ព័ត៌មានជាតិ

ព្រះគ្រូចៅអធិការវត្តប្រាសាទគោកចក និងអាជ្ញាធរ ដឹកនាំជនភៀសសឹកដាំបន្លែ ដើម្បីផ្គត់ផ្គង់សម្រួលជីវភាពបណ្ដោះអាសន្ន

បានផុស

៥ ខែ មុន

នៅ

ថ្ងៃអង្គារ ៣០ ធ្នូ ២០២៥

ដោយ

កាលពីថ្ងៃទី ២៩ ខែធ្នូ ឆ្នាំ ២០២៥ ម្សិលមិញ ព្រះគ្រូវិចិត្រវង្សា ហែម គឹមសាន ចៅអធិការវត្តប្រាសាទគោកចក ដោយមានការចូលរួមពីសំណាក់អាជ្ញាធរមូលដ្ឋាន និងមន្ត្រីជំនាញ បានដឹកនាំជនភៀសសឹកដែលកំពុងស្នាក់នៅបណ្ដោះអាសន្នក្នុងវត្ត ជួយគ្នាដាំដំណាំបន្លែ ដើម្បីជាស្បៀងអាហារផ្គត់ផ្គង់ដល់ការហូបចុក និងសម្រួលជីវភាពប្រចាំថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះគ្រូវិចិត្រវង្សា ហែម គឹមសាន មានថេរដីកាថា កិច្ចការនេះ បង្ហាញពីសាមគ្គីភាព និងការចែករំលែកធនធានក្នុងបរិបទមនុស្សធម៌ ជួយដោះស្រាយបញ្ហាជីវភាពជូនដល់ប្រជាពលរដ្ឋក្នុងគ្រាលំបាក ហើយក៏ជាការចូលរួមយ៉ាងសកម្មក្នុងការអនុវត្តតាមការផ្ដួចផ្ដើម និងបំផុសចលនារបស់ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជានិច្ចកាលតែងតែជំរុញឲ្យមានការដាំដុះបន្លែតាមផ្ទះ សាលារៀន វត្តអារាម និងសហគមន៍ ដើម្បីផ្គត់ផ្គង់ដល់ជនភៀសសឹកដែលរងការវាយប្រហារដោយអាវុធនៅតាមព្រំដែនកម្ពុជា-ថៃ។

ព្រះគ្រូចៅអធិការវត្ត មានថេរដីកាបន្តថា ចលនានេះ ដើម្បីបង្កើនភាពម្ចាស់ការ កាត់បន្ថយការចំណាយ និងពឹងផ្អែកលើទីផ្សារខាងក្រៅ , ធានាសន្តិសុខស្បៀង និងបង្កើនបរិមាណបន្លែសុវត្ថិភាពសម្រាប់ប្រើប្រាស់ក្នុងសហគមន៍ ជាពិសេសការលើកកម្ពស់សុខុមាលភាពតាមរយៈទទួលបានបន្លែស្រស់ៗ និងមានជីវជាតិសម្រាប់ការហូបចុករបស់ប្រជាពលរដ្ឋភៀសសឹកនៅក្នុងតំបន់។

ព្រះអង្គ មានថេរដីកាឲ្យដឹងថា ក្នុងរយៈពេលជាង ២០ ថ្ងៃ មានប្រជាពលរដ្ឋជាជនភៀសសឹកបានកំពុងស្នាក់នៅក្នុងវត្តប្រាសាទគោកចក មានចំនួន ២២០ គ្រួសារ ដែលមកពីខេត្តឧត្តរមានជ័យ ព្រះវិហារ និងបន្ទាយមានជ័យ ហើយព្រះអង្គបានផ្ដល់ការឧបត្ថម្ភជាស្បៀងអាហារ ទឹកស្អាត និងការថែទាំជួយឲ្យពួកគាត់មានជីវភាពល្អប្រសើរ។ ដោយឡែកសម្រាប់កុមារថ្នាក់ទី ១ ដល់ទី ៦ មានគ្រូបង្រៀនចុះមកបង្រៀនផ្ទាល់ក្នុងវត្ត។ រីឯសិស្សថ្នាក់ទី ៧ ដល់ទី ១២ ត្រូវបានបញ្ជូនទៅរៀននៅវិទ្យាល័យ ហ៊ុន សែន សៀមរាប ដើម្បីកុំឲ្យខកខានការសិក្សា៕

អត្ថបទ ៖ គឿនវេត

Related Topics:ខេត្តសៀមរាប ការដាំបន្លែ ជនភៀសសឹក

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា