឬចុះថ្លៃភ្លាមៗ។

ដូច្នេះ ការចាកចេញរបស់អារ៉ាប់រួម នឹងក្លាយជាព្រឹត្តិការណ៍ដ៏រង្គោះរង្គើបំផុត ក្នុងប្រវត្តិសាស្ត្រអង្គការនេះ ព្រោះវាធ្វើឲ្យអំណាច ក្នុងការគ្រប់គ្រងតម្លៃប្រេងរបស់ OPEC ចុះខ្សោយ ហើយអាចនាំឲ្យមានការប្រកួតប្រជែងតម្លៃប្រេងសេរី ធ្វើឲ្យទីផ្សារថាមពលពិភពលោក កាន់តែមានភាពមិនប្រាកដប្រជា៕

អត្ថបទ៖ សុខ សុវណ្ណ

The post អារ៉ាប់រួម ប្រកាសដកខ្លួនពី​ OPEC​ ធ្វើឲ្យប៉ះពាល់ធ្ងន់ធ្ងរ ដល់ស្ថិរភាពថាមពល ពិភពលោក appeared first on Kampuchea Thmey Daily.

ប្រេងឆៅនាពេលអនាគត ម៉ាក​ Brent បានកើនឡើង ៥៦ សេន ឬ ០,៨៥ ភាគរយ ដោយជួញដូរនៅតម្លៃ ៦៦,៤១ ដុល្លារ/បារ៉ែល។ ​ចំណែកឯប្រេងឆៅ ម៉ាក​ West Texas Intermediate (WTI) របស់អាមេរិកវិញ បាន​កើនឡើង ៦៥ សេន ឬ​ ១,០៤ ភាគរយ ដោយជួញដូរនៅ ៦៣,១២ ដុល្លារ/បារ៉ែល។ ​

​តម្លៃប្រេងទាំង ២ បានកើនឡើងជាង ២ ភាគរយ ពេល​បញ្ចប់ការជួញដូរកាលពីថ្ងៃពុធ ដែលជាកម្រិតខ្ពស់បំផុតរាប់តាំងពីថ្ងៃទី ៣ មេសា​។

កំណើនទាំងនេះ កើតឡើងក្រោយរដ្ឋបាលរបស់​ប្រធានាធិបតីអាមេរិក ដូណាល់ ត្រាំ ​បានប្រកាសដាក់ទណ្ឌកម្មថ្មីលើការនាំចេញប្រេងរបស់អ៊ីរ៉ង់កាលពីថ្ងៃពុធ រួមទាំងទណ្ឌកម្មលើរោងចក្រចម្រាញ់ប្រេងរបស់ចិនតូចមួយ ដើម្បីបង្កើនសម្ពាធលើ​អ៊ីរ៉ង់ ​ចំពេលកិច្ចចរចានុយក្លេអ៊ែរនៅតែបន្ត។

បន្ថែមលើការព្រួយបារម្ភនៃការផ្គត់ផ្គង់ OPEC បាននិយាយកាលពីថ្ងៃពុធថា ខ្លួនបានទទួលផែនការថ្មីៗពី​អ៊ីរ៉ាក់ កាហ្សាក់ស្ថាន និងប្រទេសជាសមាជិក​ផ្សេងទៀត​ អំពីការកាត់បន្ថយ​ផលិតកម្ម​បន្ថែមទៀត ​ដើម្បីប៉ះប៉ូវលើការបូមប្រេងលើសកូតានាពេលកន្លងមក។

ទោះបីជាយ៉ាងណាក៏ដោយ កំណើន​ប្រេងនៅមានកំណត់ ដោយសារតែក្ដីបារម្ភពីកម្សោយតម្រូវការ ជុំវិញភាពស្រពិចស្រពិលនៃសេដ្ឋកិច្ច ដែលបង្កឡើងដោយគោលនយោបាយពន្ធគយរបស់​លោក ត្រាំ៕

The post តម្លៃប្រេងកើនឡើង ជំរុញដោយទណ្ឌកម្មថ្មីលើអ៊ីរ៉ង់ appeared first on Kampuchea Thmey Daily.

