ចរាចរណ៍

បុរសម្នាក់ សង្ស័យស្រវឹង ចូលស្ថានីយប្រេងឥន្ធនៈចតរថយន្តមួយសន្ទុះ ច្រឡំជាន់ហ្គែរ បុករះរបងការ៉ាស់សាំង

បានផុស

១ ខែ មុន

នៅ

ថ្ងៃពុធ ២៦ កុម្ភៈ ២០២៥

ដោយ

បុរសម្នាក់ សង្ស័យស្រវឹង បើករថយន្ត ១ គ្រឿង ចូលចតគេងក្នុងស្ថានីយប្រេងឥន្ធនៈ បានច្រឡំជាន់ហ្គែរបុករះរបងស្ថានីយប្រេងឥន្ធនៈ រួចហោះបុកម៉ូតូ ១ គ្រឿង និងបន្តបុកជញ្ជាំងកញ្ចក់ហាងលក់រថយន្ត ១ កន្លែង បណ្ដាលឲ្យរងការខូចខាតយ៉ាងដំណំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១១ និង ៣០ នាទីយប់ ថ្ងៃទី ២៥ ខែកុម្ភៈ ឆ្នាំ ២០២៥ ស្ថិតតាមបណ្ដោយផ្លូវសហព័ន្ធរុស្ស៊ី កែងផ្លូវបេតុង(វត្តនាគវ័ន្ត) សង្កាត់ស្រះចក ខណ្ឌដូនពេញ រាជធានីភ្នំពេញ។

តាមប្រភពពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសម្នាក់ បើករថយន្ត LEXUS RX330 ពណ៌ទឹកមាស ពាក់ផ្លាកលេខ នគរបាល 2-8668 ចូលមកចតក្នុងស្ថានីយប្រេងឥន្ធនៈ បានមួយសន្ទុះ អ្នកបើករថយន្តបានគេងក្នុងរថយន្ត ប្រហែលងើបមកវិញច្រឡំជាន់ហ្គែរ ក៏ទៅបុកនឹងរបងស្ថានីយប្រេងឥន្ធនៈ រួចហោះបុកម៉ូតូ ១ គ្រឿងទៀត ពេលកំពុងជិះកាត់ បណ្ដាលឲ្យអ្នកជិះម៉ូតូ HONDA SCOOPY ពណ៌ស ពាក់ផ្លាកលេខ ព្រែវែង 1T-9424 រងរបួសស្រាល។ ចំណែករថយន្ត បានបន្តទៅបុកកញ្ចក់ហាងលក់រថយន្ត ១ កន្លែង បន្ថែមទៀត។

ក្រោយពេលកើតហេតុសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះមកធ្វើការវាស់វែងយករថយន្ត និង ម៉ូតូ ទៅរក្សាទុក រង់ចាំការដោះស្រាយនៅពេលក្រោយ៕

អត្ថបទ ៖ ម៉េង