ចរាចរណ៍

ម៉ូតូ ២ គ្រឿង បុកគ្នា ស្លាប់ម្នាក់ និង របួសធ្ងន់ ២ នាក់

បានផុស

២ ខែ មុន

នៅ

ថ្ងៃចន្ទ ២៤ កុម្ភៈ ២០២៥

ដោយ

ម៉ូតូ ២ គ្រឿង បុកគ្នាពេញទំហឹង បណ្ដាលឱ្យស្លាប់មនុស្សម្នាក់ និងរងរបួសធ្ងន់ ២ នាក់ ដែលហេតុការណ៍គ្រោះថ្នាក់ចរាចរណ៍ដ៏រន្ធត់នេះបង្កការភ្ញាក់ផ្អើលកាលពីវេលាម៉ោង ១ និង ០០ នាទីយប់រំលងអធ្រាត្រ ឈានចូលថ្ងៃទី ២៣ ខែកុម្ភៈ ឆ្នាំ ២០២៥ ស្ថិតតាមបណ្ដោយផ្លូវ ៥៨ សង្កាត់ទួលសង្កែទី ១ ខណ្ឌឫស្សីកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សពជនរងគ្រោះមានឈ្មោះ ឃ្លឹម ភារុណ ភេទប្រុស អាយុ ២៧ ឆ្នាំ មុខរបរជាងកញ្ចក់ បច្ចុប្បន្នរស់នៅជិតផ្សារសាំហាន់ ខណ្ឌឫស្សីកែវ។ ស្រុកកំណើតនៅភូមិត្រពាំងរាំង ឃុំត្រពាំងព្រះ ស្រុកព្រៃឈរ ខេត្តកំពង់ចាម។

យោងតាមប្រភពព័ត៌មានពីពលរដ្ឋបានឱ្យដឹងថា មុនពេលកើតហេតុគេឃើញមានបុរសម្នាក់សង្ស័យស្រវឹងស្រាបានជិះម៉ូតូតែម្នាក់ឯង ម៉ាក Yamaha EXITER GP ពណ៌ខៀវ ពាក់ផ្លាកលេខ ភ្នំពេញ 1IT – 9011 ធ្វើដំណើរតាមបណ្ដោយផ្លូវ ៥៨ ទិសដៅពីកើតមកលិច ក្នុងល្បឿនលឿន ខណៈមកដល់ចំណុចកើតហេតុខាងលើ ក៏មានម៉ូតូ ១ គ្រឿងទៀត ម៉ាកសង់ឌ្រីម ហុងដាសេ ១២៥ ពណ៌ខ្មៅ ពាក់ផ្លាកលេខ ភ្នំពេញ 1 KW- 6069 ជិះដោយយុវជន ២ នាក់ ធ្វើដំណើរតាមផ្លូវ ៥៨ ទិសដៅពីលិចមកកើត បញ្ច្រាសទិសគ្នា។ លុះធ្វើដំណើរដល់ចំណុចកើតហេតុខាងលើ ក៏ស្រាប់តែម៉ូតូម៉ាក Yamaha EXITER GP រេចង្កូតជិះចូលគន្លងផ្លូវគេទៅបុកគ្នាពេញទំហឹង បណ្ដាលឱ្យម្ចាស់ខ្ទាតបោកក្បាលស្លាប់នឹងថ្នល់។ ចំណែកភាគីម្ខាងទៀតរងរបួសធ្ងន់ធ្ងរ ២ នាក់ ត្រូវរថយន្តសង្គ្រោះបន្ទាន់ដឹកទៅមន្ទីរពេទ្យភ្លាមៗ ផងដែរ។ រីឯម៉ូតូទាំង ២ គ្រឿង រងការខូចខាតផ្នែកខាងមុខយ៉ាងដំណំ។

ប្រភពពីបងប្អូនជនរងគ្រោះបានបន្តប្រាប់ថា មុនពេលកើតហេតុជនរងគ្រោះខាងលើបានមកហូបអីជួបជុំគ្នា និងហូបស្រាតិចតួចដែរ តែមិនគួរណាជួបរឿងបែបនេះសោះ។

ក្រោយពេលកើតហេតុសមត្ថកិច្ចមូលដ្ឋានចុះមកដល់ចំណុចកើតហេតុទាក់ទងខាងសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញធ្វើការវាស់វែងយកម៉ូតូទាំង ២ គ្រឿងទៅរក្សាទុក រង់ចាំដោះស្រាយគ្នានៅពេលក្រោយ។ ចំណែកសព សមត្ថកិច្ចបានធ្វើកំណត់ហេតុ រួចប្រគល់ជូនខាងសាច់ញាតិយកទៅធ្វើបុណ្យតាមប្រពៃណីនៅស្រុកកំណើត៕

អត្ថបទ ៖ សំណាង