លោក Birol ​បាន​លើក​ឡើង​យ៉ាង​ដូច្នេះ​ថា​​៖ «យើងអាចឃើញ​តម្លៃ​ធ្លាក់​ចុះ​ ដោយសារតម្រូវការទន់ខ្សោយនាពេលបច្ចុប្បន្ន និងការ​បង្កើន​ផលិតកម្ម​ប្រេង​របស់​ប្រទេសក្រៅ​អង្គការ​ OPEC ដែល​ភាគច្រើនមកពីសហរដ្ឋអាមេរិក និងប្រទេសដទៃទៀត»។

ការ​លើក​ឡើង​បែប​នេះ​ ​ធ្វើ​ឡើង​​ក្រោយ​តម្លៃ​ប្រេង​ជួប​នូវ​ភាព​ចលាចល​ពេញ​មួយ​​សប្ដាហ៍​​ ​ដោយ​តម្លៃ​ប្រេងនាពេល​អនាគត​ ម៉ាក Brent ​បានធ្លាក់ចុះជាង ១០ ដុល្លារ​/បារ៉ែល​ ដែល​ធ្វើ​ឱ្យ​តម្លៃ​ជួញដូរ​ធ្លាក់​ចុះ​ក្រោយ​ ៧០ ដុល្លារ​/បារ៉ែល​ ជា​លើក​ដំបូង​ក្នុង​រយៈ​ពេល​ជិត​ ៣ ឆ្នាំ​។ ​បើ​​តាម​ការ​ចុះផ្សាយ​របស់​ទីភ្នាក់ងារ​សារព័ត៌មាន​រ៉យទ័រ​​ តម្លៃ​ប្រេង​ម៉ាក​ Brent បាន​កើន​ឡើង​មកវិញហើយ​ ​ត្រឹម​ ៧២,៣១ ដុល្លារ​/បារ៉ែល សម្រាប់​ការ​ជួញដូរ​​នៅ​ព្រឹក​ថ្ងៃ​សុក្រ​នេះ​​ ខណៈ​ប្រេង​អាមេរិក​ម៉ាក​ West Texas Intermediate (WTI) បាន​កើន​ឡើង​មក​វិញ​ត្រឹម​ ៦៩,៣៥ ដុល្លារ​/បារ៉ែល​។

​ទោះ​ជា​យ៉ាង​ណា​ក៏​ដោយ​ ​​លោក​ Birol ​បាន​​មើល​ឃើញ​ពី​និន្នាការ​ជ្រួលច្របល់នៃ​ទំនុក​ចិត្ត​ក្នុង​ចំណោមពាណិជ្ជករ និង​អ្នកវិនិយោគលើ​វិស័យ​ប្រេង​​ នា​រយៈ​ពេល​ប៉ុន្មានសប្តាហ៍ថ្មីៗនេះ ​ដោយសារ​តែ​កំណើនខ្សោយនៅ​ចិន និងសហរដ្ឋអាមេរិក ដែលជំរុញឱ្យអង្គការនៃ​ប្រទេស​នាំ​ចេញ​ប្រេង​កាត​ (OPEC) ពន្យារពេលផែនការតម្លើង​ការ​ទាញ​យក​ប្រេង​ជា​ថ្មី​។​ ជាមួយ​នឹង​ការ​លើក​ឡើង​របស់​លោក​ Birol ទីភ្នាក់ងារ​ IEA បាន​ចេញផ្សាយរបាយការណ៍ប្រចាំខែចុងក្រោយរបស់ខ្លួនស្តីពីទីផ្សារប្រេង ដែលបានកត់សម្គាល់ថា តម្រូវការប្រេងក្នុងរយៈពេល៦ខែដំបូងនៃឆ្នាំនេះ បានកើនឡើងក្នុងល្បឿនយឺតបំផុត រាប់​ចាប់តាំង​ពី​វិបត្តិកូវីដ​១៩។

