ចរាចរណ៍

បុរសម្នាក់ ប្លោងបុកបង្គោលភ្លើងបាត់បង់ជីវិត ក្រោយត្រូវរថយន្តទើបតែចេញពីចូលរួមមង្គលការ បុកយ៉ាងពេញទំហឹង

បានផុស

២ ម៉ោង មុន

នៅ

ថ្ងៃអាទិត្យ ១៦ វិច្ឆិកា ២០២៥

ដោយ

បុរសម្នាក់ វ័យជាង ២០ ឆ្នាំ ត្រូវបានបាត់បង់ជីវិត ខណៈជិះម៉ូតូ ឆ្លងស្តុប ជា សុផារ៉ា ក៏មានរថយន្ត ១ គ្រឿង បើកបុកយ៉ាងពេញទំហឹង បណ្តាលឲ្យប្លោងទៅបោកជាមួយបង្គោលភ្លើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ១១ និង ១៥ នាទីយប់ ថ្ងៃទី ១៥ ខែវិច្ឆិកា ឆ្នាំ ២០២៥ នៅចំណុចស្តុប ជា សុផារ៉ា តាមបណ្ដោយផ្លូវលេខ ៥៩៨ សង្កាត់ទួលសង្កែទី ២ ខណ្ឌឫស្សីកែវ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋបានឲ្យដឹងថា គេបានឃើញបុរសវ័យជាង ២០ ឆ្នាំ ម្នាក់ ជិះម៉ូតូ ១ គ្រឿង ម៉ាក Zoomer X ពណ៌ទឹកក្រូចស ពាក់ស្លាកលេខ ក្រចេះ 1D-9646 បើកបរតាមបណ្ដោយផ្លូវលេខ ១៨០០ ខណៈមកដល់ចំណុចស្តុបកើតហេតុ ក៏មានរថយន្ត ១ គ្រឿង ម៉ាក ហាយឡែនឌ័រ ពណ៌ឈាមជ្រូក ពាក់ស្លាកលេខ ភ្នំពេញ 2AS- 4450 កំពុងបើកតាមបណ្ដោយផ្លូវលេខ ៥៩៨ ដែលទើបតែចេញពីហូបមង្គលការ បានជ្រុលទៅបុកម៉ូតូយ៉ាងពេញទំហឹង បណ្តាលឲ្យបុរសរងគ្រោះ ប្លោងទៅបោកក្បាលជាមួយបង្គោលភ្លើង ស្លាប់តែម្តង។ ភ្លាមៗ សមត្ថកិច្ចកម្លាំងអន្តរាគមន៍របស់ស្នងការដ្ឋាននគរបាលរាជធានីភ្នំពេញ កំពុងល្បាតតាមផ្លូវលេខ ៥៩៨ ក៏ប្រទះឃើញហេតុការណ៍ បានធ្វើការប្រដេញរថយន្តបង្កឃាត់បាននៅក្បែរស្តុប កាំកូស៊ីធី។ ស្របពេលនោះ សមត្ថកិច្ចបានឃាត់អ្នកបើករថយន្តបង្កបញ្ជូនទៅកាន់ប៉ុស្តិ៍នគរបាលរដ្ឋបាលទួលសង្កែទី ២ ដើម្បីសួរនាំ។

ក្រោយកើតហេតុ សមត្ថកិច្ចជំនាញការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានមកវាស់វែងយកម៉ូតូ និង រថយន្ត ទៅរក្សាទុក រង់ចាំដោះស្រាយពេលក្រោយ។ ចំណែក សព ត្រូវបានប្រគល់ជូនក្រុមគ្រួសារសាច់ញាតិយកទៅធ្វើបុណ្យតាមប្រពៃណី៕

អត្ថបទ ៖ រដ្ឋា