ថៃ ត្រៀមបញ្ជូនអាវុធ ទៅព្រំដែនជាប់ មីយ៉ាន់ម៉ា 

បន្ទាប់ពីមានការផ្ទុះគ្រាប់បែកនិងបាញ់ផ្លោងចូលដីថៃ ពេលនេះថៃបានត្រៀមរួចហើយ ក្នុងការបញ្ជូនអាវុធទៅព្រំដែនជាប់មីយ៉ាន់ម៉ា ព្រោះថា ស្ថានការណ៍កាន់តែក្តៅឡើងៗហើយ។

តាមការផ្សាយរបស់ Khaosod កាលពីថ្ងៃអាទិត្យទី២៣ខែវិច្ឆិកាឆ្នាំ២០២៥ កងកម្លាំង Rajamanu ​សហការជាមួយ Naresuan កំពុងរៀបចំបញ្ជូនសព្វាវុធនិងគ្រឿងបរិក្ខាយោធា ទៅព្រំដែនព្រមទាំងបង្កើនការល្បាតទាំងថ្ងៃយប់ ស្របពេលការប្រយុទ្ធគ្នានៅមីយ៉ាន់ម៉ា រីករាលដាលឈានដល់កម្រិតធ្ងន់ធ្ងរបំផុត។

យ៉ាងណា មិនមានការបញ្ជាក់ឡើយថាតើ អាវុធប្រភេទអ្វីខ្លះដែលនឹងត្រូវបញ្ជូនទៅ។

រឿងនេះកើតឡើងបន្ទាប់ពី កងទ័ពមីយ៉ាន់ម៉ា ទម្លាក់គ្រាប់បែកចូលដីថៃ ខ្ទេចផ្ទះពលរដ្ឋចំនួន៤ខ្នង និងមានជនជាតិមីយ៉ាន់ម៉ា ១២៥នាក់ រត់ចូលដីថៃ។

កាលពីថ្ងៃសុក្រ ការប្រយុទ្ធគ្នានៅមីយ៉ាន់ម៉ា ក៏រាលដាលឈានដល់ការបាញ់ធ្លាយចូលដីថៃដែរ ដោយគ្រាប់បានធ្លាក់ត្រូវសាលារៀនក្នុងខេត្ត Tak បង្ខំឲ្យសិស្ស៣៤៥នាក់ ជម្លៀសជាបន្ទាន់។

ទាហានមីយ៉ាន់ម៉ានិងក្រុមឧទ្ទាម​ បានបាញ់តដៃគ្នាយ៉ាងស្វិតស្វាញនៅក្បែរព្រំដែនថៃ ធ្វើឲ្យគ្រាប់កាំភ្លើងបាញ់ធ្លាយចូលដល់ស្រុក Mae Sot ប៉ះត្រូវសាលារៀន Ban Mae Kon Kaen បង្ខំឲ្យមានការជម្លៀសសិស្សយ៉ាងប្រញាប់។

សូមជម្រាបថា សាលារៀននេះមានចម្ងាយត្រឹមតែប៉ុន្មានរយម៉ែត្រប៉ុណ្ណោះពីសមរភូមិនៅមីយ៉ាន់ម៉ា ក្នុងស្រុកMyawaddy នៃរដ្ឋ Karen។ យ៉ាងណា មិនមានរបាយការណ៍អំពីជនរងគ្រោះទេ៕

អត្ថបទ៖ សុខ សុវណ្ណ