លោក Birol ​បន្ត​ថា មូលហេតុ​ចម្បង​ដែល​បណ្ដាល​ឱ្យ​មាន​កំណើន​ទីផ្សារ​ប្រេង​យឺត​​យ៉ាវ​ គឺ​​ប្រទេស​ចិន ដោយ​ «​ក្នុង​រយៈ​ពេល ១០ ឆ្នាំចុងក្រោយនេះ ចិន​រួម​ចំណែក​ប្រហែល ៦០ ភាគរយនៃកំណើនតម្រូវការប្រេងពិភពលោក។​ តែ​ឥឡូវនេះ សេដ្ឋកិច្ចចិនកំពុងធ្លាក់ចុះ» ខណៈ​ការ​ងាក​ទៅ​រក​ថាមពលស្អាតរបស់ប្រទេសនេះ​យ៉ាងឆាប់រហ័ស ក៏កំពុង​ដាក់​សម្ពាធ​ទៅលើតម្រូវការឥន្ធនៈហ្វូស៊ីលផងដែរ។

អ្នក​ជំនាញ​ដដែល​កត់​សម្គាល់​ថា​ ​ទីផ្សារប្រេងបានធ្លាក់​ចុះ​ ​ទោះ​បី​​​មាន​ភាពតានតឹងភូមិសាស្ត្រនយោបាយ និងការបិទផលិតកម្ម ដែល​បញ្ហា​នេះ​ជា​ធម្មតា​តែ​ង​តែ​ជំរុញតម្លៃ​ប្រេង​ឱ្យ​កើន​ឡើង​។ ​លោក​គូស​ភ្ជាប់បញ្ហា​នេះ​ ទៅ​​នឹង​ការ​ព្យាករ​របស់​ IEA ដែល​ថា​ តម្រូវការ​របស់​ប្រេង​សកល​ នឹងឈាន​ដល់​ចំណុច​កំពូល​នៅ​ឆ្នាំ​នេះ។ ​ ​IEA ជឿជាក់ថា តម្រូវការប្រេងកំពុងកើនឡើងក្នុងអត្រាទាប​ជាមធ្យម​ ត្រឹម​ ៩០០ ០០០ បារ៉ែល/ថ្ងៃ​ នៅ​ឆ្នាំ ២០២៤ ធៀប​នឹង​ ២ លាន​ បារ៉ែល/ថ្ងៃ​ កាល​ពី​ឆ្នាំ ២០២៣ ​ខណៈ​ការប្រើប្រាស់ប្រេងសរុប នឹងឈានដល់ ១០៣ លាន​បារ៉ែល​/ថ្ងៃ​ នៅ​ឆ្នាំ​នេះ​។ ​

លោក Birol បាននិយាយថា តម្លៃប្រេងទាបអាចធ្វើ​ឱ្យ​តម្រូវការកើន​ឡើងវិញនៅឆ្នាំក្រោយ ប៉ុន្តែវានឹងនៅតែ​ជួប​បញ្ហា​ដោយ​សារ​តែ​កំណើនសេដ្ឋកិច្ច​យឺតយ៉ាវ​នៅ​ចិន និង​កំណើន​​នៃ​ការ​ងាក​ទៅ​ប្រើ​រថយន្តអគ្គិសនី​នៅទូទាំងពិភពលោក។ ជាមួយ​គ្នានោះ​ ការផ្គត់ផ្គង់លើស​ក្នុងទីផ្សារនឹងបន្ត ដោយសារ​ប្រទេស​ផលិត​ប្រេង​ក្រៅ​អង្គការ OPEC នឹងបន្តបូមប្រេងលើសពីអត្រា​តម្រូវការ​ ដូច​ជា​នៅ សហរដ្ឋ​អាមេរិក​ ប្រេស៊ីល ហ្គីយ៉ាណា និង​កាណាដា ជា​ដើម៕ ​

The post អ្នកជំនាញ៖ ត​ម្លៃប្រេង​នឹង​បន្ត​ធ្លាក់​ចុះ​ ដោយសារ​តម្រូវការ​សកល​ខ្សោយ​ appeared first on Kampuchea Thmey Daily.

