ព័ត៌មានជាតិ
ការវិនិយោគផ្នែកកសិកម្មកើនឡើង ២០០% រយៈពេល ១០ ខែឆ្នាំ២០២៥ មានទុនវិនិយោគដល់ ៤០០ លានដុល្លារ
មន្រ្តីគណៈកម្មាធិការវិនិយោគកម្ពុជាបានបង្ហាញទិន្នន័យពីការវិនិយោគលើវិស័យកសិកម្ម មានកំណើនយ៉ាងខ្លាំងដោយនៅក្នុងរយៈពេល ១០ ខែឆ្នាំ ២០២៥ ទទួលបានទំហំទុនវិនិយោគប្រមាណ ៤០០ លានដុល្លារកើនឡើង ២០០% បើធៀបឆ្នាំ ២០២៤។
លោក សួន សុផល អគ្គលេខាធិការរងនៃគណៈកម្មការវិនិយោគកម្ពុជាបានថ្លែងថា ទំហំទុនវិនិយោគវិស័យកសិកម្មមានការកើនឡើងយ៉ាងគំហុកក្នុងរយៈប៉ុន្មានឆ្នាំចុងក្រោយនេះ ដោយសារការដាក់ចេញគោលនយោបាយអនុគ្រោះរបស់រដ្ឋាភិបាលដែលបានទាក់ទាញការវិនិយោគលើវិស័យកសិកម្ម ដែលជាវិស័យដ៏សំខាន់ជាឆ្អឹងខ្នងទ្រទ្រង់សេដ្ឋកិច្ចកម្ពុជា។
នៅឆ្នាំ ២០២៤ កម្ពុជាទទួលបានគម្រោងវិនិយោគចំនួន ៤១៤ គម្រោង ដែលជាកំណត់ត្រាច្រើនបំផុតក្នុងរយៈពេល ៣០ ឆ្នាំ ខណៈរយៈពេល ១០ ខែ ឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជាបានអនុម័ត្រគម្រោងវិនិយោគចំនួន ៥៧៥ គម្រោង ដែលមានទុនវិនិយោគជាង ៩ ០០០ លានដុល្លារ។
លោក សួន សុផល បានបញ្ជាក់ថា ក្នុងចំណោម ៥៧៥ គម្រោងនេះ វិស័យកសិកម្មនិងកសិឧស្សាហកម្មបានរួមចំណែកយ៉ាងធំធេង ដែលបានទាក់ទាញទុនវិនិយោគជាង ៤០០ លានដុល្លារ។ បើធៀបរយៈពេលដូចគ្នាក្នុងឆ្នាំ ២០២៤ មានការកើនឡើងជាង ២០០%។
លោក សួន សុផល បានបញ្ជាក់ថា នៅក្រុមប្រឹក្សាអភិវឌ្ឍន៍កម្ពុជាបានបង្កើតតុវិនិយោគកសិចំណីអាហារ ដែលមានសមាជិកមកពីក្រសួងកសិកម្ម ក្រសួងឧស្សាហកម្ម ក្រសួងពាណិជ្ជកម្ម និងក្រសួងសេដ្ឋកិច្ចនិងហិរញ្ញវត្ថុ។ តាមរយៈការដាក់ចេញយន្តការនេះ បានជួយសម្រួលទាក់ទាញការវិនិយោគបន្ថែមលើវិស័យកសិកម្ម និងកសិចំណីអាហារស្របពេលដែលរដ្ឋាភិបាលកម្ពុជាបានជំរុញការអនុវត្តគោលនយោបាយ និងច្បាប់វិនិយោគជាគោល។
បើតាមមន្រ្តីគណៈកម្មាធិការវិនិយោគកម្ពុជា ការដាក់ចេញគោលនយោបាយ និងច្បាប់វិនិយោគរបស់ប្រទេសកម្ពុជា មានភាពចំហនិងបើកទូលាយ ដែលអាចនិយាយបានថាមានការលើកទឹកចិត្តនិងអនុគ្រោះបំផុត បើប្រៀបធៀបបណ្តាប្រទេសផ្សេងទៀតលើពិភពលោក។
ថ្លែងក្នុងពិធីបើកវេទិកា និងពិព័រណ៍កសិកម្មកម្ពុជា (CAFE25) នៅព្រឹកនេះ លោក ប្រាក់ ដាវីដ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទបានបញ្ជាក់ថា វិស័យកសិកម្មកម្ពុជាសម្រេចបានលទ្ធផលគួរជាទីមោទនៈ ក្នុងរយៈពេលជាច្រើនឆ្នាំកន្លងមកនេះ ដោយបានជំរុញប្រទេសកម្ពុជាឱ្យចេញផុតពីស្ថានភាពខ្វះស្បៀង និងពឹងផ្អែកលើជំនួយស្បៀងអាហារពីបរទេស មកជាការធានាបានទាំងស្រុងនូវសន្តិសុខស្បៀងក្នុងស្រុក ជាពិសេសក្នុងកាលៈទេសៈនៃការបិទព្រំដែនជាឯកតោភាគីរបស់ប្រទេសថៃអស់រយៈពេលជាច្រើនខែកន្លងមកនេះ ដែលបង្ហាញពីចំណុចខ្លាំង និងភាពធន់នៃវិស័យកសិកម្មកម្ពុជាក្នុងពេលជួបវិបត្តិ។
ជាងនេះទៀត កម្ពុជាសម្រេចបានការនាំចេញផលិតផលកសិកម្មរាប់លានតោនជារៀងរាល់ឆ្នាំទៅកាន់ទីផ្សារពិភពលោក ដែលរួមចំណែកយ៉ាងសំខាន់ក្នុងការលើកកម្ពស់ជីវភាពប្រជាកសិករនៅទូទាំងប្រទេស ទ្រទ្រង់កំណើនសេដ្ឋកិច្ចជាតិ និងចូលរួមធានាសន្តិសុខស្បៀងពិភពលោកថែមទៀតផង។
