ចរាចរណ៍

បុរសម្នាក់ស្លាប់ភ្លាមៗ និងនារីម្នាក់រងរបួសធ្ងន់ បន្ទាប់ពីម៉ូតូធុនធំជ្រុលបុករបាំងថ្មពុះចែកទ្រូងផ្លូវ

បានផុស

១០ ខែ មុន

នៅ

ថ្ងៃចន្ទ ១ កញ្ញា ២០២៥

ដោយ

បុរសម្នាក់ ស្លាប់ភ្លាមៗ នៅនឹងកន្លែង រីឯនារីម្នាក់រួមដំណើរជាមួយ រងរបួសធ្ងន់ ត្រូវបានបញ្ចូនទៅមន្ទីរពេទ្យ បន្ទាប់ពីជិះម៉ូតូធុនធំ ១ គ្រឿងយ៉ាងលឿន ទៅបុករបាំងថ្មពុះចែកទ្រូងផ្លូវ កាលពីវេលាម៉ោង ១ និង ២០ នាទីយប់រំលងអធ្រាត្រ ឈានចូលថ្ងៃទី ១ ខែកញ្ញា ឆ្នាំ ២០២៥ ទល់មុខអគារ Booyoung Town តាមបណ្ដោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ជនរងគ្រោះទាំងពីរនាក់ នៅមិនទាន់ស្គាល់អត្តសញ្ញាណនៅឡើយទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីពលរដ្ឋដែលឃើញហេតុការណ៍ បានឲ្យដឹងថា មុនពេលកើតហេតុ គេបានឃើញបុរសម្នាក់ជិះម៉ូតូធុនធំម៉ាក Kawasaki ពណ៌ស្វាយ គ្មានស្លាកលេខ ដំណើរមកល្បឿនលឿនតាមទិសខាងកើតទៅលិច ហើយមាននារីម្នាក់អង្គុយនៅពីក្រោយ។ នៅពេលដល់ចំណុចផ្លូវកោង ពេលបត់ចង្កូតមិនទាន់ ទើបម៉ូតូជ្រុលបុករបាំថ្មពុះចែកទ្រូងផ្លូវ ដោយអូសទៅប្រហែល ១០០ ម៉ែត្រ។

ក្រោយការបុក អ្នកជិះទាំងពីរនាក់ ហោះផ្លោងទៅបោកបង្គោលភ្លើងបំភ្លឺផ្លូវយ៉ាងខ្លាំង បណ្តាលឲ្យបុរសដែលបើកម៉ូតូបែកក្បាលធ្លាយខួរស្លាប់ភ្លាមៗ នៅកន្លែងកើតហេតុ ខណៈនារីអង្គុយពីក្រោយ រងរបួសធ្ងន់ ក្បាលបែកហូរឈាម ត្រូវបានក្រុមគ្រូពេទ្យសង្គ្រោះបន្ទាន់ (សាមុយ) ដឹកយកទៅមន្ទីរពេទ្យព្រះកុសុមៈ។

បន្ទាប់ពីកើតហេតុ កម្លាំងសមត្ថកិច្ចមូលដ្ឋាន និងកម្លាំងជំនាញចរាចរណ៍ខណ្ឌសែនសុខ បានចុះទៅកន្លែងកើតហេតុ ដើម្បីកត់ត្រាហេតុការណ៍ និងស្វែងរកសាច់ញាតិជនរងគ្រោះ ប៉ុន្តែមិនទាន់ទំនាក់ទំនងនៅឡើយទេ។

បច្ចុប្បន្ន សពជនរងគ្រោះ ត្រូវបានយកទៅតម្កល់នៅវត្តទឹកថ្លា រង់ចាំសាច់ញាតិ។ ចំណែកម៉ូតូជនរងគ្រោះ ក៏ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌសែនសុខផងដែរ៕

អត្ថបទ ៖ សំណាង