រាប់​តាំង​ពី​ចុង​ឆ្នាំ​ ២០២២ មក​ អង្គការ​ OPEC+ បាន​កាត់​បន្ថយ​ទិន្នផល​ប្រេង​របស់​ខ្លួន​ទ្រង់​ទ្រាយ​ធំ​ជា​បន្ត​បន្ទាប់​ ដោយ​បច្ចុប្បន្ន​ សមាជិក​របស់​ប្លុក​​កាត់​បន្ថយ​ទិន្នផលប្រេង​ជា​រួម​ ​​រហូត​ដល់​ ៥,៨៦ លាន​​បារ៉ែល​/ថ្ងៃ ឬ​ប្រហែល​ ៥,៧ ភាគរយ​នៃ​តម្រូវការ​សកល​។ ​ក្នុង​នោះ​ ​រួម​មាន​ទាំង​ការ​កាត់​បន្ថយ​ចំនួន​ ៣,៦៦ លាន​បារ៉ែល​/ថ្ងៃ​ ដែល​នឹង​​ផុត​កំណត់​នៅចុង​ឆ្នាំ​ ២០២៤ និង​ការ​កាត់​បន្ថយ​​ដោយ​ស្ម័គ្រ​ចិត្ត ២,២ លាន​បារ៉ែល​/ថ្ងៃ ​​របស់​សមាជិក​​៨​ប្រទេស​ ដែល​នឹង​ផុត​កំណត់​នៅ​ចុង​ខែ​មិថុនា​នេះ​។

​ក្នុង​ការ​ព្រម​ព្រៀង​​​កាល​ពី​ថ្ងៃ​អាទិត្យ ​អង្គការ​ OPEC+ ​បាន​យល់​ព្រម​បន្តការ​​កាត់​បន្ថយ​ទិន្នផល ៣,៦៦ លាន​បារ៉ែល​/ថ្ងៃ រហូត​ដល់​ចុង​បញ្ចប់​ឆ្នាំ​ ២០២៥​ និង​បន្ត​ការ​កាត់​បន្ថយ​ ២,២ លាន​បារ៉ែល/ថ្ងៃ​ រយៈ​ពេល​៣​ខែ​ទៀត​ រហូត​ដល់​ចុង​ខែ​កញ្ញា​ ឆ្នាំ​ ២០២៤​។  ​

បើ​តាម​រ៉យទ័រ​ OPEC+ ​នឹង​​លុប​ចោល​ជា​បណ្តើរ​ៗ​នូវ​ការ​កាត់​បន្ថយ​ទិន្នផល​ប្រេង​ ២,២ បារ៉ែល​/ថ្ងៃ​ ចាប់​ពី​ខែ​តុលា​​ ឆ្នាំ​ ២០២៤ ដល់​ខែ​កញ្ញា​ ឆ្នាំ​ ២០២៥​។​

រដ្ឋ​មន្ត្រី​ថាមពល​អារ៉ាប៊ីសាអូឌីត​ ព្រះអង្គ​ម្ចាស់​ Abdulaziz bin Salman ​បាន​ប្រាប់​អ្នក​យក​ព័ត៌មាន​ថា​៖ «​យើង​កំពុង​រង់​ចាំ​ឱ្យ​អត្រា​ការ​ប្រាក់​ធ្លាក់​ចុះ​ ហើយ​ដំណើរការ​ប្រសើរ​ជាង​មុន​ផ្នែក​កំណើន​សេដ្ឋកិច្ច»​។  ទ្រង់​បន្ត​ថា​​ OPEC + ​អាច​ផ្អាក​ការ​បន្ធូរ​បន្ថយ​នៃ​ការ​កាត់​បន្ថយ​ ឬ​បន្ថែម​ការ​កាត់​បន្ថយ​ ប្រសិន​បើ​តម្រូវ​ការ​ប្រេង​នៅ​តែខ្សោយ​។

