ចរាចរណ៍

គ្រោះថ្នាក់ចរាចរណ៍បើកបរដោយជនជាតិចិន បណ្ដាលឲ្យស្លាប់មនុស្សពីរនាក់នៅខណ្ឌសែនសុខ

បានផុស

១ ខែ មុន

នៅ

ថ្ងៃអង្គារ ១៣ ឧសភា ២០២៥

ដោយ

រថយន្តម៉ាក ALPHARD មួយគ្រឿងបេីកបរដោយជនជាតិចិន បេីកក្នុងល្បឿនលឿនជ្រុលបុកម៉ូតូមួយគ្រឿងម៉ាក ZOOMERX បណ្តាលឲ្យយុវជន២នាក់ស្លាប់ភ្លាមៗ នៅកន្លែងកើតហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង០៣និង៣០នាទីទាបភ្លឺ ថ្ងៃទី១៣ ខែឧសភា ឆ្នាំ២០២៥ នៅតាមបណ្ដោយផ្លូវលេខ១០០៣ កែងផ្លូវបេតុងលេខ១៩៥៨ ស្ថិតនៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកេីតហេតុគេឃើញរថយន្តម៉ាក ALPHARD ពណ៌ខ្មៅពាក់ស្លាកលេខ កម្ពុជា H-C-SELA បេីកបរដោយជនជាតិចិន តាមបណ្ដោយផ្លូវលេខ១០០៣ ក្នុងទិសដៅពីជេីងទៅត្បូងក្នុងល្បឿនយ៉ាងលឿន លុះមកដល់ចំណុចកេីតហេតុដែលជាចំណុចផ្លូវបំបែកជាបួន ក៏ស្រាប់តែមានយុវជន២នាក់ជិះម៉ូតូម៉ាក ZOOMERX ពណ៌ទឹកក្រូច ពាក់ស្លាកលេខ កំពង់ចាម 1R-3423 ធ្វើដំណើរតាមបណ្ដោយផ្លូវលេខ១៩៥៨ ក្នុងទិសដៅពីកេីតទៅលិច ក៏ត្រូវរថយន្តម៉ាក ALPHARD បុកពេញទំហឹងបណ្តាលឲ្យផ្លោងបោកទៅនឹងកញ្ចក់រថយន្តធ្លាក់មកលេីផ្លូវស្លាប់ទាំង២នាក់ ចំណែកម៉ូតូជនរងគ្រោះខ្ទាតច្រើនម៉ែត្រ។

ប្រភពដដែលបានបន្តទៀតថា ក្រោយគ្រោះថ្នាក់ភ្លាមៗ ជនជាតិជាច្រើននាក់ដែលជិះក្នុងរថយន្ដបានចុះពីរថយន្តហេីយនាំគ្នារត់គេចខ្លួនបាត់ស្រមោលអស់។ ចំណែកប្រភពពីអ្នកស្គាល់ជនរងគ្រោះថា ពួកគេជាបុគ្គលិកហាងអាហារចិន នៅម្តុំផ្សារម៉ាក្រូ ដោយម្នាក់ជាជនជាតិខ្មែរ និងម្នាក់ទៀតជាជនជាតិចិន ហេីយពួកគាត់ទេីបមកពីដេីរលេង បន្ទាប់ពីចប់ម៉ោងការងារ។ អ្នកស្គាល់បានបញ្ជាក់ទៀតថា ជនរងគ្រោះជនជាតិចិន ជាចុងភៅ ហេីយជនរងគ្រោះជនជាតិខ្មែរ ជាបុគ្គលិក។

ក្រោយពេលកេីតហេតុសមត្ថកិច្ចនគរបាលប៉ុស្តិ៍ និងសមត្ថកិច្ចជំនាញចរាចរណ៍ខណ្ឌសែនសុខបានទាក់ទងទៅជំនាញចរាចរណ៍នៃការរិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញដេីម្បីធ្វើការវាស់វែងយកវត្ថុតាងទៅរក្សាទុកដេីម្បីរង់ចាំដោះស្រាយនៅពេលក្រោយ ចំណែកសពជនជាតិខ្មែរត្រូវបានសមត្ថកិច្ចមូលដ្ឋាននិងជំនាញចរាចរណ៍ធ្វើលិខិតប្រគល់សពអោយក្រុមគ្រួសារដេីម្បីយកទៅធ្វើបុណ្យតាមប្រពៃណី ចំណែកសពជនជនចិន ត្រូវមិត្តភក្តិជាតិចិនយកទៅធ្វើបុណ្យតាមប្រពៃណីនៅស្រុកចិនវិញ៕

អត្ថបទ៖ សំណាង