ព័ត៌មានជាតិ

អាជ្ញាធរក្រុងប៉ោយប៉ែត ដាក់វិធានការក្តៅ ៤ ចំណុច ដល់ក្រុមហ៊ុនរថយន្តដឹកទំនិញធុនធំ និងរថយន្តក្រឡុកស៊ីម៉ងត៍ បញ្ចៀសការកកស្ទះចរាចរណ៍ ខូចផ្លូវ

បានផុស

៨ ខែ មុន

នៅ

ថ្ងៃពុធ ២៩ តុលា ២០២៥

ដោយ

កាលពីព្រឹកថ្ងៃទី ២៩ ខែតុលា ឆ្នាំ ២០២៥ នេះ ប្រធានក្រុមការងារ និងអាជ្ញាធរក្រុងប៉ោយប៉ែត ខេត្តបន្ទាយមានជ័យ បានដាក់វិធានការក្តៅចំនួន ៤ ចំណុច ដល់បណ្ដាក្រុមហ៊ុនរថយន្តដឹកទំនិញធុនធំ និងរថយន្តក្រឡុកស៊ីម៉ងត៍ ដើម្បីបញ្ចៀសការកកស្ទះចរាចរណ៍ និងខូចផ្លូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដាក់ចេញវិធានការក្តៅនេះក្នុងកិច្ចប្រជុំដោះស្រាយបញ្ហាធ្វើឡើងក្រោមការចូលរួមដឹកនាំដោយ លោក ប៉ាន់ ខែមប៊ុនថន ប្រធានក្រុមការងារចុះជួយមូលដ្ឋានក្រុងប៉ោយប៉ែត និង លោក គាត ហ៊ុន អភិបាលក្រុងប៉ោយប៉ែត ព្រមទាំងអ្នកពាក់ព័ន្ធជាម្ចាស់ក្រុមហ៊ុនរថយន្តដឹកទំនិញធុនធំ និងក្រុមហ៊ុនក្រឡុកស៊ីម៉ងត៍នានា នៅក្រុងប៉ោយប៉ែត ផងដែរ។

បន្ទាប់ពីមានការលើកឡើងរបស់ លោក គាត ហ៊ុល លើបញ្ហាផ្លូវខូច ស្ទះចរាចរណ៍ ដោយសាររថយន្តដឹកទំនិញធុនធំ និងរថយន្តបាញ់ក្រឡុកស៊ីម៉ងត៍ចតបាញ់ស៊ីម៉ងត៍លើផ្លូវសាធារណៈមិនថាយប់ ឬថ្ងៃ លោក ប៉ាន់ ខែមប៊ុនថន បានដាក់ចេញវិធានការក្តៅជាបន្ទាន់ដល់បណ្ដាក្រុមហ៊ុនរថយន្តខាងលើចំនួន ៤ ចំណុច រួមមាន ៖ ១-គ្រប់ការងារជ្រែងជើងរថយន្តបាញ់បេតុងនៅលើផ្លូវសាធារណៈសម្រាប់សាងសង់សំណង់ផ្សេងៗ ត្រូវសហការជាមួយអាជ្ញាធរមូលដ្ឋានឃុំ-សង្កាត់ និងនគរបាលសណ្ដាប់ធ្នាប់ ដើម្បីសម្រួលចរាចរណ៍ និងបញ្ចៀសទិសចរាចរណ៍កុំឲ្យមានការកកស្ទះខកការធ្វើដំណើរពលរដ្ឋ។ ២-រួមគ្នាថែរក្សាសមិទ្ធផលជាតិ និងផ្លូវសាធារណៈក្នុងការដឹកទំនិញមិនឲ្យលើសទម្ងន់។ ៣-អនុវត្តវិធានការក្ដៅចំពោះក្រុមហ៊ុន ឬម្ចាស់អាជីវកម្មទាំងឡាយណាដែលមិនសហការជាមួយអាជ្ញាធរធ្វើដោយចិត្តឯងប៉ះពាល់សិទ្ធអ្នកធ្វើដំណើរ និងពលរដ្ឋផ្សេងទៀត។ ៤-ស្នើដល់ក្រុមហ៊ុនក្រឡុកបេតុង ជួយចូលរួមជួសជុលផ្លូវដែលខូចដោយសាររថយន្តក្រុមហ៊ុនរបស់ខ្លួន។