គួរ​គូស​បញ្ជាក់​ថា ទោះ​បី​ OPEC + ​កាត់​បន្ថយ​ទិន្នផល​ប្រេងឆៅ​​​ប្រហែល​ ៥,៧ ភាគរយ​នៃ​ការ​ផ្គត់​ផ្គង់​សកល​ និង​​មាន​ភាព​តាន​តឹង​​នៅ​មជ្ឈិម​បូព៌ា​ក្ដី​ តម្លៃ​ប្រេង​ឆៅ​ពិភព​លោក​បាន​ធ្លាក់​ចុះ​ប្រហែល​ ១០ ភាគរយ​ ​ចាប់​តាំង​ពី​ឡើង​ដល់​កម្រិ​ត​ខ្ពស់ (ម៉ាក Brent ៩១ ដុល្លារ/​បារ៉ែល​)​ ​​មិន​ធ្លាប់​មាន​​ក្នុង​រយៈ​ពេល​​៥​ខែ​នៅ​​ដើ​ម​ខែ​មេសា។

តម្លៃ​ប្រេង​ឆៅ​ប្រភេទ​ Brent ​​ដែល​​ជួញ​ដូរ​​នៅ​ប្រហែល​ ៨០ ដុល្លារ​/បារ៉ែល​នា​ពេល​​ថ្មី​ៗនេះ​ ស្ថិត​នៅ​ក្រោម​តម្លៃ​​ដែល​សមាជិក​ OPEC+ ​ជា​ច្រើន​ចង់​បាន​ ដើម្បី​ធ្វើ​ឱ្យ​មាន​តុល្យភាព​ថវិកា​របស់​ពួក​គេ​។​ ជាមួយ​គ្នា​បញ្ហា​​​នេះ​ ការ​ព្រួយ​បារម្ភ​អំពី​កំណើន​តម្រូវការ​យឺត​​នៅចិន​ ដែល​ជា​ប្រទេស​នាំ​ចូល​ប្រេង​កំពូល​ ​បាន​បន្ថែម​សម្ពាធ​លើ​តម្លៃ​​ ខណៈ​​​​ប្រទេសអភិវឌ្ឍ​ន៍​ក៏បាន​​​​បង្កើន​​ស្តុក​ប្រេង​របស់​ខ្លួន​៕

The post OPEC+ បន្ត​កាត់​បន្ថយ​​ទិន្នផល​​ប្រេង ដល់ចុង​​ឆ្នាំ​ ២០២៥​ ខណៈ​តម្រូវ​ការ​ខ្សោយ​ appeared first on Kampuchea Thmey Daily.

អារ៉ាប៊ីសាអូឌីតបានប្រកាសកាលពីថ្ងៃអាទិត្យថា នឹងកាត់បន្ថយការផលិតប្រេងទាំងនេះនៅក្នុងខែកក្កដា ដើម្បីគាំទ្រដល់ការធ្លាក់ចុះនៃតម្លៃប្រេងឆៅ បន្ទាប់ពីការកាត់បន្ថយផលិតកម្មចំនួន ២ លើកមុនដោយសមាជិក OPEC+ បានបរាជ័យក្នុងការជំរុញឲ្យតម្លៃកើនឡើង ។

ទន្ទឹមនោះ រដ្ឋមន្ត្រីថាមពលអារ៉ាប៊ីសាអូឌីត គឺព្រះអង្គម្ចាស់ Abdulaziz bin Salman មានបន្ទូលនៅក្នុងសន្និសីទសារព័ត៌មានថា “នេះគឺជាថ្ងៃដ៏អស្ចារ្យមួយសម្រាប់ពួកយើង ពីព្រោះគុណភាពនៃកិច្ចព្រមព្រៀងបែបនេះ គឺមិនធ្លាប់មានពីមុនមកឡើយ ខណៈការកំណត់គោលដៅផលិតកម្មថ្មីនេះ ក៏មានតម្លាភាព និងយុត្តិធម៌ជាងមុនផងដែរ” ។

