ពលរដ្ឋនៅភូមិអូរអណ្តូង១ សង្កាត់ព្រែកប្រា កំពុងរស់នៅជាមួយទឹកស្អុយចេញពីលូចូលផ្ទះ អាជ្ញាធរខណ្ឌថា ចៅសង្កាត់អត់រាយការណ៍មកទេ

ប្រជាពលរដ្ឋប្រមាណជាង៥០០គ្រួសារ រស់នៅភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ កំពុងរស់នៅក្រោមក្លិនស្អុយ ខណៈផ្ទះសម្បែងពួកគាត់រងគ្រោះដោយជំនន់ទឹកភ្លៀងហើយពិសេសជាងនេះទឹកហូរចេញ​ពីលូ​លិចលង់បន្ថែមទៀត។

ប្រជាពលរដ្ឋបាននិយាយថា ពួកគាត់រងគ្រោះដោយជំនន់ទឹកភ្លៀងថែមទាំងទឹកស្អុយច្រាលចេញពីប្រព័ន្ធលូបង្កឲ្យលិចលង់ផ្ទះសម្បែងប្រមាណជា១០ថ្ងៃមកហើយ តែពុំឃើញមានអាជ្ញាធរចុះទៅសាកសុខទុក្ខនោះទេ ព្រោះតំបន់នោះជះក្លិនស្អុយខ្លាំងពេក លំបាកដល់អាជ្ញាធរមិនអាចចុះសួរសុខទុក្ខតាមខ្នងផ្ទះ។ ពួកគាត់បន្ថែមថា ពួកគាត់រស់នៅជាមួយទឹកស្អុយយ៉ាងលំបាក ហើយពួកគាត់កំពុងព្រួយបារម្មណ៍ដោយសារខ្លាចមូសខ្លាខាំបង្កឲ្យក្លាយជាជំងឺគ្រុនឈាមយ៉ាងផុយស្រួយបំផុត។

ទាក់ទិននឹងករណីទឹកជំនន់រួមទាំងទឹកលូស្អុយនេះ លោក គុយ គឹមហ៊ាង នាយករងរដ្ឋបាលសាលាខណ្ឌច្បារអំពៅបានប្រាប់ កម្ពុជាថ្មី ថា រឿងនេះគឺលោកស្រី ជួប សុីយ៉ុន ចៅសង្កាត់ព្រែកប្រាពុំទាន់ធ្វើរបាយការណ៍ជូនមករដ្ឋបាលខណ្ឌបានដឹងនោះទេ។ លោកនាយរងរដ្ឋបាលខណ្ឌបានបញ្ជាក់ទៀតថា រង់ចាំមើលថ្ងៃទី៩ខែតុលានេះ ក្រែងលោកស្រីចៅសង្កាត់គាត់ធ្វើរបាយការណ៍សុំកិច្ចអន្តរាគមន៍ដាក់ម៉ាសុីនបូមទឹកដូចរាល់ឆ្នាំ។

ប្រជាពលរដ្ឋបានសម្ដែងការខកចិត្តចំពោះអាជ្ញាធរដែលពុំបានចុះសាកសួរសុខទុក្ខដល់ប្រជាពលរដ្ឋតាមខ្នងដូចពេលចុះទៅសុំឲ្យប្រជាពលរដ្ឋបោះឆ្នោតជូនគាត់៕

អត្ថបទ៖ នរា