យ៉ាងណាមិញ ខណៈដែលវិស័យកសិកម្មប្រទេសកម្ពុជាបានបោះជំហានមកដល់ដំណាក់កាលថ្មី ប៉ុន្តែបើតាមមន្រ្តីក្រសួងកសិកម្មបានអះអាងថា ក៏កំពុងជួបប្រទះបញ្ហាប្រឈមថ្មីមួយចំនួនជាពិសេសលើបញ្ហានិរន្តរភាពនៃផលិតកម្ម តម្រូវការទីផ្សារ ថ្លៃដើមផលិតខ្ពស់, ទីផ្សារនិងការកែច្នៃកសិផលនៅមានកម្រិត និងការប្រែប្រួលមិនអាចស្មានទុកជាមុនបាននៃតម្លៃ ដែលទាំងអស់នេះទាមទារឱ្យគ្រប់តួអង្គពាក់ព័ន្ធចូលរួមសហការ និងគាំទ្រកាន់តែសកម្ម ក្នុងគោលបំណងបន្តរួមគ្នាដោះស្រាយ និងផ្តល់ក្តីសង្ឃឹមដល់ប្រជាកសិករដែលកំពុងខិតខំប្រឹងប្រែងផលិត ដើម្បីធានាសន្តិសុខស្បៀងផង លើកកម្ពស់ជីវភាពគ្រួសារផង និងទ្រទ្រង់កំណើនសេដ្ឋកិច្ចជាតិផង។
ដើម្បីរួមចំណែកបង្កើនការស្រូបយកកសិផលក្នុងស្រុកមកកែច្នៃជាផលិតផលក្នុងស្រុក និងបង្កើតទីផ្សារបន្ថែម ក្រសួងកសិកម្ម រុក្ខាប្រមាញ់ និងនេសាទ បានរៀបចំវេទិកា និងពិព័រណ៍កសិកម្មកម្ពុជា ក្នុងគោលបំណងបង្កើតឱ្យមានវេទិកាពិភាក្សាកម្រិតខ្ពស់ និងការដាក់តាំងបង្ហាញកសិផលសក្តានុពលកម្ពុជា ដែលតាមរយៈវេទិការនេះវិស័យឯកជនទាំងក្នុង និងក្រៅប្រទេស ជាពិសេស វិនិយោគិន និងធុរជន នឹងមានឱកាសស្វែងយល់ពីកាលានុវត្តភាពវិនិយោគក្នុងវិស័យកសិកម្ម, កសិ-ពាណិជ្ជកម្ម និងកសិ-ស្បៀងអាហារនៅកម្ពុជា។
មន្រ្តីក្រសួងកសិកម្មបានគូសបញ្ជាក់ថា តាមរយៈវេទិកានិងពិព័រណ៍កសិកម្មកម្ពុជា ឆ្នាំ២០២៥នេះ បានក្លាយជាចំណុចចាប់ផ្តើមដ៏ល្អមួយទៀត សម្រាប់ការបង្កើនភាពជាដៃគូ រវាងវិនិយោគិន ធុរជន និងកសិករ ដែលនឹងចូលរួមចំណែកបង្កើតទីផ្សារបន្ថែមសម្រាប់កសិផលកម្ពុជា និងលើកកម្ពស់ជីវភាពប្រជាកសិករជាអ្នកផលិត។
នៅឆ្នាំ ២០២៤ វិស័យកសិកម្មកម្ពុជាបានរួមចំណែកប្រមាណ ១៦,៧% នៃផលិតផលសរុបក្នុងស្រុក ជាមួយនឹងតម្លៃបន្ថែមសរុបជាង ៧,៨២ពាន់លានដុល្លារអាម៉េរិក។ កម្ពុជាបាននាំចេញផលិតផលកសិកម្មជាង ១២លានតោន ទៅកាន់ទិសដៅ ៩៥ ប្រទេស គិតជាទឹកប្រាក់ប្រមាណ ៥,៣ពាន់លានដុល្លារអាម៉េរិក។ នេះបើតាមរបាយការណ៍ពីក្រសួងកសិកម្ម។
ដោយឡែកក្នុងរយៈពេល៩ខែ នៃឆ្នាំ២០២៥ កម្ពុជាបាននាំចេញផលិតផលកសិកម្មជាង ១១ លានតោន កើនឡើងប្រមាណ ៣០ ភាគរយ ធៀបនឹងរយៈពេលដូចគ្នាក្នុងឆ្នាំ២០២៤៕
-
ព័ត៌មានអន្ដរជាតិ១៤ ម៉ោង agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេដ្ឋកិច្ច៣ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoរដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ
-
កីឡា៤ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ៦ ថ្ងៃ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
សេចក្ដីជូនដំណឹង២ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេដ្ឋកិច្ច៦ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