OPEC+ ដែលជាអង្គការនៃប្រទេសនាំចេញប្រេង និងសម្ព័ន្ធមិត្តដែលដឹកនាំដោយប្រទេសរុស្ស៊ី បានឈានដល់កិច្ចព្រមព្រៀងស្តីពីគោលនយោបាយទិន្នផល បន្ទាប់ពីកិច្ចពិភាក្សារយៈពេល ៧ ម៉ោងនៅទីស្នាក់ការកណ្តាលក្នុងទីក្រុងវីយែន ហើយបានយល់ព្រមបន្តកាត់បន្ថយការផ្គត់ផ្គង់ប្រេង ១.៤ លានបារ៉ែលក្នុងមួយថ្ងៃ មុនដល់ដំណាច់ឆ្នាំ ២០២៤ ។

គួរបញ្ជាក់ថា OPEC + បូមប្រេងប្រហែល ៤០ ភាគរយនៃប្រេងឆៅរបស់ពិភពលោក ខណៈអង្គការមួយនេះក៏បានកាត់បន្ថយការផលិតប្រេងចំនួន ២ លានបារ៉ែលក្នុងមួយថ្ងៃ ស្មើនឹង ២ ភាគរយនៃតម្រូវការសកលរួចមកហើយ បន្ទាប់ពីបានព្រមព្រៀងកាលពីឆ្នាំមុន ហើយគ្រាន់តែក្នុងខែមេសា OPEC+ បានកាត់បន្ថយប្រេងចំនួន ១.៦ លានបារ៉ែលក្នុងមួយថ្ងៃដែលចូលជាធរមានក្នុងខែឧសភា រហូតដល់ចុងឆ្នាំ ២០២៣ នេះ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ រុស្ស៊ី ថា លោកខាងលិចកំពុងទាញដៃប្រទេសមួយទៀតឲ្យចូលក្នុងជម្លោះ អ៊ុយក្រែន

The post អារ៉ាប៊ីសាអូឌីត នឹងកាត់បន្ថយការបញ្ជូនប្រេងទៅសេដ្ឋកិច្ចពិភពលោក ១ លានបារ៉ែលក្នុងមួយថ្ងៃ appeared first on Kampuchea Thmey Daily.

បណ្តាប្រទេស OPEC + បានប្រកាសនៅថ្ងៃទី ២ ខែមេសានេះថា ការឯកភាពគ្នាដើម្បីកាត់បន្ថយទិន្នផលប្រេងនឹងធ្វើឡើងចាប់ពីពេលនេះរហូតដល់ឆ្នាំ ២០២៤ ។

ចំពោះអារ៉ាប៊ីសាអូឌីត​ បានសម្រេចចិត្តកាត់បន្ថយការផលិតប្រេងចំនួន ៥០ ម៉ឺនបារ៉ែលក្នុងមួយថ្ងៃ ចាប់ពីខែឧសភារហូតដល់ចុងឆ្នាំ ២០២៣ ខណៈដែលអារ៉ាប់រួមនឹងកាត់បន្ថយការផលិតចំនួន ១៤៤,០០០ បារ៉ែលក្នុងមួយថ្ងៃ, អ៊ីរ៉ាក់ ២១១,០០០ បារ៉ែល, គុយវ៉ែត ១២៨,០០០ បារ៉ែល, អូម៉ង់ ៤ ម៉ឺនបារ៉ែល, អាល់ហ្សេរី ៤៨,០០០ បារ៉ែល, កាហ្សាក់ស្ថាន ៧៨,០០០ បារ៉ែល និងហ្គាបុង ៨ ពាន់បារ៉ែលក្នុងមួយថ្ងៃ ។

ជាមួយគ្នានេះដែរ ឧបនាយករដ្ឋមន្ត្រីរុស្ស៊ីលោក Alexander Novak បានប្រកាសដូចគ្នាកាលដើមឆ្នាំនេះថា រុស្ស៊ីនឹងបន្តកាត់បន្ថយទិន្នផលប្រេងចំនួន ៥០ ម៉ឺនបារ៉ែលក្នុងមួយថ្ងៃ ចាប់ពីខែកុម្ភៈរហូតដល់ចុងឆ្នាំ ២០២៣ ។

