រថយន្ដដឹកស្រូវមួយគ្រឿងក្រឡាប់ធ្លាក់ប្រឡាយទាំងព្រឹក

រថយន្តដឹកស្រូវធុនធំមួយគ្រឿងគាំងដៃចង្កូតពេលកំពុងបើកបរ ខណៈដល់ផ្លូវបត់ក៏ធ្លាក់ក្រឡាប់ចូលប្រឡាយទឹកទាំងព្រឹកនៅក្រុងដូនកែវ។

ករណីនេះកើតឡើងនៅព្រឹកថ្ងៃទី២១ ខែតុលា ឆ្នាំ២០២២ វេលាម៉ោង៩និង៤៥នាទីព្រឹក ដោយរថយន្តភ្លៅ៥ ដឹកស្រូវមួយគ្រឿង បានក្រឡាប់ធ្លាក់ប្រឡាយ ស្ថិតនៅចំណុចផ្លូវវៀងក្រុងលេខ២១ កែងបែកជាបួន ភូមិតាឌូ និងប្រហ៊ូត សង្កាត់​រកាក្រៅ ក្រុងដូនកែវ ខេត្តតាកែវ ដែលអ្នកបើកបរមានឈ្មោះ ញោម ជីវិន ប្រុស អាយុ២៩ឆ្នាំ រស់នៅភូមិ​តារ៉េនជោ ឃុំអង្កាញ់ ស្រុកទ្រាំង។

តៃកុងរថយន្តបញ្ជាក់ថា មូលហេតុគឺបណ្តាលមកពីបែកទុយយោប្រេងដៃចង្កូតទើបធ្វើឱ្យគាំងចង្កូតបត់អត់កើត បញ្ជាលែងបានបណ្តាលឱ្យធ្លាក់ចុះដាំទីងចូលក្នុងទឹកតែម្តងទៅ។

ក្នុងហេតុការណ៍នេះដែរ តៃកុងរថយន្តគឺមិនមានគ្រោះថ្នាក់អ្វីធ្ងន់ធ្ងរទេ គឺរងរបួសស្រាល ហើយក៏មិនបណ្តាលឱ្យពលរដ្ឋជិតខាងរងគ្រោះដែរ គឺមានតែស្រូវនិងរថយន្តប៉ុណ្ណោះដែលធ្លាក់ទឹករងការខូចខាត៕

អត្ថបទ៖ វីរៈ