ចរាចរណ៍

ស្ត្រីម្នាក់ ឡើងមកពីខេត្តឲ្យកូនជូនទៅធ្វើធ្មេញ បែរជាជួបគ្រោះថ្នាក់ចរាចរណ៍ស្លាប់យ៉ាងអាណោចអាធ័ម

បានផុស

៩ ខែ មុន

នៅ

ថ្ងៃអង្គារ ៩ កញ្ញា ២០២៥

ដោយ

ស្ត្រីម្នាក់ ឡើងមកពីខេត្ត ដើម្បីឲ្យកូនជូនទៅធ្វើធ្មេញ បែរជាត្រូវម៉ូតូបើកផ្លូវឡានពេទ្យបុក បណ្ដាលឲ្យដួលចូលក្រោមឡាន រួចកិនពីលើស្លាប់ពេលបញ្ជូនទៅកាន់មន្ទីរពេទ្យ ភ្លាមៗ នោះ រថយន្តបង្ក បានបើកចេញពីចំណុចទីតាំងកន្លែងកើតហេតុបាត់ស្រមោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៧ និង ៣០ នាទីយប់ ថ្ងៃទី ៨ ខែកញ្ញា ឆ្នាំ ២០២៥ ស្ថិតតាមបណ្ដោយផ្លូវសហព័ន្ធរុស្ស៊ី សង្កាត់កាកាបទី ១ ខណ្ឌពោធិ៍សែនជ័យ រាជធានីភ្នំពេញ។

តាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជនម្នាក់បើកបរម៉ូតូ ១ គ្រឿង ម៉ាក Smash Revo ពណ៌ខ្មៅ ពាក់ស្លាក ភ្នំពេញ 1Q-0651 ទិសដៅពីលិចទៅកើត ដោយបើកបរនៅពីមុខរថយន្តសង្គ្រោះបន្ទាន់របស់មន្ទីរពេទ្យមួយ មិនចាំឈ្មោះ ក្នុងល្បឿនលឿន ខណៈមកដល់ចំណុចកើតហេតុ ស្រាប់តែមានម៉ូតូ ១ គ្រឿង ម៉ាក HONDA ZOOMER-X ពាក់ផ្លាកលេខ ភ្នំពេញ 1FN-8811 ជិះគ្នាស្រីៗ ២ នាក់ បើកក្នុងទិសដៅពីត្បូងទៅជើង បានបុកគ្នាពេញទំហឹង បណ្ដាលឲ្យស្ត្រីម្នាក់ដួលចូលក្រោមកង់រថយន្តកិន ភ្លាមៗ អ្នកនៅជិតកន្លែងកើតហេតុបាននាំគ្នាជួយសង្គ្រោះ ដោយដឹកជនរងគ្រោះទៅមន្ទីរពេទ្យតាមកង់បី តែជាអកុសលជនរងគ្រោះបានស្លាប់បាត់ទៅហើយ។ ចំណែករថយន្តដែលកិននោះគឺឃើញថាជារថយន្តសង្គ្រោះបន្ទាន់ តែមិនចាំឈ្មោះ ដោយសារកិនជនរងគ្រោះ ហើយបានបើកគេចចេញពីកន្លែងកើតហេតុបាត់ស្រមោល។

ដោយឡែកបើតាមតាមការបញ្ជាក់ពីកូនស្រីជនរងគ្រោះបានឲ្យដឹងថា ម្ដាយ(ជនរងគ្រោះ)ឈ្មោះ ពៅ ហ៊ុន អាយុជាង ៦០ ឆ្នាំ មានស្រុកកំណើតភូមិត្រពាំងជ្រៃ ស្រុកកំពង់ត្រាច ខេត្តកំពត។

ក្រោយពេលកើតហេតុសមត្ថកិច្ចជំនាញចរាចរណ៍ផ្លូវគោក នៃអធិការដ្ឋាននគរបាលខណ្ឌពោធិ៍សែនជ័យ បានចុះទៅធ្វើការវាស់វែងយកម៉ូតូទាំងពីរគ្រឿងរក្សាទុក រង់ចាំដោះស្រាយនៅពេលក្រោយ និងធ្វើការស្រាវជ្រាវរករថយន្តបង្កមកអនុវត្តតាមនីតិវិធីច្បាប់។ ចំណែកឯសពជនរងគ្រោះ សមត្ថកិច្ចធ្វើលិខិតប្រគល់ជូនសាច់ញាតិយកទៅធ្វើបុណ្យតាមប្រពៃណី៕

អត្ថបទ ៖ ម៉េង