សរុបមក បរិមាណនៃការកាត់បន្ថយទិន្នផលប្រេងត្រូវបានប៉ាន់ប្រមាណនៅពេលនេះគឺមាន ១.៦៦ លានបារ៉ែលក្នុងមួយថ្ងៃ ហើយការសម្រេចចិត្តនេះត្រូវបានធ្វើឡើងបន្ថែមលើកិច្ចព្រមព្រៀងដែលបានអនុវត្តក្នុងខែវិច្ឆិកា ឆ្នាំ ២០២២ ស្តីពីការកាត់បន្ថយទិន្នផលប្រេងចំនួន ២ លានបារ៉ែលក្នុងមួយថ្ងៃក្នុងក្របខ័ណ្ឌនៃកិច្ចព្រមព្រៀង OPEC + ៕

ប្រែសម្រួល ៖ នាង រតនៈ

ប្រភព ៖ TASS

ចុចអាន ៖ លោក ហ្សេលេនស្គី ថា ឆាប់ៗនេះ អ៊ុយក្រែន នឹងបើកការវាយលុកដើម្បី ដណ្ដើមទឹកដីពី រុស្ស៊ី មកវិញ

The post ក្រុមប្រទេស OPEC+ ឯកភាពគ្នាកាត់បន្ថយការផលិតប្រេងចំនួន ១.៦៦ លានបារ៉ែលក្នុងមួយថ្ងៃ appeared first on Kampuchea Thmey Daily.

លោក Matsuno Hirokazu ថា ការផ្លាស់ប្តូរបរិមាណផលិតប្រេងនេះ​​ នឹងបំផ្លាញតុល្យភាពរវាងការផ្គត់ផ្គង់ និងតម្រូវការ ដែលធ្វើឲ្យតម្លៃប្រេងនៅតែខ្ពស់ដដែល ។ ដូចនេះ ដើម្បីរក្សាស្ថិរភាព​ ប្រទេសផលិតប្រេងទាំងអស់ ត្រូវបង្កើនផលិតកម្មរបស់ខ្លួន ក៏ដូចជាធ្វើការវិនិយោគផលិតលើសតម្រូវការជាដើម ។

ស្របពេលជាមួយគ្នានេះ រដ្ឋាភិបាលជប៉ុនក៏នឹងតាមដានយ៉ាងដិតដល់លើទីផ្សារថាមពលពិភពលោក ជាពិសេសគឺផលប៉ះពាល់ផ្សេងៗលើសេដ្ឋកិច្ចរបស់ប្រទេសខ្លួនឯងនេះតែម្ដង ។

ចំពោះបញ្ហានេះដែរ ជប៉ុននឹងជំរុញការសម្របសម្រួលជាមួយទីភ្នាក់ងារថាមពលអន្តរជាតិ និងប្រទេសប្រើប្រាស់ប្រេងសំខាន់ៗផ្សេងទៀតផងដែរ ក្នុងគោលបំណងរំឭកដល់ក្រុមហ៊ុនផលិតប្រេង អំពីសារៈសំខាន់នៃការសន្ទនា និងការសម្របសម្រួលរកលទ្ធផលសមស្របជាមួយអ្នកប្រើប្រាស់ ។

គួរបញ្ជាក់ថា កាលពីពេលថ្មីៗនេះ ក្រុមប្រទេសផលិតប្រេង OPEC+ ទើបតែប្រកាសពីការកាត់បន្ថយផលិតកម្មប្រេងឆៅចាប់ពីខែក្រោយរហូតដល់ដំណាច់ឆ្នាំនេះ ខណៈរុស្ស៊ីក៏កាត់បន្ថយការផលិតដូចគ្នាប្រមាណ ៥០ ម៉ឺនបារ៉ែលក្នុងមួយថ្ងៃ ៕

ប្រែសម្រួលដោយ ៖ នាង​ រតនៈ

ប្រភព ៖​ NHK

ចុចអាន ៖ ជប៉ុន ក្បត់សន្យា G7 ទិញប្រេងពី រុស្ស៊ី ក្នុងតម្លៃលើស ៦០ ដុល្លារក្នុងមួយ​បារ៉ែល

The post ជប៉ុន ឲ្យប្រទេសផលិតប្រេង ជួយគ្នារក្សាតុល្យភាពទីផ្សារប្រេងពិភពលោក appeared first on Kampuchea Thmey Daily.

កាលពីថ្ងៃអាទិត្យ ប្រទេសអារ៉ាប៊ីសាអូឌីត អ៊ីរ៉ាក់ និងរដ្ឋឈូងសមុទ្រជាច្រើន បានកាត់បន្ថយការផលិតប្រេងជាង ១ លានបារ៉ែលក្នុងមួយថ្ងៃ ។ ក្នុងនោះ អារ៉ាប៊ីសាអូឌីតកំពុងកាត់បន្ថយទិន្នផល ៥០ ម៉ឺនបារ៉ែលក្នុងមួយថ្ងៃ និងអ៊ីរ៉ាក់ចំនួន ២១១,០០០ បារ៉ែលក្នុងមួយថ្ងៃ ខណៈអារ៉ាប់រួម គុយវ៉ែត អាល់ហ្សេរី និងអូម៉ង់ ក៏កំពុងកាត់បន្ថយការផលិតប្រេងផងដែរ ។

ដោយឡែក​ មិនមែនមានតែ​ OPEC+ ឡើយ រុស្ស៊ីក៏ធ្លាប់ប្រកាសដូចគ្នា​កាត់បន្ថយប្រេង​ជាង​ ៥០ ម៉ឺនបារ៉ែលក្នុងមួយថ្ងៃ ។

ប៉ុន្តែ​ទោះជាយ៉ាងណាក៏ដោយ អាមេរិកកំពុងអំពាវនាវឲ្យអ្នកផលិតបង្កើនទិន្នផលប្រេងឡើងវិញ ដើម្បីជំរុញឲ្យតម្លៃថាមពលធ្លាក់ចុះ ។ ចំណែកការកាត់បន្ថយប្រេងនៅពេលនេះ អាមេរិកយល់ថា មិនគួរកាត់បន្ថយឡើយ ដោយសារតែភាពមិនច្បាស់លាស់នៃទីផ្សារ ដោយសារតែ OPEC+​ គឺមានទិន្នផលប្រេង​ឆៅរហូតដល់ ៤០ ភាគរយ​នៃពិភពលោក ។

លោក Nathan Piper អ្នកវិភាគប្រេងឯករាជ្យបានប្រាប់ BBC ថា ការផ្លាស់ប្តូររបស់ OPEC+ ហាក់ដូចជាការប៉ុនប៉ងរក្សាតម្លៃប្រេងលើសពី ៨០ ដុល្លារក្នុងមួយបារ៉ែលក្នុងរយៈពេលមធ្យម ដោយសារតម្រូវការអាចរងផលប៉ះពាល់ដោយការធ្លាក់ចុះនៃសេដ្ឋកិច្ចពិភពលោក​​ ហើយផលប៉ះពាល់នៃការ​ដាក់ទណ្ឌកម្មរុស្ស៊ីនៅមានកម្រិត ៕

ប្រែសម្រួលដោយ ៖ នាង រតនៈ

ប្រភព ៖ BBC

ចុចអាន ៖ លោក វ៉ាង យី ព្រមាន ជប៉ុន កុំឲ្យធ្វើតាមគោលនយោបាយរបស់ អាមេរិក ចំពោះ ចិន

The post ប្រេងពិភពលោក​ឡើងថ្លៃជាង ៥ ដុល្លារ​ក្នុង​មួយ​បារ៉ែល​ បន្ទាប់ពី​ OPEC+ ​កាត់បន្ថយ​ការផលិត appeared first on Kampuchea Thmey Daily.